الموضوع: @@ بولش بلون العربيه وجهاز Black&Decker للتلميع (تجربة) @@

المشاركة الأصلية كتبت بواسطة saif3s

الاخ ابو عبد الله شكرا لك على الموضوع
البوليش simoniz انا بستخدمه اللون الاسود من اكتر من 7 شهور واكثر من رائع وكنت بلمع العربيه كل شهر وكانت بتبقى علقه محترمه وكمان لو فى خدش ظاهر كنت باخد منه واحطه غلى الخدش وامسحه تانى يوم بيبقى شبه مش موجود
وانا شفت الجهاز من اكتر من شهرين فى الهيبر وكنت بخاف اشتريه الا لما اسئل حد وكمان انا كنت بشوف السعر بتاعه 375 مش 275 جم
المهم النهارد بعد ما قريت موضوعك رحت اشتريته (كده فاضل واحد بس الباده بتاعته مش مضبوطه) ولمعت على السريع الكبوت والرفارف اللى قدام طبعا بيفرش البوليش افضل بكتير مجهود اقل فى فرش البوليش والتلميع لكن برضه بتبقى تاخد تلميعه خفيفه بالفوطه الميكرو فايبر
وانا لا استخدم اى فوطه زفره ولا بشيل التراب بأى حاجه بس التلميع مره كل شهر وعندى ماكينه ضغط مياه زى اللى فى البنزينه اسمها كأرشر وهى صغيره الحجم ولها مدفع مياه بضغط عالى بعمل بيها مره او مرتين فى الاسبوع والتنشيف بفوطه جلد غزال
وده من ساعت ما أشتريت العربيه

جزاك الله كل خير
هو الجهاز اول ما نزل في هايبر من فتره كبيره كان سعره 275 وبعد كده غلوه لـ 375
وتقريبا لما تبقى منه كذا قطعه عملوا العرض ده
بس يا خسارة ان مفيش الا جهاز واحد بس باقي والبادة بتاعته مش مظبوطة

اما عن موضوع ما بعد البولش فده اكيد لازم بيبقى بأي حاجه عامله زي القطن
يعني لفوطة ناعمه او قطن او انا بعمل شئ اخر الا وهو
المناديل المعطرة او مناديل التابلوه اللي بتنظفه وتلمعه بعد ما بستخدمها بجمعها واغسلها بكلوركس الوان وبعديها بتبقى ممتازة للحاجات اللي زي كده
انا بستخدمها في ازالة البولش بعد ما بينشف على العربيه
وبعد كده بغسلهم تاني برضه وهكذا

اما بخصوص ماكينة الغسيل كارشر
فانا من زمان نفسي في واحده وكل ما اروح هايبر اقعد احوم حواليها
وهيا الماني محترمه طبعا ومن اشهر الماركات في هذا المجال
بس انت جبت انهي واحده وبكام وهل الضغط ميه ميه ولا برضه على اده

وانا برضه مش بغسل غير بالأسفنجة بتاعت العربيات والفوطة بتاعت جلد الغزال دي
اما ازلة التراب فبعمل الفرشة بتاعت العربيات بزيت جونسون بتاع الاطفال جميل جدا ورائحته جميل كمان وبيبقى ناعم على العربيه فعلا

وشكرا لك