شوية مشاكل محتاج رايكم فيها// نوبيرا 2008

**araa875** · 11-09-2009 05:10 PM

بصراحة يا جماعة انا اول مرة اشارك معاكم في المنتدى بس بعد مااحترت مع عربيتي

ياريت تقبلوني صديق ليكم وتساعدوني

اولا انا معايا نوبيرا 2008 كاملة مانيوال شاريها زيرو من التوكيل

ماشية لحد دلوقت حوالي 18000 كيلو وحالتها فابريكة لكن فيها شوية مشاكل حيرتني:

اولا : الطنابير من يوم ماجبتها غيرتها مرة والمرة التانية الضمان قالي مينفعش تتغير اكتر من مرة في الضمان

ومن فترة لقيت الطنابير اللي ورا فيها رجة فظيعة

ثانيا : صوت علبة الشكمان فظيع جدا جدا وصوت العربية عالي لاقصى الحدود

تالت حاجة : العفشة في اصوات خبط مع المطبات اللي بتبقى لتحت او الحفر الصغيرة والنقر والبلاعات

صوت زي صوت الطنة قدام وورا :: رحت للتوكيل يقولي مفيهاش اي حاجة:: رحت لاكتر من عفشجي قالي دا من جلب المقصات اللي قدام... غيرتها لحد دلوقت اكتر من اربه مرات في اقل من 3 شهور ودلوقت صوت الخبطة فظيع جدا جدا واحس بيه في الدريكسيون وعلى السرعات العالية احس ان الدريكسيون خفيف جدا ومش مالك العربية

وظبط الزوايا تقريبا بظبط زوايا كل شهر ونص مع الترصيص

وبالنسبة للصوت اللي ورا محدش عارف يشخصه ليا

واحد يقولي المساعد اللي ورا محجر ولازم يتغير والتاني يقولي المقصات الخلفية وواحد يقولي السوست

كل العيوب دي من يوم ماجبتها لحد دلوقت ما اختفتش منها

لكن هيا بصراحة عربية جميلة جدا وقوية وشديدة وعزمها شديد وبتستحمل وثابتة جدا عالطريق وعلى السرعات العالية جميلة بجد لكن العيوب دي بتخلي الواحد يكرهها

ياريت اللي عنده افادة او جرب وعمل اي حاجة من الحجات دي يفيدني

ومشكورين على المواضيع دي كلها

**Mosmafa** · 11-09-2009 08:47 PM

موضوع التخبيط ده
حصلي غيرت الشدادات و اتظبطت
وبرضه ممكن تروح للعفشجي تخليه يفك الاربع مساعدين ويشيك عليهم برة
مش يقعد يدوس عالعربية ويشوف استجابتهم ((شيك عليهم برة))

لو الطنابير ورا في رجرجة ممكن تخرطها طالما لسه جديدة و تغير التيل بتاعها

الشكمان اكيد يا ميا في وصلة لحامها فك والبركة في المطبات

**Mosmafa** · 11-09-2009 08:49 PM

ممكن كمان يكون التهبيد والترزيع ده من الكاوتش
برضه كان الكاوتش اللي عندي تعبان جدا و كان بيعملي مزيكة حسب الله
وانا ماشي في شارع مش مسفلت ولما غيرت بكاوتش جديد حسيت بفرق كبير جدا

**samirayad** · 11-09-2009 10:29 PM

بالنسبه لصوت الخبطه اللى وراء
ممكن فعلا تكون السوست عندك ضعيفه ومبتشيلش العربيه كويس من ورا وبيحصل أجهاد على المساعدين الخلفيه وبالذات مع السرعات العاليه والطرق الغير مستويه أو الطرق اللى فيها مطبات هوائيه

**araa875** · 06-10-2009 02:03 PM

المشاركة الأصلية كتبت بواسطة samirayad

بالنسبه لصوت الخبطه اللى وراء
ممكن فعلا تكون السوست عندك ضعيفه ومبتشيلش العربيه كويس من ورا وبيحصل أجهاد على المساعدين الخلفيه وبالذات مع السرعات العاليه والطرق الغير مستويه أو الطرق اللى فيها مطبات هوائيه

سلام عليكم يا باشمهندس

انا حبيت بس اضيف انه انا لسه مركب طقم جنوط جديد من بعد ماركبته وفي حجات جديدة بتظهر فيها
فمش عارف دا فعلا منها ولا من السوست

**samirayad** · 06-10-2009 02:13 PM

المشاركة الأصلية كتبت بواسطة araa875

سلام عليكم يا باشمهندس

انا حبيت بس اضيف انه انا لسه مركب طقم جنوط جديد من بعد ماركبته وفي حجات جديدة بتظهر فيها
فمش عارف دا فعلا منها ولا من السوست

وعليكم السلام ورحمة الله وبركاته

طيب شوف الموضوع ده

أنا موضح رأيى فى موضوع السوست الخلفيه وتجربتى مع النوبيرا
وكنت لسه شاريها زيرو
وغيرت السوست بعد أسبوعين تقريبا من شرائى للسياره من المعرض

الموضوع

وبرضه ده موضوعى الأساسى عن نفس مشكلة السوست

دوس هنا