سيداتى ساداتى....
أحيكم من صالة الإنتظار فى كيا أبو رواش
نبدأ من الأول ...
اتصال مع 19kia
وتحدد الميعاد الساعة 8:30 صباحا النهاردة طبعا
على فكرة هم عندهم فترتين فى رمضان
فترة صباحية وفترة مسائية بعد الفطار
ماعلينا ... وصلت متأخر ربع ساعة عشان تهت
المفروض انك تدخل بعد كارفور ولما تشوف محطة بنزين على الشمال
تدخل من قبلها وتخليها هى اللى على يمينك لحد ماتشوف جريدة النبأ
وبعدها بشوية بسيطة هتلاقى كيا على اليمين .... بس أنا للأسف مادخلتش من عند محطة البنزين
وكملت على طول وطبعاً اتأخرت شوية
دخلت برقم الحجز اللى أخدته من الكول سينتر ...
وهنا ابتدت أول المفاجأت...
صالة المقابلة صغيرة مش زى صالة دايو ... بس العدد كان قليل عشان كده مفرقتش كتير
بس لو فيه أكتر من عميل فى نفس الوقت هيضطروا يقفوا يستنوا بعض ....
كمان وانت بتتكلم مع المهندس لازم تفضل واقف ... مش فاهم ليه
تانى حاجة فاجأنى بيها هى أسعار الإنذار ... 800 جنيه للكارينز
ليه مش فاهم ... وماتنسوش اللإنذار صينى ...كمان يعنى مش كورى ولا أوروبى
والغريب إن سعره بيختلف حسب نوع العربية ... برضه ليه مش عارف ... هو حب يقنعنى ان الكارينز معقدة
المصيبة الأكبر إن تركيب الإنذار هياخد 3 ساعات ونص ... يا نهار أبيض ... ده فى التوكيل ... طيب لو بره هياخدوا ايه
التكلفة كلها بالصيانة وتركيب الإنذار 1070 جنيه مصرى لا غير .... ربنا يهديهم ...
تكلفة الصيانه معقولة لكن الإنذار مصيبة ... سالته عن البارك سينسور قالى 1300 جنيه ... صباح الفل ...
سلمت أمرى لله ... ونزلت فى صالة الإنتظار ....وهى عبارة عن صالة كبيرة فيها ترابيزات وواى فاى ( هو ده المهم) و تلفزيون وشاشة بيكتبوا عليها اسماء العملاء وميعاد الإستلام وهكذا ....
انا فى الإنتظار وهوافيكم بالأخبار اولا بأول ....
مراسلكم فى كيا أبو رواش
إيهاب من غير عافيه