لينيا (بعد العرض دا) ولا النترا؟

**ainshouka** · 06-10-2009 02:59 PM

المشاركة الأصلية كتبت بواسطة mohamed_momi88

ياجماعه العربيات الاوربي كلها مش اللينيا بس اللي عايز يجيبها يبقي ياخد باله انه ميهنهاش يعني يعمل صياناته في مواعيدها يحافظ علي العربيه ميطنشي في تغيير الزيت و الاعطال لان التكنولوجيا كتير و احنا مش اقل من الناس اللي برة لية بنخاف من التكنولوجيا

الموضوع مش حكاية احنا اقل من حد او كده

بس الحكاية كلها ان فى اوروبا العربيات دى عادية هناك واى مشاكل تظهر تتصلح علطول فهى مش عاملالهم اى مشاكل

لكن احنا عندنا فى مصر هنا التوكيل -اى توكيل- بيفتخر انه مركبلك فى العربية اير باج فيبتدى يحسسك انه بيمن عليك ويطلع عينك فى الصيانة لو حصل اى حاجة على اساس انك طالما اشتريت عربية فيها ايرباج يبقى انت زبون حلو ليهم

فمش عشان العربية رخصت ونزل سعرها وبقت فى متناول ايدى طبقة كبيرة من الناس يبقى هى كده كويسة لان عربية زى دى لو عطل فيها حاجة يبقى حرام توديها لحد من الميكانيكية بره عشان يكشفلك عليها فلازم تروح بيها على التوكيل

ومين اللى يقدر يروح التوكيل كل شوية عشان حصل اى عطل يبقى كده عاوزة مصاريف تانية لوحدها

ومش حقول طبعا ان العربية حتكون كل شوية فى التوكيل بس المرة الواحدة اللى ممكن تروح فيها حتكلفنى اد ايه - خاصة ان اى توكيل بيبصلك على انك زبون-

والموضوع مش موضوع خوف من تكنولوجيا ولا حاجة الموضوع انك بتقعد كام سنة عشان تحوش قرشين تجيب بيهم عربية تغنيك عن بهدلة المواصلات
يعنى مش كل شوية حقعد اصرف عليها (حتى من غير ميحصلها اى اعطال ممكن يكون الاكسسوارات بتاعتها غالية يعنى لو جه واحد غبى خبطك من ورا مثلا حتكلفك اد ايه) - وخلى بالك الفيات متعقد منها بسسب العربيات اللى مش منتشرة فبتغلب عما تجيب لها اكسسواراتها او يا اما تروح للتوكيل اللى بيعتبرك زبون ليهم-

يعنى انا لما افكر اشترى عربية مش حفكر حتى يكون فيها مرايات كهرباء عشان مبقاش محوج للتوكيل فى اى حاجة
لكن عربية سهل تصليحها وتكنولوجيا مش معقدة وبسيطة تاخدنى وتودينى مشاويرى كده يبقى قشطة وابوس ايديا وش وضهر كمان

فطبعا لو انت معاك فلوس وتقدر على العربية عند وبعد الشراء يبقى خلاص اشتريها وارشحها كمان لانها عربية حلوة وفيها مميزات كتير جدا وجميلة

**bahaahssn** · 06-10-2009 04:26 PM

لو بتتكلم عن الأعتمادية يبى اتكلم عن اليابانى و سيبك من الكورى خالص
و على فكرة الايطالى مينفعش يقارن بالفرنسى ده حاجة و ده حاجة تانية خالص
و على فكرة انا بقالى حوالى شهر بجمع معلومات عن العربية اللينيا و مشاكلها و الحمد لله لحد النهاردة ملقيتش عيب واحد خاص بموتور او اجزاء ميكايكية و فى كل العالم بيقولوا عليها اعتمادية جدا كمان
و اقول لحضراتكم المشاكل اللى ظهرت فيها رغم انها اتحلت
1- لو رفعت الكرسى لفوق و انت قاعد عليه و نفس الوقت بتطلعه لقدام مبيتحركش خالص و طبعا للى عارف دى حركة صعبة جدا
2- حزام الأمان الخلفى يمين مبيقفلش فى السوكت اللى قريب منه بيتقفل فاللى بعديه
3- لو عايز تغير حاجة فى نظام البلو اند مى عن طريق الفلاشة لازم تكون الفلاشة فاضية خالص الأ للحاجة اللى انت عايز تغيرها بس
4- العربية بتنزل برة بحساسات مطر و حساسات اضاءة و منزلوش مصر بيهم
لعدم ملائمتهم للأجواء المصرية
5- برة مصر بتنزل من غير تصفيح فى مصر بتصفيح كامل عشان شوارعنا
6- فى الفئة اللى فيها الكنبة بتتشال خالص و تطبق العملية دى صعبة جدا و مجهدة و محتاجة تتدرب عليها مرتين تالاتة كده
7- الحديدة اللى بتمسك الكبوت لما تفتحه بتتفك و تتركب لو فتحت الكبوت و شيلتها يبقى لازم تعمل حاجات كتير عشان تفتح الكبوت
8- قفلت الشنطة تقيلة عشان على اتنين مساعدين غاز

و ديه كل العيوب اللى لقيتها للعربية و بكل امانة و ده من على منتديات تركية و اسبانية و هندية و برازيلية

نقطة كمان العربية مصممة عشان صيانتها تكون كل 15000 كيلو مش 5000 زى الألنترا و السيراتو , و للى مش مصدقنى يكتب fiat linea service interval و يعمل سيرش على جوجل و هوة يعرف صيانتها برة مصر كل قد ايه
و على فكرة البرازيل و الهند حر زى عندنا بالظبط .

**Samah AbdAllah** · 06-10-2009 04:41 PM

فيات لينيا وانتظم فى الصيانة ولو هى انهاردة جديدة ومش منتشرة محدش عارف بكرة ايه

**abohalmos** · 06-10-2009 05:25 PM

المشاركة الأصلية كتبت بواسطة bahaahssn

لو بتتكلم عن الأعتمادية يبى اتكلم عن اليابانى و سيبك من الكورى خالص
و على فكرة الايطالى مينفعش يقارن بالفرنسى ده حاجة و ده حاجة تانية خالص
و على فكرة انا بقالى حوالى شهر بجمع معلومات عن العربية اللينيا و مشاكلها و الحمد لله لحد النهاردة ملقيتش عيب واحد خاص بموتور او اجزاء ميكايكية و فى كل العالم بيقولوا عليها اعتمادية جدا كمان
و اقول لحضراتكم المشاكل اللى ظهرت فيها رغم انها اتحلت
1- لو رفعت الكرسى لفوق و انت قاعد عليه و نفس الوقت بتطلعه لقدام مبيتحركش خالص و طبعا للى عارف دى حركة صعبة جدا
2- حزام الأمان الخلفى يمين مبيقفلش فى السوكت اللى قريب منه بيتقفل فاللى بعديه
3- لو عايز تغير حاجة فى نظام البلو اند مى عن طريق الفلاشة لازم تكون الفلاشة فاضية خالص الأ للحاجة اللى انت عايز تغيرها بس
4- العربية بتنزل برة بحساسات مطر و حساسات اضاءة و منزلوش مصر بيهم
لعدم ملائمتهم للأجواء المصرية
5- برة مصر بتنزل من غير تصفيح فى مصر بتصفيح كامل عشان شوارعنا
6- فى الفئة اللى فيها الكنبة بتتشال خالص و تطبق العملية دى صعبة جدا و مجهدة و محتاجة تتدرب عليها مرتين تالاتة كده
7- الحديدة اللى بتمسك الكبوت لما تفتحه بتتفك و تتركب لو فتحت الكبوت و شيلتها يبقى لازم تعمل حاجات كتير عشان تفتح الكبوت
8- قفلت الشنطة تقيلة عشان على اتنين مساعدين غاز

و ديه كل العيوب اللى لقيتها للعربية و بكل امانة و ده من على منتديات تركية و اسبانية و هندية و برازيلية

نقطة كمان العربية مصممة عشان صيانتها تكون كل 15000 كيلو مش 5000 زى الألنترا و السيراتو , و للى مش مصدقنى يكتب fiat linea service interval و يعمل سيرش على جوجل و هوة يعرف صيانتها برة مصر كل قد ايه
و على فكرة البرازيل و الهند حر زى عندنا بالظبط .

يا جماعة عايزين شوية معلومات عن لينيا بالماتور العادى مش التربو

هل اولا موجودة فى موديل 2009 و لا الموديلات القديمة بس ؟؟؟؟؟؟؟
خصوصا ان مش كل الناس بتاعة شد و جرى فيه ناس برضه عندها اسرة و بتمشى بالراحة عشان المدام و الاولاد (زيى كده

) و برضه فيه فرق فى السعر مش قليل للناس اللى فاتحة بيوت و لا ايه ؟؟؟؟؟؟؟

2- نوع الوقود المستخدم للماتور العادى لانه مكتوب هنا نسبة الانضغاط 1:11 و ده معناه انها تاخد بنزين 95 على الاقل مش كده ؟؟؟؟؟؟؟؟؟؟

3- المرايا بتاعة العربية سواء التربو او العادية تحس انها طالعة لبرة اوى و بارزة عن العربية يعنى ممكن تتخبط بسهولة فى الزحمة صح و لا ايه يا جماعة ؟؟؟؟؟؟؟ يعنى اقصد المراية بتتقفل ممكن و لا تفضل مفتوحة كده على طول ؟؟؟؟؟؟؟

4- الماتور العادى بتاعها بيدى 77 حصان طب ده مش قليل عليها لو معاك ناس و مشغل التكييف و كده ؟؟؟؟؟؟؟؟؟؟؟ مع العلم انى عمرى ما بمشى اكتر من 120 كم و مش بتاع سحب و جرى و شد و كده و كمان موضوع 8 صباب يعنى زى تقريبا الافيو ........ محتاجين شوية معلومات عن قدرات الماتور ده و يا سلام لو حد عنده الموديل ده و يخبطنا تقرير من اللى هوا

5- شكرا مقدما

**bmw3m007** · 06-10-2009 05:34 PM

هات بيهم بولو الشكل الجديد 2010
ادخل على جوجل بس و اكتب بولو 2010
و اتفرج و قولي رأيك
اصل انا عايز اشتريها d:

**tarekabosdera** · 06-10-2009 07:23 PM

المشاركة الأصلية كتبت بواسطة bahaahssn

لو بتتكلم عن الأعتمادية يبى اتكلم عن اليابانى و سيبك من الكورى خالص

نقطة كمان العربية مصممة عشان صيانتها تكون كل 15000 كيلو مش 5000 زى الألنترا و السيراتو , و للى مش مصدقنى يكتب fiat linea service interval و يعمل سيرش على جوجل و هوة يعرف صيانتها برة مصر كل قد ايه
و على فكرة البرازيل و الهند حر زى عندنا بالظبط .

سيبك من الكوري خالص ... اسمحلي ده كلام خاطئ 100% .لازم تحدد اي نوع من الكوري بالظبط.
انت ممكن تعرف مستوى اعتمادية هيونداي في التقارير والتقييمات العالمية وصل فين وهتعرف انا بقول ايه.
انما غير الهيونداي قد يكون معاك حق.

ثانيا الالنترا الصيانة بتاعتها كل 15000 كيلو مش كل 5000 كيلو وده اللي مكتوب في الدليل وده اللي معظم الناس بتعمله.

**bahaahssn** · 06-10-2009 08:31 PM

بس حضرتك اقولك على حاجة كان عند ابن عمى الينترا 2006 و كانت ماشية 60.000كم و كنت حاسس انها مفككة و مخلعة دة و كل مايروح التوكيل يقولولو ده عادى و طبيعى ما العربية بقالها 3 سنين ده غير تغيير الطنابير كل 40.000كم و هوة بيحافظ على العربية بطريقة وهمية يعنى مظنش ان العربية عدى بيها ال 100كم فى خلال ال 3 سنين اللى فاتت. قابلتو من فترة وصل لل 100.000كم و يا سلام على صوت الموتور و العربية واقفة مش ممكن عالى جدا و قالولو فى التوكيل كل العربيات كدة مش هتلاقيها زى الجديد يعنى
ده غير تغيير علبة الدركسيون مرة بعد 10.000كم فى الضمان و المرة التانية كانت برة الضمان
انا عاندى كورسا 2003 1600 و معنديش نص الكلام ده
و ده اللى انا شفتو من الهيونداى
اركب عربية فيرنا او اكسنت الشكل جديد ماشية 100.000كم و اركب فيات ماشية 100.000 و انت تعرف الفرق .

**bahaahssn** · 06-10-2009 08:48 PM

لو حضرتك مش مقتنع بكلامى فى منتدى الهيونداى و عد مشاكل الألنترا الجديدة من مالكيها و شوف موضوع الشكاوى الخاصة لمندوب هيونداى و شوف اعتمادية ولا لأ
ازاى تكون اعتمادية وانت لو سندت عليها تطبقها و لو حد ريح بس لمسك كده البوية تتبهدل و الصاج خفيف بطريقة خيالية شوف العربية ديه معاك شكلها عامل ازاى هل الأكصدام مظبوط على الرفرف 100%

**M.Mosaad** · 06-10-2009 11:09 PM

بصراحه موضوع مصاريف العربيه دة مش منطقي اي عربيه جديدة فوق ال 100000 لما بتتخبط مثلا بيتصرف عليها قد كدة
انا زميلي معاه النترا 2006 واحد دخل في العربيه من ورا خلاه يلبس في اللي قدامه
محصله الخساير كانت شنطه و كشافين اماميين و سربنتينه تكييف و شويه جاجات التوكيل قاله قطع غيار بس 18000 جنيه لف الحرفيين وجاب استيراد و الكلام دة لحد ماوقفت عليه ب 9000 جنيه بالظبط يعني مش اقتصاديه و لا حاجة يعني خبطة زي دي في اي عربيه لو هتزيد مش هتزيد عن 2000 او 3000 جنيه قصاد امكانيات و راحه و شياكه
و كمان التوكيلات زي رينو و فكري و اوماترا فاهمين في عربيتهم كويس لانهم مش بيشتغلوا غير في الماركه دي و بس و انا ذكرت في موضوع سابق ان برضة واحد زميلي معاه فيستا 98 مبيتعاملشي غير مع التوكيل من ساعه ماجابها
لحد دلوقتي العربيه زي ماهي يعنياي عربيه محتاجة محافظة طبعا بس الاروربي اكتر بس هتحافظ علي حالتها كويسة جدااااااااا