حراميه على فسبه خبطهم بس للأسف هربوا:(

السلام عليكم
انا من امبارح وانا مضايق جدا
نزلت باليل اروح مشوار في شارع فيصل شارع العجايب المهم دخلت شارع موازي لفيصل ومتعامد على شارع العريش هو شارع رئيسي برده المهم
وانا ماشي بالعربية في امان الله سمعت صوت من ورايا عمال يقول حرامي حرامي حرامي
بصيت في المرايه لقيت 2 راكبين على فسبه جايين ورايا بسرعة الصاروخ والراجل بيجري وراهم يحاول يحصلهم فجأه بدون ما أشعر وهما بيطلعوا من يميني لقيت نفسي بحدف عليهم جامد بالعربيه وفعلا خبطهم خبطه محترمه خليتهم انحرفوا وكادوا ان يقعوا من على الفسبه لولا انهم سندوا نفسهم تاني وعدلوا الفسبه وطاروا كسروا عندي المرايه وبوظوا الباب بس مش ده اللي مزعلني انا اللي مزعلني انهم ما وقعوش
ولقيت بأه الناس في الشارع اللي يقولي طالما خبطهم ماخبطهمش جامد ليه واللي يقولي والله انت راجل تمام بس بصراحه الموقف كان سئ جدا والراجل اللي اتسرق الناس واقفه تتفرج عليه ربنا يعوض عليه
بتخيل بأه لو الحراميه دول كانوا وقعوا كان ايه اللي ممكن يحصل
الله اعلم كان ممكن ينزلوا يعوروني ولا الشعب بتاعنا كان هايتلم عليهم ياكلهم علقه لحد ما يبانلهم صاحب مع العلم ان الشارع كان زحمه
طيب لو كانوا وقعوا وحد فيهم اتعور ولا مات ساعتها انا كان هايبقى ايه موقفي برده مش عارف انا حطيت نفسي مكان اللي اتسرق واتصرفت كده لله بس مش عارف هل انا صح ولا غلط
الحمد لله انها جت على اد كده

اخى العزيز
ما تندمش عللى الللى عملته ابدا
لانك لو ما خدتش ثواب
اكيد الراجل اللى اتسرق دعا لك
واكيد ان التلفيات اللى حصلت لك ربنا هيعوضها لك
الجزء التانى
ان لو قاموا من الوقعة
انت اقفل زجاجك ومسوجرك
ومحدش هيعرف ييجى ناحيتك
ولو ازنقت وكنت لوحدك ممكن وهما طبعا معاهم سلاح تبعد بعربيتك

انت عملت صح الصح
الحرامى فى الوقت دة بيكون فى شدة الخوف
وان شاء الله ثوابك عند ربنا لانك كنت بتحاول
توقف حاجة غلط انها تحصل والف شكر ليك يا باشا
على الموقف الرجولى

يا راجل هو انت الى خبطهم
اصل انا كنت فى شارع العريش عند بتاع العصير الى واخد ناصية ده و فعلا كان شاب كده بيجرى و يقوول حرامى حرامى و الناس كلها عمالة تجرى مع الشاب ده و بعديها بحبه كده لقيت ناس بتتكلم بتقول كان حيتمسك ابن التييييييت ده راجل ابن حلال كان حيوقعهم بس ولاد التييييت دول جريوا

الى انت عملته صح و ربنا يكرمك ان شاء الله و انت عشان راجل محترم عملت كده و مكنتش تقلق دول مجرد انهم وقعوا مكنوش حيشوفوا النور تانى يعنى محدش كان حيلمسك :)

انت عملت صح الصح

اللي انت عملته صح من ناحية الشهامة اللي قلت جدا في مجتمعنا لكن من الناحية القانونية ممكن تسأل عليها لو كان الواد وقع ومات مثلا؟؟

لكن انا لو في نفس موقفك كنت هاعمل كده برضه

شكرا على مروركم يا شباب بس فعلا الشارع في مصر ما بقاش فيه أمان خالص

اكيد اللي انتت عملته ده صح 100%
ربنا يكتر من أمثالك ويعوضك خير عن تلفياتك

واللـــــــــــــــــــــ ه العظيم راجــــــــــل من ضهر راجـــــــــــــل

أنك ضحيت بالعربية علشان ترجع حق واحد انت تعرفوش

اكيد ربنا هيعوضك خير ده شيء مافيهوش كلام:hlopaet_prv::w6266d

لا تتردد فى فعل الخير , لو قابلك موقف زى كده تانى قوى قلبك و خليها على الله .

و انا بشكرك على الموقف ده |.

شكرا على الإطراء يا شباب والله رفعتوا من روح الواحد المعنويه الواحد خلاص في طريقه لليأس من البلد دي

والله جدع

زي ما كتير من الأخوة الأعضاء قالوا لك، اللي أنت عملته ده صح الصح.

تفتكر الحرامية دول هيسرقوا تاني وقلبهم متطمن؟
لو سرقوا تاني هيبقوا خايفين من واحد زيّك كده يلطشهم بالعربية.
لو ناس كتير عملت كده الحرامية هيفكروا ألف مرة قبل ما يسرقوا.

الفكرة ان كل ما الناس بقيت سلبية وتخاف على نفسها وبس، كل ما الحرامية اتجرأوا لأنهم عارفين ان محدش ح يعملهم حاجة.

ربنا يباركلك

رجولة

والله العظيم انت راجل تمام
وعلي فكره لو حد منهم كان مات ماتقلقش مافيش خوف عليك
علشان حصلت مع اخويا زمان
وخبطهم وهما راكبين موتوسيكل واحد منهم وقع علي سن الصيف ومات والتاني اتمسك
المهم بس الواحد يعمل اللي عليه علشان وقتها اصلا الناس كلها واقفه بتتفرج والحرامي معدي جنبهم (حسبي الله ونعم الوكيل)
واهم شيء انك بخير
وبأذن الله ربنا هيعوضك خير

ربنا يعوضك خير عن الضرر اللى انت اتعرضله

لا املك الا اني احييك
بجد
:)

خير ما فعلت وربنا يعوض عليك في خسائر العربية

ربنا يباركلك ويحميك من كل سوء وإن شاء الله ربنا يعوض عليك خير

تصرف كويس و انت عملت اللي عليك وزيادة ..
بس اللي بيقولك مادام خبطهم كنت اخبطهم جامد ده ياريتك دهسته قبل ما تمشي ..

اقتباس:

---

المشاركة الأصلية كتبت بواسطة wisambasha

اللي انت عملته صح من ناحية الشهامة اللي قلت جدا في مجتمعنا لكن من الناحية القانونية ممكن تسأل عليها لو كان الواد وقع ومات مثلا؟؟

لكن انا لو في نفس موقفك كنت هاعمل كده برضه

---

معلش يا وسام اسمح لي اختلف معاك
لو كان الواد مات ووقع مكانش هيحصل للزلباني حاجة لانه كان في حالة دفاع شرعي
على فكرة يا جماعة الدفاع الشرعي يكون عن النفس والمال وعن نفس الغير وماله وعلى فكرة كل شروط حالة الدفاع الشرعي كانت متوافرة في هذه الحالة

ومتقلقش يا زلبانى ما دام المنطقة حية يعني فيها ناس حتي لو كان العيال دي وقفت ورجعت لك مكانتش هاتلحق تلمسك لان في موقف زي ده هتلاقي كل الشارع بيساند بس لو في حتة مقطوعة منصحكش تعمل كدة طبعا اخرك تاخد الراجل الغلبان المسروق توصله للقسم وتشهد معاه او تاخد رقم الموتوسيكل وغالبا هايبقي من غير نمر او مسروق

اللي أنت عملته ده صح الصح.

ياخى والله انا ليا ليا الشرف انى بسيب تعليق فى موضوعك ومش هاقول اكتر من كده

ميه ميه والله مش مشكله عربيتك انت اخدت ثواب يجيبلك 1000000 عربيه فى الجنه ان شاء الله

الاشكال ده بيتشوه صوره كل الي راكب فسبا مثلي وربنا يسترها

اقتباس:

---

المشاركة الأصلية كتبت بواسطة vespa200

الاشكال ده بيتشوه صوره كل الي راكب فسبا مثلي وربنا يسترها

---

بصراجه معاك حق 90% من الناس بيخافوا من اللى راكبين فسب او راما لان معظم الناس ده فعلا اخلاقهم مش كويسه بس مش كلهم طبعا وزى مابيقولوا الحسنه بتخص والسيئه بتعم

اللى انت عملتة صح وربنا يعوضك خير

اقتباس:

---

المشاركة الأصلية كتبت بواسطة cairo2005

معلش يا وسام اسمح لي اختلف معاك
لو كان الواد مات ووقع مكانش هيحصل للزلباني حاجة لانه كان في حالة دفاع شرعي
على فكرة يا جماعة الدفاع الشرعي يكون عن النفس والمال وعن نفس الغير وماله وعلى فكرة كل شروط حالة الدفاع الشرعي كانت متوافرة في هذه الحالة

ومتقلقش يا زلبانى ما دام المنطقة حية يعني فيها ناس حتي لو كان العيال دي وقفت ورجعت لك مكانتش هاتلحق تلمسك لان في موقف زي ده هتلاقي كل الشارع بيساند بس لو في حتة مقطوعة منصحكش تعمل كدة طبعا اخرك تاخد الراجل الغلبان المسروق توصله للقسم وتشهد معاه او تاخد رقم الموتوسيكل وغالبا هايبقي من غير نمر او مسروق

---

على فكرة كويس ان حضرتك اثرت النقطة دى
لان لازم ناخد بالنا من حاجة
ان الدفاع عن النفس او الغير بيكون لحد معين وهو وقف الاعتداء
يعنى
واحد هاجمنى بسلاح
انا ممكن اهاجمه لحد ما اوقف اعتدائه
لكن بعد كدة لو انا هاجمت
هبقى انا اللى غلطان
يعنى مثلا واحد معاه سلاح بيهاجم بيه وانا خدت منه السلاح وشليت حركته
كدة دفاع عن النفس
لكن لو ضربته بعد كدة بالسلاح ابقى مش دفاع شرعى

اقتباس:

---

المشاركة الأصلية كتبت بواسطة cairo2005

معلش يا وسام اسمح لي اختلف معاك
لو كان الواد مات ووقع مكانش هيحصل للزلباني حاجة لانه كان في حالة دفاع شرعي
على فكرة يا جماعة الدفاع الشرعي يكون عن النفس والمال وعن نفس الغير وماله وعلى فكرة كل شروط حالة الدفاع الشرعي كانت متوافرة في هذه الحالة

ومتقلقش يا زلبانى ما دام المنطقة حية يعني فيها ناس حتي لو كان العيال دي وقفت ورجعت لك مكانتش هاتلحق تلمسك لان في موقف زي ده هتلاقي كل الشارع بيساند بس لو في حتة مقطوعة منصحكش تعمل كدة طبعا اخرك تاخد الراجل الغلبان المسروق توصله للقسم وتشهد معاه او تاخد رقم الموتوسيكل وغالبا هايبقي من غير نمر او مسروق

---

انا مع موقف الزلاباني تماما لكن انا فقط باحاول افكر واسرد ما كان سوف يحدث اذا الواد وقع ومات مثلا. هاتلاقي نفسك دخلت في س و ج و قسم ونيابة وتحقيق والمشكلة انك في البلد دي ما بتعرفشي تاخد حقك بسهولة وانما وقتك هايضيع ومش بعيد تلاقي اهل الواد (ده لو كان له اهل اصلا) بيطاردوك لانهم هايكونوا عرفوا بياناتك من المحضر في القسم
انا مش معني كلامي اني بارفض تصرفك يا زلابانى انا بس بافكر من الناحية القانونية في البلد اللي ماشية بمزاجها دي

انا هاقول موقف حصلي انا شخصيا وحاول تستفيد من كلامي

من شهر (قبل رمضان) كنت راكن عربيتي في ش محمد فريد بوسط البلد امام بنك مصر مباشرة وانا بافتح باب العربية (ناحية الكرسي الامامي بجانب السائق) فوجئت بعيال صغيرة (4 عيال اكبر واحد فيهم ما يزيدش علي 12 سنة) راكبين موتوسيكل 3 عجلات بصندوق خلفي (الكارو الجديد زي ما باسميه) وجايين عليا بسرعة لدرجة انهم كانوا داخلين فيا انا سخصيا لكن انا فاديت نفسي وانحرفت بشدة الي الداخل (لصقت نفسي في عربيتى) والعيال بتطوح بالموتوسيكل ومش قادرين يسيطروا عليه واخر انبساط وضحك. وراحوا لابسين في العربية اللي قدامي (عربية راكنة في امان الله ومتغطية زي الفل) :_Alshmokh08[1]:

العيال نطوا بسرعة وجريوا وسابوا الموتوسيكل لكن انا بسرعة قدرت اجيب واحد منهم من قفاه
وكذللك امين الشرطة حراسة بنك مصر جري ومسك واحد تاني

العيال فضلت تبوق وتقول سيبونا احنا ماكوناش سايقيين وكلام من ده كتير :Zb_sor1[1]:
الامين كلم الدورية الراكبة وبلغهم وانا فضلت قافش في الواد مش عاوز اسيبه وقام حد من العيال مكلم ابوه من الموبايل اللي معاه ولقيت راجل ومعاه 3 ستات جم بسرعة وعاوزيننا نسيبهم وقالوا احنا قرايبهم (ابو واحد منهم ومعاه خالاته) وطبعا بعد مجادلات مع الامين ومعايا (انت مالك يا استاذ هي العربية اللي اتخبطت تخصك احنا هانعوض صاحبها مالكشي دعوة انت) واحنا لازلنا في انتظار الدورية الراكبة

الامور تطورت الي البلطجة و استخدام القوة بالايدي و التطاول علي الامين بالزق و التهديد لدرجة انهم وقفوا تاكسي وكانوا هايركبوا العيال بالقوة

انا لما شفت الامور وصلت الي هذا الحد رحت مبلغ النجدة من الموبايل وهولت في وصف الامور لدرجة اني قلت انهم فتحوا مطواة علي الامين وفي لحظات لقيت سيارة النجدة وصلت والامور دخلت في س و ج وبطاقتك وووو المهم ان اهل العيال اخدوا اللي فيه النصيب من السباب والشتائم القذرة من ضابط المباحث (الارح) علي حد تعبيرة :verygood:
والامور انتهت الي ان العربية اللي اتخبطت طلعت بتاعة موظف في البنك سابها وركب باص البنك وسافر المصيف والضابط اخذ بيانات بطاقة ابوا الواد وطلب من امين الحراسة ان يتابع مع صاحب العربية لما ييجي ويبعت للاب (اللي ماعرفشي يربي ابنه ولا حتي نفسه) علشان يعوضه ويصلحهاله

الموضوع خلص لكن انا عاوز اقول اني وقفت لاخر لحظة وعطلت نفسي علشان اجيب حق واحد مش موجود وكان ممكن الموضوع ده يحصلي انا شخصيا مش بس لعربيتي

تفتكر لو كان ده حصل كان هايبقي السيناريو ايه بقي :shine[1]:

اللي انت عملته صح الصح .
صح لانك قيمة ايجابية في مجتمع تفشت فيه السلبية
و صح ليك شخصيا لانك حتشعر بالفخر لنفسك .. و مستقبلا هذا الشعور سيجعلك لن تتردد لحظة عن فعل الصواب في اي موقف مشابه
و صح .. لأن ثوابك كبير عند ربنا سبحانه و تعالي .. و اللي خلق الانسان اللي اتسرق قادر علي تعويضه و تعويضك عن الخسارة ..و قادر يسخر لك من تحتاجه في مواقف مشابهة
--------
ربنا يكتر من أمثالك :)

طبعا صح اللى عملتة دة هو اللى صح
و على فكرة الحرامى الي يسرق معندهوش الجراة انة يمسك سلاح و يدافع بية عن نفسة لانة بيبق خايف و همة كلة انة يهرب لانة عارف لو اتمسك هايحصل اية
لو كان كدة كان ممكن يمسك سلاح و يسبت اى حد و ياخد فلوسة فى اى حتة مافيهاش ناس و ظلمةو مش محتاج يجري
اصل الحرامية انواع
انا حصل معايا موقف
واحد سرق الموبيل من العربية و جري
و قفنا و جرينا وراة و قلنا حرامى
و حظة السى دخل فى شارع فية قهوة
و عينك ماتشوف الا النور
و خد علقة محترمة
وراح القسم و تعملة محضر
جزاك اللة خيرا على الى انتة عملتة
و ان شاء اللة السيارة هاترجع احسن من الاول

اول قدر الله ما شاء فعل