اشتريت مازدا 232 موديل 1982 وعايز مساعدتكم
اعضاء المنتدى الكرام أولا كل سنة وانتم طيبين
ثانيا باركولي أنا جبت أول عربية في حياتي ولسة بتعلم السواقة عليها أهوه بس عايز أعمل فيها شوية حاجات كده
أولا عايز اركب فيها حزام أمان بدل اللي فيها عشان اللي فيها ده بايظ
ثانيا عايز اغير جلدة المساحة اللي فيها عشان نشفت من الزمن - المساحات شغالة مية مية على فكرة
ثالثا عايز اغير الشمسات اللي في الصالون عشان اللي راكبين فيها عدى الزمن عليها لما قال يا بس
رابعا عايز اغير كوالين البيبان عشان العربية كانت مركونة وال كوالين بتاعتها مصدية وكمان برده أمان ليَّ فيما بعد عشان أصلا صاحبها ساكن جمبي بشارعين وأنا مش مطمن بصراحة
خامسا عايز اغير الدواسات التلاتة بتوع البنزين والفرامل والديبريياج عشان ممسوحين على آخر وبيتزحلقو تحت رجلي
سادسا عايز اغير إزاز الفوانيس بتاعها عشان متكسر وكده - الباغة يعني
يا ريت تقوللي أجيب الحاجات دي منين واركبها فين وطبعا أنا لسة باداورلاها على ميكانيكي كويس وكهربائي كمان
ياريت اللي يعرف ميكانيكي أو كهربائي مازدة 323 كويس يقولي بس يكون آمين وبيفهم فيها
وياسلام لو كان في الهرم
وكل سنة وانتم طيبين
مستني ردودكم
اخوكم ميزو