الموضوع: مقارنة مهمة في اسعار ال 25 الف

اللهم صل على محمد وعلى آله وصحبه أجمعين
فى حالة اختيار الـ 504
طبعا عربية جامدة جدا ... لكن الكثير بيقولوا انه صعب انك تلاقى بيجو 504 بالسعر ده وتكون حالتها كويسه ...وطبعا لو احتاجت اى حاجة بعد كده لازم يكون معاك فلوس

لكن السيارة قوية جدا ... موتور 2000 سى سى قوى جدا ... عمرته سهلة جدا ومعمرة وتستمر مده طويل وتكلفة العمرة لا تقل عن 3000 جنيه والعفشة مثل المرسيدس خصوصا فى االموديل 504 gl ... استهلاكها للبنزين داخل المدينة كبير فى حدود 12 او 13 لتر لكل 100 كيلوا ... ولكن فى السفر موفرة تستهلك حوالى 9 الى 11 لتر لكل 100 كيلوا
قطع غيارها متوفرة اصلى وتقليد وكله ... لو هاتصرف عليها هاتعيش معاك العمر كله ... الضريبة بتاعتها فى حدود 450 جنيه اكثر من السيارات الاخرى

المازدا 323 ... سيارة جميلة جدا ... ناعمة ... وسريعة ... وتجميع سريع ايضا .. وقطع غيار معمرة واصلى ... ويمكن تغيير الموتور بالكامل من مصر او بورسعيد فى حدود 3100 جنيه ...ويبدأ سعرها من 22000 او 21000 حتى 18000 ... طبعا النظيف منها بيكون بـ 22000 ... واحيانا يوجد منها حالات نادرة فى حدود 24000 ...
السيارة 1300 سى سى وموفرة فى البنزين
عيبها الوحيد انها منخفضة "واطية" فى تحميل اشخاص وعبور احد المطبات العالية ممكن العربية تحك بالمطب
قطع غيارها متوفرة ... وفى حالة شراءها "يتبقى معاك مبلغ محترم فى حدود 4000 جنيه تستطيع تصليح اى شىء يظهر بعد الشراء"
تستطيع السفر بالسيارة

ولكن البيجو 504 هى اكبر واحسن سيارة فى السفر "لا يختلف عليها اثين"

الفيات 131
سيارة جميلة ومطلوبة بشد ... ونادر لما تلاقى حد بيبيعها ... ويمكن ان يركب عليها قطع غيار الشاهين "والله اعلم" ... يوجد منها 1300 سى سى وكذلك 1600 ... لكن الناس تفضل الـ 1300 سى سى عشان توفر فى البنزين
قطع غيارها متوفرة "لكن موش اصلية" مضروبة كثير وغير معمرة .. ورغم ذلك اسعار قطع غيارها رخيص قوى ومطلوبة
والكثير يفضلها جدا اكثر من السيارة شاهين برغم انها قديمة ...وسعر السيارة النظيف منها المفروض لا يتجاوز الـ 20000 الف ده للحالات النادرة

خلاف كده صعب تلاقى سيارة بحالة جيدة

لو بتسافر كثيير يبقى عليك والبيجو 504
لو مشاويرك داخلية وبتسافر احيانا وموش بتشيل ناس وشنط يبقى عليك بالمازدا 323
لو عايز سيارة عملية وحاجتها رخيصة لكن موش معمرة يبقى عليك بـ131

اما السيارات الحديثة
مثل اللادا "خشنة قوى" ولازم تلعب رياضة كويس عشان تلف الدركسيون
وبعد مرور 7 سنوات منذ شراءها زيرو يبدأ ظهور "كل المشاكل والارف فى الكهرباء والميكانيكا والعفشة" وكل يوم بحكاية

خلاف كده صعب انك تلاقى سيارة حديثة موديل تسعينات بالسعر ده ما عدا
اللادا والماروتى والبولونيز والـ 128

لو كان معاك من 25000 الى 30000 يبقى اختياراتك كلها سوف تتغير تماما

على فكرة انا واقع فى نفس المشكلة والحيرة
واختياراتى تقع بين
مازدا 323 " ودى اقرب سيارة فى حدود امكانياتى" لازم يفضل معايا فلوس عشان لو ظهر حاجة اقدر اعملها
فيات 131 "لو فيها حالات نادرة وكويسة لن اتردد فى شراءها"
بيجو 504 ... صعب قوى انى الاقى حالة نظيفة منها .. ولو فيه ممكن استحمل فرق استهلاك البنزين موش مهم .... مقابل سيارة قوية جدا جدا ولها تاريخ كبير فى السوق ومازالت تعمل حتى الآن بكفاءة عشرة على عشرة ... ومعمرة "ويبان عليها اى حاجة تتصرف عليها"

ارجوا ان اكون افدتك
مع اطيب التمنيات
اخوك حسين غزالة