الموضوع: بركووووووولى و عندك واحد سيراتو كمان

السلام عليكم
يمكن ده اول موضوع أكتبه هنا فى قسم كيا
و الحمد لله ربنا وفقنا فى كيا سيراتو 2010 اول فئة اوتوماتيك LX إستلمتها من عند الطارق كارفور ب105 الف و هى سعرها الأساسى 103 الف بس إحنا كنا مستعجلين

انا إستلمت العربية يوم الأربعاء اللى فات و رخصت النهاردة و مشيت بيها 300 كيلو

التقييم المبدئى إنها بجد عربية بتحب الجرى و لازم تسيطر عليها و إستهلاكها فى البنزين أعتقد انه معقول يعنى نص التنك تقريبآ 25 لتر عملت بيهم 300 كيلو فى وسط البلد فقط و التكييف معظم الوقت شغال و المفروض إنه يقل مع الوقت

بالنسبة الكماليات العربية
- تكييف بكر
- سنتر لوك بدون ريموت
- باور
-4 زجاج كهرائى
- مرايات كهرباء
-كاسيت سى دى و مدخل AUX
- فتح الشنطة و التنك من الداخل
- جنط حديد 15 وعجل 195/65

المميزات اللى حسيتها لحد دلوقتى
- الهدوء من ناحية الموتور و عزل الصوت ممتاز
- الإتساع الداخلى و بصراحة انا مش عارف إزاى فيه ناس شايفة العربية ضيقة مع العلم ان طولى متر و 80 سم و بقعد قدام فارد رجلى و بنزل أقعد ورا رجلى مش بتبقى خابطة فى الكرسى
- الثبات مع العلم انى لسه مزودتش عن 120 كم/س بس انا حسيت إنها ثابتة خصوصآ فى المطبات
- التكييف كويس جدآ يعنى مش بحتاج أجيب المروحة على 3 و بشغله على 2 معظم الوقت

العيوب
- الكاسيت يبقرا Audio فقط و الحمد لله إن عندى MP3 Player غير كده كنت لازم هفكر فى تغييره
- العفشة ناشفة شوية بس بدأت تنعم معايا و أتمنى انها تبقى أنعم من كده

يمكن دى الحاجات اللى لاحظتها لحد دلوقتى نظرآ انى لسه جديد معاها

و النهادرة رحت مركز الخدمة عشان أتفرج على المكان و اسأل عن مواعيد الصيانة
بجد مكان جميل جدآ وأتمنى انه يكون على نفس مستوى الكلام هنا

طبعآ الشكر لكل رجالة الكيا و بالأخص الأستاذ احمد سامى على التقرير المفصل

مبروك ياباشا