السلام عليكم ورحمة الله وبركاته ....

أنا كنت عايز أستفيد من خبرة الزملاء فى المنتدى فى استفسار بشأن سيارة BMW 318i موديل 2006 عاملة 80000 كم ... وهي صاجها من بره مش باين فيه آثار لحوادث كبيرة أو ما شابه .. يادوب التجريحات المعتادة فى الاكصدام التي قد تنتج عن "حكة" بسيطة مع سيارة أخرى أو الرصيف أثناء الركن ... و على فكرة هو اتقال لي انها رشة نظافة.... طبعا كل ده مبدئيا وأنا واقف كده على السريع من غير مايكون حد معايا يشوفها أو أكشف عليها فى التوكيل ....

أنا سؤالي عن السعر هو مطلوب فيها 195 ألف .. يا تري حد معقول ولا بعيد قوي؟ لأنى أنا طبعا عارف يعني ايه BMW بس برده بحاول أتقبل فكرة ان المبلغ ده يكون فى عربية used

وبالمرة بقى طالما سألت حضراتكم - بما اني طماع شوية - .... هل لو السعر معقول والعربية بعد الكشف عليها طلعت كويسة أتكل على الله؟ ولا أزود شوية وأخليني فى الجديد اوكتافيا اليجانس ولا أول فئة فى الباسات ؟ كمان من ناحية أسعار قطع الغيار والاعتمادية بين الثلاثة أنواع دول؟

أنا عارف ان الجزء التاني من السؤال المفروض يكون فى قسم المقارنات ... بس أنا قلت الشئ بالشئ يذكر ... والفرع يتبع الأصل ... وبدل ما يكون بمثابة اغراق للمنتدى بعدة مشاركات يمكن جمعها فى مشاركة واحدة ......

ولكم مقدما جزيل الشكر