مياه الردياتير

**danash** · 26-09-2009 08:08 AM

عايز اعرف الواحد يغير المية ازاى لأن كان عندة مشكلة فى خرطوم دخول المية على الردياتير اللى بيسموا الشجرة غيرته وبعدين الميكانيكى حط مية حنفية لغاية لما ابقى اغيرها انا
المرة اللى فاتت غيرتها عن طريق فكيت خرطوم الفيظ الرفيع الداخل على القربة وزودت القربة بدون ادارة العربية بس متهيا لى كدة ان انا بعمل دورة مغلقة على الجزء ناحية اليمين من الردياتير بس مش المية كلها عايزين الفايدة فى الموضوع ده

**Ahmad Allawy** · 26-09-2009 10:06 AM

لأ هو غالبا اللي انت عملته صح..
بس الفرق انك بتعمل كده و انت مدور العربية.. و بتدي مية من فوق لحد المية اللي راجعه للقربة تاني تبقي من المية اللي انت حطيتها..
يعني مثلا لو انت حاطط مية حمرا او خضرا (و المية الحمرا افضل للعربيات الالماني) يبقي هتبص علي المية اللي نازلة من الخرطوم ده.. و طبعا هتكون بتزود من فوق من القربة.. لحد ما تلاقي المية الحمرا بدأت تنزل من الخرطوم قدامك..

الفرق انك لما بتعمل كده و العربية دايرة.. الطلمبة بتحرك المية اللي في دورة التبريد كلها.. و بالتالي بتغير المية كلها..

**danash** · 26-09-2009 10:58 AM

نزلت دلوقتى عملت زى ما قلت فكيت خرطوم الفايظ بتاع الردياتير وانا مشغل العربية نزلت الخرطوم شوية لغاية ما نزل المياه اللى فى القربة كان باقى شوية وبعدين زودت مياه من عندى فى القربة عملت كدة لغاية لما المية اللى معايا قربت تخلص جركن 4 لتر انا جبت مية مكيف من الجامع اللى جنبنا