يوم الخميس الماضي كنت مسافر كالعادة الي السويس (ميناء الادبية) و فجأة و انا راجع الي السويس تمهيدا للعودة الي القاهرة جائتني مكالمة غيرت مسار رحلتي تماما كي أتجه الي بورسعيد و بأقصي سرعة كي ألحق احدي السفن أثناء عبورها لقناة السويس قبل أن تغادر بورسعيد

طبعا كنت أول مرة أمشي علي طريق السويس / الاسماعيلية لذا كنت أسير بحرص و حذر شديدين خاصة أن حالة الطريق سيئة جدا و به تقاطعات و مناطق سكنية عديدة بالرغم من أني كنت أسير بسرعة (140 كم/ساعة) في معظم مراحله و طبعا لما طلعت علي طريق الاسماعيلية / بورسعيد الذي أصبحت أعرفه جيدا فتحت زيادة علشان أعوض التأخير لكن برضه بحذر و حرص

طيب أيه لازمتها المقدمة دي ؟؟
هأقولكوا حالا ...

اللي حصل أني بالرغم من كوني ماشي بسرعة عالية طول الطريق (نظرا لظروف العمل) ألا اني من النادر أني كنت اعمل غرز (ألا للضرورة برضه و حين تكون المسافة كافية) أو أزنق نفسي وسط عربيتين مثلا أو ألزق في العربية اللي قدامي علشان تعديني بسرعة أو أشد مع عربية عدت مني في حين أن كان امامي عربية ميتسوبيشي كولت سايقها شاب من الاسماعيلية (من الشباب الميكي ميكي ......) و عمال يديها في غرز يمين في شمال بداعي و بدون داعي و علي سرعات قد تصل الي 160 كم/ساعة او اكثر و بشكل يؤذي من حوله لدرجة انه كان هايلبس عربية ياريس فرملت فجأة في عربية نقل وراها بسبب الغرزة اللي عملها من يمين الياريس , و في الاخر حصلت البيه علي مدخل بورسعيد يبقي أيه لزمتها بقي الغرز و التنطيط يمين و شمال الطريق

هو ده الفرق بين السرعة و السرعة بتهور
بس ياريت الناس اللي بتمشي علي الشمال تقدر ان اللي جاي من علي الشمال و بسرعة ده ممكن يكون عنده ظروف تجبره علي السرعة دي و توسع له علشان مايضطرش يعدي من اليمين و يعمل غرزة حتي و لو المسافة كافية و الطريق واضح

أسف علي الاطالة