أرجو النصيحة : التأمين أصبح غالي جدا و العربية قسط -بنك عودة
الإخوة الأفاضل في المنتدى :
اشتريت عربية هيونداي فيرنا ودفعت نصف الثمن نقدا والباقي قسط مع بنك عودة على خمس سنوات ، وانتظمت في دفع الأقساط لمدة سنتين وكنت خلالهما أعمل تأمين على العربية لصالح البنك وكانت أسعار التأمين معقولة لحد العام الماضي - دفعت 1.65% من ثمن العربية في شركة المهندس للـتأمين والأمور كانت ماشية - السنة دي حبيت أجدد البوليصة في نفس الشركة فطلبوا 4.2% يعني أكثر من الضعف - رغم إني مأمن على عربيتين عندهم ومعملتش أي حوادث وسألت في شركات ثانية فوجدت أقل سعر 3.6% ، وكمان أول ما يعرفوا إنها تبع بنك يغلوا السعر ، والبنك مصمم على التأمين رغم إني عرضت عليهم إني أحط وديعة عندهم بالمبلغ اللي عليا لهم ويحجزوا عليها كضمان للقرض - أو أي ضمان مالي هم عايزينه بدلا من التأمين و يكون ده أحسن لي و للبنك فرفضواوقالوا مش حنديك ورقة الموافقة على تجديد الرخصة من غير بوليصة تأمين - قلت لهم طيب حأسدد اللي علي كله ومش عايز أكمل القرض ، قالوا ماشي بس حتدفع 5% غرامة سداد معجل -تخيلوا : أديهم فلوسهم قبل معادها بثلاث سنوات يغرموني 5% من المبلغ المتبقي !!!!!- مش عارف أعمل إيه :
1- أأمن وحسبي الله فيهم وأدفع مبلغ فوق 2000 جنيه والعربية فيرنا وحاجتها أصلا رخيصة وده طبعا حيتكرر ثلاث سنوات قادمة ؟
2 أو أديهم فلوسهم و أدفع الغرامة ( الإتاوة 5% ) وحسبي الله فيهم برضوا ؟
3- هل فيه وسيلة لتجديد الرخصة من غير ورقة البنك؟
ماذا تفعل لو كنت مكاني؟
