اضبط كاوتش عربيتك بنفسك

**noon_eg** · 07-11-2007 04:35 AM

يمكن ناس كتير فى المنتدى اتكلمت عن ضغط الهواء فى الكاوتش ولكن انا هنا عايز احكى موقفين حصلوا معايا

الاول :

فرده كاوتش نامت رحت لحمتها فى كالتكس وقلت اضبط الهواء بالمره الراجل الله يجحمه زود الضغط جدا لدرجه ان العربيه بقت ترزع جامد وانا ما كنتش فاهم ليه لغايه ما بعدها باسبوع قلت اشوف الضغط بالمقاس اللى عندى لقيته 45 كنت هاتجنن بس كان بعد فوات الاوان المساعدين الامامى كانو انتهوا وكمل على واحد منهم مطب صناعى فى ظلمه الفجر وكانت النتيجه تغيير 4 مساعدين عملوا معايا 60 الف كم نوعهم KYB

الثانى :

بعد تغيير المساعدين وفرط العفشه قمت بضبط الهواء على 30 على البارد وكله تمام لغايه ما فى مره اخدت مطب على السريع وحسيت تانى يوم ان العربيه بتحدف قلت يمكن محتاجه فرده تتزود قمت مزود الفردتين الامامى بنفسى بالمنفاخ ابو مقاس بعدها حسيت ان العربيه بترزع على خفيف
وكانت المفاجاه المذهله يوم ما كنت فى بنزينه امارات عند كارفور فوجئت ان الضغط فى الامى 50 و45 وخلفى 25 و28
قلت اكيد فى حاجه غلط
وطلعت المقاس وكشفت لقيت نفس الضغط - قلت يمكن علشان مشوار كان طويل وجرى المهم خليت الراجل يزبط على 45 امامى و32 خلفى وتانى يوم الصبح قيست بالمقاس على البارد لقيت امامى 40 وخلفى 30

الخلاصه:
1- ان ضغط الهواء بيزيد مع المشى امامى حوالى 5 درجات وخلفى درجتين بالتقريب
2- لا تثق فى المقاييس الصغيره بتاعت البيت واضبط عند عداد ديجتال
3- اذا حسيت بترزيع ما تنطنش علشان ما تغيرش المساعدين كل شويه

**اسلام المصرى** · 07-11-2007 05:19 AM

شكرا جزيلا يا مهندس هانى على النصائح جزاك الله خيرا :-) هو فعلا موضوع مهم جدا , أنا كل فترة بروح ذى حضرتك عند محطة أمارات مصر عند كارفور البوابات خدمتهم ممتازة و ناس محترمه. ربنا يكفيك شر الطريق.

**eng_mkhalaf** · 07-11-2007 08:31 AM

احس حاجة تجيب عداد ديجيتال وتقيس بية كل فترة بنفسك الضغط

**Abdallah** · 07-11-2007 12:35 PM

ريح دماغك وزود نيتروجين.

**MMamdouh** · 07-11-2007 01:06 PM

دايما ضبط الكاوتش بيبقى على البارد عشان كدة متفكرش تضبط الكاوتش فى بنزينة و انت ماشى الا اذا كانت الفردة مريحة جامد

قصة ال5 درجات دى مش دقيقة لان مش كل عربية بتمشى فى نفس الظروف زى التانية و بالتالى ممكن الزيادة تبقى اكتر او اقل من 5 درجات فى العربيات التانية

MMamdouh

**wlng76** · 11-11-2007 01:22 PM

الموضوع دا هام ومحتاج يتثبت للمنفعة العامة, لإن فعلا دايما لما تظبط ضغط الكاوتش فى أى مكن بيكون الضغط فيه زيادة, ولازم كل واحد يكون عنده مقاس بتاعة وفى عربيته علشان يتجنب مشاكل الضغط الزيادة, والمقاس انا اشتريته م سوق التوفيقية من محل هناك اسمه ممدوح غطاطى, وشكله زى القلم وصغير جدا وثمنه (8 جنيه) فقط.
يا ريت كل عربية يكون فيها واحد او اثنين علشان التأكيد.