الموضوع: يوميات شوماخرتين علي الطريق الدائري

اولاً: احب اقدملكم نفسي
انا رنا اللي عمالين تجيبوا في سيرتها بقالكوا يومين واللي الاخت ايس ربنا يوريني فيها يوم (تلف فيه الدائري متعرفش تجيب اخره وتكمل عمرة مقبولة زي اللي عملناها بسببها دي) شردتها في المنتدي كله ، حسبي الله ونعم الوكيييييييييييل فيكي يا ايس
اشوف فيكي يوم لا شهر لا لا سنتين ونص مش كفاية فيكي اصلاً ، عارفة مشكلتك انك عاملة فيها فلحوسة وضيعتينا بفلحستك دي

على الاقل انا لما توهت في الاول كانت يدوب نزلة غلط بسبب اني كنت بكلمك برده (يعني شوفي انتي السبب حتى في التوهة الاولانية ) والحمد لله قدرت الحق الموقف وسألت واحد كان واقف في المنزل اللي نزلته غلط قبل ماطلع طلعة تانية غلط برده وبعدها بشوية سألت واحد تاني عشان اتأكد (مش عيب يعني مانا اول مرة اجي الطريق ده) وماخاب من استشار.
لكن انتي طول الطريق واحنا راجعين اقولك انتي متأكدة انك عارفة الطريق كويس ؟ عارفة هاننزل انهي نزلة وكدة ؟ ماتيجي نسأل احسن ، تقوليلي لا نسأل مين يابنتي دا الدائري ده صاحبي الانتيم حافظاه زي دولابي بالظبط (سبحان الله من جوايا كنت شاكة فيكي من البداية وقلت بلاش ابينلك لحسن اطلع ظالماكي) مع اني متأكدة ان احساسي عمره ماخيب ابدا وفعلا صدق توقعي ووكستينا والحمد لله .
بس يالا قدر الله وماشاء فعل .
ادي اخرة اللي يسمع كلام ايس هانم دي المفروض اصلا ميتخرجش معاها ابدا خصوصا في الحر عشان دماغها بتسيح
الظريف في الموضوع بقي اني فعلا حسيت اني لفيت الدائري كله في اليوم ده بس مكنتش تعبانة من السواقة ولا من الطريق (هو اينعم كان مقفول شوية عند بعض النزلات لكن قشطة يعني ) بس كان كل اللي قالقني بس خوفي لحسن اتأخر واتهزأ في البيت من تحت راس ايس هانم .
كان لازم يعني اطلع شهمة معاها واصمم اني اوصلها وبعدين ارجع تاني دانا كنت خلاص قدامي اقل من ربع ساعة واوصل بيتنا لكن نقول ايه ايايكشي يتمر بس .
اللي يضحك بقي في الموضوع اننا تقريبا عدينا على ترعة الاسماعيلية بتقولي هو ايه اللي جاب النيل هنا تاني إحنا مش لسة معديين عليه اقولها يابنتي ده مش نيل دي ترعة تقولي لا نيل قلتلها طيب ربنا يستر (مش عارفة النيل من الترعة " شكلك فاهم يانُصة ") .
بس الحمد لله كنت مفولة العربية لآخرها ومؤشر البنزين متحركش خالص وفضل لحد الاخر حتى بعد ماخدنا القوس الكبير مبتداش ينقص بقي غير في نص الطريق احنا راجعين وطبعا على ماوصلتها ورجعت تاني كان نص التنك خلص اصلي قلت اوجب معاها واشغلها التكييف بدل مايبقي توهة + حر + اصوات مزعجة (صوت الهوا مع العربيات كان عامل احلى شغل ).
بس رغم كل البلاوي دي ورغم الصداع اللي جالي من كتر السواقة وصوت العربيات ومنظر الدائري اللي مش عايز يخلص ده لدرجة اني لما وصلت البيت وقاعدة بستريح شوية كنت حاسة اني لسة سايقة واني لسة فوق الدائري )
بس فعلا ده كان مشوار هايل فعلا جربت فيه العربية كويس خصوصاً ان ده اول مشوار طويل ليها بعد صيانة الالف وبعد خروجها من حادثتها الاخيرة (لإني كنت لسة مستلماها قبلها بيومين بس) بس كدة العربية خلصت تليين بالتلاتة.
والحمد لله العربية كانت كويسة وجربت بيها سرعات مختلفة بس اقصي سرعة جبتها كانت 145 او 150 مرضيتش ازود عن كدة عشان بس الرادار لإني مكنتش عارفة الاماكن بتاعته فين بالظبط فلميت الدور ونزلت للسرعة القانونية تاني واساسا اساسا لما كنت بزود عن 100 واقولها احنا هانوصل لـ 120 كانت ايس بتزلق في الكرسي :POINTI~2[2]: وتقولي هدي السرعة يارنا ، لأ وفوجئت بالهانم مكنتش رابطة الحزام لحد نص الطريق وانا مكنتش واخدة بالي اول ماخدت بالي قلتلها هاتربطي الحزام ولا انزلك هنا إفتكرتني خايفة من المخالفة قلتلها لأ معلش ياماما انا خايفة عليكي (اينعم لو كنت خدت مخالفة كنت هادفعهالك ) بس الله اعلم القدر مخبيلنا ايه مش عايزة ابقي شايلة ذنبك البسي الحزام ومتلقعيهوش الا لما تنزلي .

انا لما وصلت البيت مبقتش مصدقة نفسي وبجد تجربة لا تنسي، ومنك لله يا ايس على الفضيحة اللي بجلاجل دي .
وبعدين شوماخرتين ايه دانا اللي كنت سايقة من اول الطريق لأخره رايح جاي يبقي فين الشوماخرة التانية بقي .
ماعلينا الحمد لله اننا وصلنا بيوتنا بالسلامة ودي كانت نهاية صداقة ايس ورنا ، ياريت مشوفكيش على اي حتة في الدائري بعد كدة يا ايس .

مانا قلت بقي انك لسة طالبة ياحرام ولسة بتاخدي مصروفك فحرام ادفعك في البنزين
وبعدين عيب عليكي ياأيس يعني انا لسة دافعة 6 الاف جنيه تصليح العربية هاجي اتكلم على 30 او 40 جنيه حق نص التفويلة يالا مش خسارة فيكي حبة البنزين دول اهو ربنا عوضني خير وملحقتيش تركبينا لعبة الديسكفري .
كفاية قطر الموت واللي حصل فيه
وبعدين بيت ايه اللي كنت عايزاني اوصلك لحد عنده انتي لو كنتي طلبتي اوصلك القمر ياحبيبتي كنت وصلتك لهناك ورميتك من فوق إنتي تؤمري بس وانا عليا التنفيذ .
بس بجد بجد وبغض النظر عن النهاية السودة اللي كتبتها ايس بإيديها
انا مبسوطة اوي اني قضيت يوم ظريف معاها في دريم بارك وكان بقالي سنتين تقريبا مروحتهاش وكمان انها طلعت جدعة ونفذت وعدها وجت رغم ان كل صحابها اللي كانت متفقة معاهم باعوها ومجوش.
عموما الرحلة الجاية بعربيتك بقي يا أيس بس ربنا يسهل ونوصل في نفس اليوم بس منوصلش بعدها بإسبوعين مثلا