العربية ديه أنا بعشقها من زمان أوي... و دايما كنت بتمنى أمتلك واحدة منها...
و أخيرا... وفقت في واحدة منها... كانت خارجة من شركة سياحة.... و عملت كل الاجراءات عشان أحولها لملاكي ... (اتعذبت لمدة 40 يوم بين 4 وحدات مرور غير مصلحة الجمارك.. و مصلحة الضرائب...و طيعا كانت العربية مركونة طول المدة ديه لأنها كانت بدون لوحات)
العربية اللي بتكلم عنها.... هي تويوتا لاند كروزر 70 ... أو HZJ-75 و ديه هي النسخة الصحراوية من اللاند كروزر....
و يوجد منها عدة فئات...
أشهرهم الشاسيه الطويل... بابين قدام... و بابين ورا بالطول....
تلاقي العربية ديه منتشرة جدا في جنوب سيناء و الغردقة و هي الأفضل في الصحراء و الطرق الوعرة و الرملية.... الا أنها غير مريحة على الأسفلت زي باقي العربيات....
نظام التعليق بتاعها عبارة عن سوست ورقية قدام وورا... (زي نظام النقل بالظبط)
من أول موديل 2000 باقت السوست ورقية من ورا بس... و من قدام حلزونية....
الكاوتش 235/85/16
موتورها 4200cc ديزل 6 سلندر... على فيتيس 5 نقلات + فتيس غرز.... (و على فكرة... الموتور ده هو نفس موتور الباص الكوستر و اسمه 1HZ)
تقسيمة الصالون... كرسي السائق و جمبه كنبة صغيرة...
وورا فيه كنبتين بالطول قدام بعض....
طبعا من المعروف أن الديزل مش بيجري على السرعات الصغيرة (و الكلام هنا على الديزل العادي مش التيربو ديزل...)
بس طبعا بعد ما بتجمع سرعة... بتجري جامد.... و ان كان مش مستحب الجري بالعربيات ديه... لارتفاعها الكبير... و عدم ثباتها في السرعات العالية...
العربية كاستهلاك للوقود بتعمل حوالي 150 كم في الصفيحة... بس في النهاية... مش فارقة كتير في التكلفة عن البنزين... لأنها بتحتاج لتغيير الزيت كل 1500 كيلو عشان تحافظ على موتورك بحالة جيدة دائما (طبعا فيه شركات بتغير كل 5000 كيلو) دا غير الفلاتر (فلتر زيت و فلتر جاز) و دول بيتغيروا كل 3 غيارات زيت (يعني حوالي 4500 - 5000 كيلومتر)
الزيت المستخدم بيكون Delvac MX و ده بيكون أغلى من ال Delvac العادي.... و أفضل...
سعر الجركن ال20 لتر بيكون 260 جنيه.... و العادي بيكون 210 جنيه
الجركن ال20 لتر بيكفي تقريبا مرتين (العربية بتاخد في المرة 10 لتر و نصف زيت)
أنا عامل الموضوع ده عشان عارف أن العربية ديه مش منتشرة في القاهرة... و مفيش معلومات كتيرة عنها... فحبيت أشارك معاكو التجربة و المعلومات...
و ديه صورة للعربية من على الانترنت