الموضوع: ايه اخبار عزل الصوت فى الجين تو؟

السلام عليكم
انا بافكر جديا اشترى عربية جين تو بعد ما تعبت من واتعبت السوبر فيورا حمالة الاسية . بس بعد قراءة مستفيضة لمعظم مواضيعكم فى قسم البروتون ملقيتش حد بيتكلم عن عزل الصوت داخل السيارة .. هل هو وحش ولا معقول ولا جيد؟
- ثانيا ماهو تعريفكم لعبارة عفشة رياضية ناشفة؟؟ هل معنى ذلك انى هاحس بكل زلطة او طوبة اعدى عليها بالعربية بس مقابل كده انها هتستحمل بهدلة شوراعنا فى اسكندرية ( ايوه انا اسكندرانى) علشان لو هوه ده معنى العفشة الرياضية فده يبقى حاجة وحشة بالنسبة لى ، لانى عاوز محسش باى حاجة جوه العربية لا صوت موتور ولا صوت خارجى ولا مطبات صغيرة ولا زلط وحصى ينططنى جوه العربية زى ماكان بيحصل معايا فى بعكوكتى الفيورا 127 اللى كانت عاملة زى الكرنك الحديد ابو بدالات القديم بتاع زمان .
انتم فاهمينى ؟؟ انا مش عاوز اجرى واشد واسحب واعمل غرز انا عاوزحاجة ملوكى تنسينى بهدلة العربيات الصغيرة القديمة .. فهل لديكم مبتغاى يا بروتوناوية ولا تقترحوا ايه ؟

ثالثا واخيرا.. ايه نظام تقسيط البروتون الجديد فى اسكندرية ؟ انا معايا 90 الف بس بصراحة مش ناوى احط فلوسى كلها فى العربية علشان عندى التزامات تانية .. لكن ممكن ادفع 25 او 30 الف مقدم وقسط شهرى حتى 2500 جنيه .. بس معنديش مفردات مرتب .
وكنت ناوى اضغط على نفسى واشترى اسبرانزا 113 او حتى هيونداى I10 كاش بس لقيتهم مش قد كده
هاه شايفين ايه ؟ اشترى جين تو ولا تويوتا كورولا موديل 99 ولا 2000 ولا استنى قانون احلال الملاكى وابيع الفيورا بتاعتى للحكومة بثلاثة الاف جنيه واشترى توك توك ؟