إشتريت بولونيز 87 وبقيت بولونيزاوي (وحيث أن معلوماتي عنها صفر . لدي عدة أسئلة)

**ahmed1981** · 04-10-2009 12:25 AM

بولونيز
السيارة موديل 1987

الحقيقة أنني إكتشفت أنه رغم منظر هذه السيارة غير المحبب للكثير
إلا أن هذا المنظر يغطي على جواد جامح وفارس رابح وحصان فاتح
أقصد أن هذه السيارة بسم الله ما شاء الله لا قوة إلا بالله
ثبات وسحب وصالون وراحة
تخليك متبصش للسيارة اللادا القديمة المماثلة لها في السعر
أنا مش هقارنها بالمرسيدس أو بالجولف 2 عشان ما أظلمهاش
لكن أقارنها بال 132 وبال 131 وباللادا المماثل لها في الموديل
وأرى أنه عند تساوي الحالة فهي تغلبهم جميعاً في الكفاءة
بالإضافة إلى أنها أرخص منهم جميعاً وأحدث في الموديلات

لكن تظل هناك عقبة نفسية تجعل الكثير من الناس يبتعدون عنها بسبب شكلها
لكني تجاوزت هذه العقبة

وأحيي من موقعي هذا كل إنسان يمتلك هذه السيارة

الأسئلة:
ما هو الحجم الصحيح للجنوط ؟ (13 , 14 , 15) ؟؟
ما هو حجم الكوتش الخاص بها الذي تخرج به من المصنع ؟؟
في ونة بسيطة في الكرونة. أوديها لمين يكشف عليها في القاهرة؟؟؟
هل كان بينزل لها جنوط اسبور استاندر أم لا ؟ وألاقيها فين؟

**ahmed1981** · 04-10-2009 01:13 AM

سؤال تابع للأسئلة أعلاه:
سمعت أن هناك طريقة تجعل دركسيون البولونيز أكثر خفة؟؟
بإضافة زيت أو شيء ما. هل لديكم فكرة عنه ؟؟؟

**Youssef.Awad** · 04-10-2009 02:39 AM

[QUOTE=ahmed1981;3872029441]سؤال تابع للأسئلة أعلاه:
سمعت أن هناك طريقة تجعل دركسيون البولونيز أكثر خفة؟؟
بإضافة زيت أو شيء ما. هل لديكم فكرة عنه ؟؟؟
فيه فعلا ناس بتحط زيت زى زيت الباور على عمود الدركسيون عشان تخففه شوية
بس هو فى الاول بيبقى تقيل بالنسبة لأول مرة حد يركب بولونيز ومع الوقت اكيد هاتتعود عليه
وطبعا لما يكون الكاوتش جديد ولو هاتركب جنوط وتزبط زوايا وترصص مع تربيط العفشة هتلاقيه خفيف معاك انشاء الله

**Youssef.Awad** · 04-10-2009 02:36 AM

الف الف مبروك يا ريس ومرحبا بيك فى منتدى مالكى البولونيز وفعلا اختيارك فى محله وربنا يباركلك فيها ويارب تكون حالتها كويسة ومش مبهدلة قوى خاصة ان معظم اللى بيركبوها مش مهتمين بيها

الأسئلة:
ما هو الحجم الصحيح للجنوط ؟ (13 , 14 , 15) ؟؟
جنوط الستاندارد 13 بوصة
ما هو حجم الكوتش الخاص بها الذي تخرج به من المصنع ؟؟
175/80 r13
وممكن تركب كاوتش 185/70 r14
في ونة بسيطة في الكرونة. أوديها لمين يكشف عليها في القاهرة؟
تقريبا ده زيت الكرونة اكشف عليه ونصيحة ليك غير كل الزيوت (محرك-فتيس-كرونة) والفلاتر والسيور ونظف البيكات والكاربيراتير وطقم بوجيهات ومياه البطارية .. كلها حاجات بسيطة هاتغنيك عن مشاكل ممكن تظهر ورا بعضها وتزهقك كل شوية
هل كان بينزل لها جنوط اسبور استاندر أم لا ؟ وألاقيها فين؟
التجهيز القياسى كان عجل حديد بس ممكن تركب جنوط 13 او 14 بمقاسات الاطارات اللى ذكرتهالك
ويفضل ان يكون تيوبليس اللى مش هاينفع يركب على العجل الحديد لو كان اطرافه معوجة او فيه بارومة

**dr_timo** · 05-10-2009 08:33 PM

المشاركة الأصلية كتبت بواسطة ahmed1981

النهاردة رحت أجيب كوتش
الراجل قال لي المقاس بتاع البولونيز هو 80/185
رفضت أشتري منه

طالما انتم متأكدين أن المقاس هو 13/80/175

جزاكم الله ألف خير

ممكن ياحمد تجيبهم من عزبة شلبي هيبقو استيراد واصلي واسعارهم كويسة ومقاس مناسب

**Youssef.Awad** · 05-10-2009 09:27 PM

المشاركة الأصلية كتبت بواسطة dr_timo

ممكن ياحمد تجيبهم من عزبة شلبي هيبقو استيراد واصلي واسعارهم كويسة ومقاس مناسب

بلاش يا د.تيمو عزبة شلبى دى وبعدين الكاوتشات من الحاجات اللى لازم تيجى زيرو مش زى اى قطعة غيار وخلاص
دى ارواح بنى آدمين
وايه اللى ضمنا الاستيراد ده كان معمول ايه بيه قبل كده ممكن شد ولا جرى ولا فرك ولا محفور من جديد
من رأيى بلاش نتهاون فى ارواحنا وارواح الناس اللى هاتركب معانا

**Youssef.Awad** · 05-10-2009 09:31 PM

المشاركة الأصلية كتبت بواسطة ahmed1981

النهاردة رحت أجيب كوتش
الراجل قال لي المقاس بتاع البولونيز هو 80/185
رفضت أشتري منه

طالما انتم متأكدين أن المقاس هو 13/80/175

جزاكم الله ألف خير

ياريت تجيب 175 مش 185 عشان يكون مريح على الجنط كويس ومايبقاش مضغوط من الاجناب
بس مافيش مشكلة لو لقيت 175/70 او 175/80 لأن 70 او 80 ده ارتفاع جوانب الاطار مش هاتفرق كتير بروفايل العجلة غير حاجة بسيطة فى ارتفاع العربية

فالاحسن تسأل عند ناس تانية ويكون زيرو باكياسه ومتخزن كويس وتاريخ حديث الصنع وبلاش الاستيراد ولا المستعمل ولا الصينى ولا النسر الحجرى
خليك فى الماليزى زى الفل وطرى

والمقاس 185/80 ده بتاع الفيات 132 ويبقى جنوط 14 مش 13