عيوب النيو سيراتو ( لمالكى السيراتو فقط)
أخوانى الأعزاء......... السلام عليكم و رحمه الله و بركاته
انا اخوكم خالد و هذه اول مشاركه لى فى المنتدى. انا حجزت نيو سيراتو الفئه sx بفتحه سقف و عاوز اعرف عيوبها الحقيقيه لأنى لو لقيت عيوبها جامده بالنسبه لى سوف الغى الحجز بتاعها.
أولا : انا شوفتها كذا مره و ركبنها و سوقتها بس لفه صغيره العربيه كانت سحبها كويس و قاعدتها حلوه بس كان ليا شخصيا بعض الملاحظات:
1- الصالون ماكنش قوى فى اول فئه اوتوماتيك و الابواب من جوه كانت خامتها مش قوى و حسيت ان الصالون مش حيعيش كتير مع انى اعزب و ماعنديش اولاد يبهدلوا العربيه و من النوع اللى بيحافظ على الحاجه قوى
2 - صاحب العربيه كان بيشتكى ان العفشه ناشفه و انه متضايق منها مع ان العربيه ماكانتش مجنطه اصلا
3- انا حسيت ان الصاج خفيف و مش حيستحمل
4- الاكره بتاعت الباب من بره كانت خشنه اوى فى الفتح مقارنه بالانسر معرفش ده بسبب ان العربيه جديده ولا هيا كده اصلا مع ان العربيه عامله 6000 كيلو
بالله عليكم ساعدونى بأمانه لان ربنا هوه اللى عارف انا جمعت ازاى ثمن المقدم بتاعها و لو خدت فيها مقلب يبقى لبست فى الحيطه.
ملحوظه هامه: هذا الموضوع لمالكى السياره فقط و ليس مجال للمقارنه بأى نوع اخر او السب الأعمى فى السياره
و جزاكم الله خيرا