امتى أغير كابلات البوجيهات ؟؟

**egawady** · 10-09-2009 03:20 AM

السلام عليكم ورحمة الله وبركاته
انا معايا لانسر 98 اوتوماتيك ... العربية الحمد لله شغالة معايا كويس بس فى الفترة الأخيرة حسيت انها مخنوقة شوية ... انا عارف ان الموديل ده بيبقى مخنوق شوية خصوصاً مع تشغيل التكييف وخصوصاً كمان لو طالع مطلع وكمان عشان العربية 1300 سى سى ...
المهم روحت لميكانيكى وبعد ما كشف عليها قال انى محتاج أغير كابلات البوجيهات ... انا فعلاً مغيرتهمش خالص من الزيرو ... والعربية عاملة حوالى 100000 كيلو متر لغاية دلوقتى ... أكيد طبعاً انا اتأخرت فى تغيرهم ...
يا ريت حد من الأخوة الأعضاء المتخصصين فى الميتسوبيشى يقولولى ... امتى أغير كابلات البوجيهات ... يعنى كل كام ألف كيلو أغيرهم ؟؟
ويا ترى سعر الكابلات دى كام ؟؟
وهل فى أنواع مختلفة من الكابلات ترفع من أداء العربية .. ولا كله زى بعضه ؟؟
ويا ريت لو حد يعرف محل يكون كويس وموثوق فيه فى منطقة وسط البلد .. أو شارع مجلس الأمة ...
وهل فعلاً لو غيرت الكابلات دى حاحس بفرق ؟؟

وشكراً جزيلاً
وكل عام وأنتم بخير

**SAMEH_FOUAD** · 10-09-2009 03:56 AM

انا اعرف ان الكابلات بتتغير لما تبدا تتقطع تبوظ لكن مالهاش كيلو متر معين ,
ثانيا :العربية لو مخنوقة يبقى جرب تنظف الفلاتر والكربراتير ,وغير البوجيهات او مغيرتهاش ,
ثالثا:احنا جيران عشان انا ساكن فى لاظوغلى يعنى جنبيك ,واقدر اقولك ان مافيش حد كويس تقدر تجيب منة الحاجات دية عندنا ,لانها للاسف كلها تايوانى مش اصلى ,والاحسن انك تجيبها من التوكيل ,هتبقى غالية شوية بس هاتضمن انك واخد حاجة اصلية ,وسعرها معرفش بس هية مش هاتزيد عن 200 جنية لو من التوكيل لكن برة هايقولك 80 جنية فى الحدود دية
ولو عايز بردة واحد نظيف روح للشياطين الحمر او التوفيقية بس محلات معينة هتلاقيها فى الممرات

**SAMEH_FOUAD** · 12-09-2009 04:57 PM

شوف حكاية انها تتغير دية بتبقى زى ماقولتلك على حسب حالة الكابلات ,
ثانيا ماعتقدش انها هاتحسن من اداء السيارة غير بس فى توصيل الكهرباء للبوجيهات بكفاءة وبالتالى تحسين وقت الاشعال
لكن انت لو عايز بوجيهات تخلى العربية سريعة وليها تاثير بيبقى اسمها بوجيهات سبليت فاير بالسلك بتاعهم عشان يديك قوة البوجيهات دية ,لكن اى حاجة تانى هاتبقى عادية