المشكلة في مصر ان صعب جداً تاخد حقق من الغلطان خصوصاً لو هو مش ناوي يديك تعويض عن الضرر اللي عملهولك
انا مصري بشتغل في السعودية وححكيلكو على موقف حصل لواحد صاحبي انا كنت راكب معاه وكان هو اللي غلطان
طبعاً بعد الحادث والحمد لله لم يصاب أحد نزلنا من العربية وبكل أدب وذوق اتعرفنا على الشخص الآخر وقعدنا نشوف كل عربية حجم التلفيات فيها لحد ما تيجي الشرطة
بعد حوالي 5 دقائق جات الشرطة ورسمت كروكي للحادث وطبعاً كان باين ان صاحبي غلطان و المهم خاد رخص العربيتين و رخص السواقة وقالنا حصلونا على القسم
طبعاً دخلنا القسم مش حقولك على الإحترام في المعاملة لدرجة انهم شربونا القهوة العربي ودي عادة عندهم هناك في المكاتب بعد ما خد البيانات العسكري قال لصاحبي لازم ضامن ليك و وضمنتو وخرجنا ومشينا. كل ده حصل في ربع ساعة مع عسكري شرطة ولا شفنا ضابط ولا بيتنا ليله في القسم علشان نتحول على النيابة صباحاً ولا العربيات اتحجزت والموضوع انتهى.
بعد كده لقيت إن الإجراءات هي إن المتضرر حيروح لثلاث ورش معتمدة ويجيب عروض الإصلاح وبياخدو بالعرض الأوسط. وعلى صاحبي ان يدفع المبلغ يا إما حيتحبس لحد ما يدفع.
علشان كده هناك مفيش مشاكل وأي واحد بيغلط بيدفع تمن غلطه بدون خناق ولا بلطجه وأعتقد لو كان قانون المرور الجديد كان اهتم باصلاح العلاقة بين قائدي المركبات واعطاء كل ذي حق حقه كنا شلقينا قد ايه الناس بتلتزم بالتعليمات
معلش طولت عليكو بس بصراحة اتمنيت اشوف ده في مصر