الموضوع: رابطة مالكي السويفت

المشاركة الأصلية كتبت بواسطة mashhs

حبايبي اصحاب السويفت أتشرف بالانضمام ليكم - أنا جبت حتة سويفت موديل 95 خضرا زي علم القذافي في الأول كانت مريحاني بس مش عارف هل لإني خبرتي كانت تحت الصفر وللا تدبيسة بقت كل شوية تطلعلي فيها مشكلة المهم فضلت وراها حاجة حاجة لحد ما اتظبططت معايا دلوقت المهم أنا عندي كام مشكلة كدة قلقني
1- وانا ماشي وإذا بمطب متوسط الارتفاع خلى العجلة الامامية جابت الكرتيرة على الارض وقبل كده كنت بحس انها واطية شوية من قدام فقلت اجيب علايتين واركبهم عشان اعوض الانخفاض ده من قدام فإيه رايكم
2- العربية لما بزود عن 90 - 95 بحس انها بتحدف مني ومش ثابتة
3- إيه أفضل نوع زيت للموتو واغيره عند كام كيلو
بس خلاص بالنسبة للنهاردة
ويارب اصحاب الخبرة يفيدوني وشكرا مقدما

1- بص يابرنس...التعلية اذا كان ولابد هاتعملها يبقى تتعمل من ورا وحذاري انك تلعب في العفشة اللي قدام لعدة اسباب منها...اولا قدام ده فيه الموتور وده بيتسمى مركز ثقل العربية...اي تغيير في الارتفاع بيعمل اختلال في الاتزان فورا ويخلي العربية تعوم منك جااااااااااااامد...ثانيا ان قدام فيه التوجيه...فبلاش لعب فيها
ممكن ورا تركب يايات ناشفة شوية احسن من التعليه

2- هل هي حدفه ولا رجرجة...لو رجرجة تبقى العجل عاوز يترصص...لو حدفة تبقى ظبط زوايا او الكاوتش فيه حاجة مش مظبوطة

3- موضوع الزيوت ده فيه خلاف جامد...بس انا هاقول لك على رأيي الشخصي
اول حاجة >>>عشان نبقى متفقين مفيش حاجة اسمها انك تستعمل زيت اقل من اللي بيتقال عليه 5000 كيلو تحت أي ظرف...لأنه هيتحرق منك وهيتبخر بسرعة وبيتحول بسهولة لحاجة زي الشحم بتقفل مجاري الزيت...غير انه مش متوافق مع مواصفات الموتور...
تاني حاجة >>>احنا كده بقينا محصورين في الزيوت ال 5000 وال 10000....هتختار ازاي؟؟ الاختيار ياسيدي بييجي عن طريق ان سيادتك بتشوف استهلاكك للعربية شكله ايه؟؟....هل انت بتجيب مثلا 7000 كيلو او اكتر في 6 شهور؟؟ في الحالة دي هتجيب موبيل 1 وصدقني الغالي تمنه فيه
تالت حاجة>>> حالة موتور العربية...لو الموتور كويس ومش بياكل زيت وكنت بتنطبق عالحالة رقم 2 يبقى تجيب موبيل وان...
رابع حاجة>>> المشاوير....لو مشاويرك العادية اقل من 15 كيلو...وبيتقف فالعربية في زحمة وبتشغل التكييف يبقى ده استخدام شاق والزيت ال10000 يقعد معاك 7500 كيلو فقط

وأي خدعـــــــــــــــــــة