إسمحلى سيفك برة المقارنة دى لأن المنافسة أوروبية قوية والسيفيك مش هتقدر على المنافسة دى لأن بمنتهى البساطة سواء الفورد أو الفانتازيا أحسن من السيفك فى الرفاهية وجودة الخامات والأمان والمتانة والعمر الطويل والعفشة القوية والصاج التقيل و و و ، أما مميزات السيفك تنحصر فى الشكل الشبابى والتسارع القوى وإستهلاك بنزين أقل ، فى رأيى اليابانى الوحيدة اللى ممكن تنافسهم هى السوبارو عشان نظام الدفع فقط لا غير
بالنسبة للمقارنة ده رأيى :
الشكل: الإتنين 10/10 من الداخل والخارج ، تابلوه الفورد يتميز بنواكل حول العدادات وشكل الكروز كنترول والدراعات تحفة ، أما الفانتازيا إضاءة العدادات ممتازة والشاشة حجمها جميل والكاسيت الجديد بشاشة 2 دين فرقت جامد فى الشكل وزودت الإحساس بالتكنولوجيا
الموتور : الفورد أقوى بس مش عامل حاسم فى المقارنة لأن الفانتازيا بتعوضه فى الجيربوكس
الجيربوكس : الفانتازيا أفضل بكتير وممكن يبقا عامل حسم لأنه 6 سرعات أمامية يعنى الموتور دايماً شغال على عدد لفات منخفضة = عمر طويل للموتور وإستهلاك أقل وكمان ستيبترونك زيه زى الفورد
متانة الصاج : أعتقد الإتنين كويسين جداً ، أنا شخصياً شوفت حوادث للسكودا تقول إن العربية دى حديد وشوفت كمر حديد خلف الإكصدام الخلفى والأمامى وده مطمئن جداً فى الحوادث الصغيرة اللى دايماً تحصل فى الإشارات ، ممكن السكودا تبقا أفضل
الأمان : الإتنين مواصفة أوروبى وآمنين بشكل كويس
العفشة ، عفشة الفانتازيا هى الجيتا والجولف يعنى تقريبا نفس الأداء والثبات ، عفشة الفوكاس بتاعة مازدا3 وفولفو s40 تقريباً ، أعتقد الإتنين ثابتين كويس ، بس عيب عفشة الفورد إنها باينة من ورا العربية بشكل مستفز يحسسك إن العربية مرفوعة لفوق بس هى مش مرفوعة ولا حاجة ، وعموماً ده مجرد عيب شكلى
إستهلاك البنزين : متقاربين ومش عامل حسم
التسارع : متقاربين ومش عامل حسم
إعادة البيع : الفانتازيا أفضل كتير
الوكيل : الفورد أفضل
الإنتشار : الفورد أقل بكتير = برستيج أعلى عند اللى بيفهموا ! ولكن قطع غيار خارج التوكيل أقل
فتحة سقف : الفورد فيها ، الفانتازيا لأ
الكماليات : الإتنين مليانيين بشكل مايخلكش تسأل هم فيهم إيه !!
الإرتفاع عن الأرض: الإتنين مناسبين جداً لمصر
حجم الشنطة : الفانتازيا أكبر
إتساع الصالون : ماركبتش الفوكاس بس الفانتازيا مش واسعة أوى من الخلف
البرستيج بشكل عام لدى العامة والمرور وانت داخل كمين مثلا : الفانتازيا توحى إن صاحبها باشا أكتر من الفوكاس ! وبالتالى ممكن يقصر معاك ويلم الدور أكتر !!
نمط القيادة : أعتقد الفوكاس أنسب فى الزحمة والمدينة عشان الموتور الأقوى = طلعات أنشط ، أما الفانتازيا هتبقا أجمل فى السفر عشان الغيار الخامس والسادس هيريحوا الموتور تماماً من غير حرق ولا دوشة
أنا لو هحط نفسى مكانك هفضل 3 سنين أفكر ومش هعرف أجيب أنهى فيهم !!