الموضوع: هل هذا من مفطرات الصيام ام لا ؟؟

المشاركة الأصلية كتبت بواسطة hamadamdph

حبيب قلبي:
ممكن تعتبر الكلام اللي حقوله ده دردشة يعني واحد بيدردش مع صاحبه مش قصدي بيه اي حاجه

انا كان لي الشرف اني اشوف مشاركتك اول واحد وكنت خلاص حكتب الرد اللي انا شايفه صح على حسب اجتهادي بس افتكرت كذا حاجه خلتني اغير من ردي ::

1. احنا مش شيوخ يعني مش احنا اللي نتسأل السؤال ده, الحرام بين والحلال بين واستفت قلبك, كل ده صح بس احنا مش متخصصين.
افتكر احد اساتذتنا في الكلية كان بيقولي في مصر الناس كلها بتفتي في حاجتين ولا كانهم علماء فيه : الطب والدين
قول لاي حد انا عندي صداع واتفرج على اللي حيحصل, احنا كنا قاعدين مرة على قهوة وبقول لاصحابي انا عندي حموضة لقيت واحد بيقرا الجرنان من الترابيزة اللي جنبي بيقولي اشرب سفن حلو عشان قلوي, عايزني اشرب حمض كاربونيك عشان عندي حموضة على الرغم اننا كلنا دكاتره, ثانيا معرفش الناس جابت منين انه قلوي!!!!

ليه لما الواحد بيحب يغير بوجيهات عربيته يقول اروح لواحد متخصص ولما يسأل سؤال في الدين اي حد يرد
دا ربنا بيقول (الرحمن فاسأل به خبيرا)

2. السؤال نفسه انا مش عارف حاسس انه مش مبلوع, مش قصدي حاجه بس تخيل ان ناس قالت:
مابيفطرش : حيتقال بكره على ان فيه منتدى سيارات اتقال على صفحاته انه لما واحد يكلم صاحبته ياعم ميفطرش
بيفطر : طب ما حنا عارفين ان مكالمات الواحد مع اي واحدة غريبة عنه فيه نوع من الشبهة (انا مبقولش اننا ملائكة وكل واحد فينا عنده الذنب اللي ربنا يقدره ويعرف يتخلص منه وانا وانت في الاخر بشر
((متخليش حد يضحك علينا)

3. احنا داخلين على العشرة الاواخر, يعني المفروض ان الواحد يعتكف او حتى في بيته ياخد نية الاعتكاف (مع مراته)

4. أنا رأيي الشخصي الشخص اللي بيسأل الكلام ده من أصحابك يروح يستفتي اي شيخ ثقة, وبعدين يقول لكم على الرد اللي احنا من جوانا اكيد عارفينه وبعدين يبقى يقول لكم احسن من الكلام العلني على النت خصوصا ان الموضوع حساس وخاص بهذا الشخص



وكل سنة وانت طيب

و انت بالف صحة و سلامة و كلامك مظبوط فعلا .

بس رأيك الشخصي اللى انت مذكرتوش فى مشاركتك مهم ايا كان .

و بعدين حضرتك لما الموضوع ده يكون على النت و يجتمع الاخوة على راى واحد فده هيكون راحة بال لكثير جدا جدا من الشباب لانه الامر هيكون شبه محسوم .

و كمان مش صاحبي اللى عايز رد او اى حد , ده كان نقاش بيننا خصوصا ان لى صديق بيكلم صديقته يوميا من اول رمضان يعنى 20 يوم .

انا كان رايي انه لا يجوز و ان الصيام ممكن يكون باطل بشكل كبير و هو اعترض و لما المناقشة كبرت شوية اعترض الكثير ووافق الكثير .

فلو سالنا شيخ من الشيوخ الجليلة هيكون الجواب فى نطاق ضيق و مش كل الناس هتعرف الجواب و ده اللى يهمنى ان كل الشباب يعرفوا , هل هذا يفسد الصيام ام لا .

شكرا يا جماعة , و شكر خاص د \ احمد .

بس افهم من كده ان الرك على النية مش على الفعل , لان الفعل فى حد ذاته ليس من المفطرات .

بس في حاجة عايز اوضحها يا جماعة باينة فى كلامكم انتوا مش واخدين بالكم منها .

انتوا من كلامكم كده كانكم بتتكلموا عن حالة مراهقة بين شباب , او شاب مراهق بيتكلم مع بنت مراهقة .

لو الموضوع موضوع نية يبقي صاحبي معملش حاجة غلط , لان نيته سليمة و انا متاكد من كده , لان البنات دول اصحابنا من النادى و انا عارفهم كلهم و عارف صاحبي كويس , بس انا و الحمد لله مبكلمش حد فى رمضان خصوصا وقت الصيام لانه مش شيء سهل .

هو الموضوع كله بدا بس انى كنت عند صاحبي و هو بيكلم زميلته على النت فى وقت الصيام , و انا لما شفته قلت له ممكن صيامك يضيع بسبب كده او ان كده ممكن يقلل من ثواب الصيام بدرجة كبير , و اختلفنا عادى جدا .

فانا عايز اعرف بس علشان انصحه اذا كان كلامى صح او خطا , علشان ميتمداش فى الخطأ .

صيامه كده مش باطل و لكنه يرتكب ذنوب كثيرة . صح كده ؟