تقييم الأفيو.........من الاعضاء....((متجدد))
السلام عليكم
انا يا جماعة لقيت الناس بتسأل كتيرعن الافيو و تقييمها
علشان المهتمين بيها كتير
و أنا جمعت تقييمات الاعضاء لها من كل المواضيع
حتي يستفيد الناس من الموضوع ده بس من غير ما يلفوا و يدوروا و يتعبوا نفسهم
تقييم الأخ الكريم aelgebaly
والناس فى التوكيل بخله شوية ومش جايبين الزجاج الخلفى كهربا والكبوت منخفض اوى بس انا بقالى يومين وتقريباً اتعودت على ابعاده فا مفيش مشكلة حتتعود ..بالنسبة للافيو الحمدالله العربية حلوة جداً السحب هايل موتورها موتور دايو ETCH II التابلوه بتاعها شكله لذيذ بس ما نكرش ان الاسبيرانزا كان عاجبنى التابلوه بتاعها اكتر . شكلها من بره جامد جداً كنت فاكر ان هى صغيرة من جوه بس لا انا سايق مستريح وانا طويل واللى قاعد ورا واخد راحته التكييف جربته شوية برضه هايل بس ماشغلتوش كتير عشان قالولى فى المعرض بلاش اول 1000 تشغل التكييف عزل الصوت فيها كويس بمجرد ما بتقفل الزجاج ما بتسمعش حاجة بره حاجة كمان ان التوكيل جايبها بكاسيت عادى مش CD وده منرفزنى اوى انا عملت 200 كيلو تقريباً
=====================================
تقييم العضو الذهبي MMamdouh في اطار مقارنة بين الافيو و اللانوس
من الناحية الميكانيكية فالافيو فيها نفس موتور اللانوس بس الmanagment بتاعه مختلف... الافيو فيها حساسين شكمان و اتنين علبة بيئة و حساس كامة و بالتالى بقى عندك حساسات زيادة عن اللانوس و من ناحية القدرة الافيو بتعمل 83 حصان و اللانوس 86... اعتقد ال3 حصان دول ضاعوا بسبب علبة البيئة الزيادة اللى فى الافيو
الفتيس فى العربيتين واحد و هو الD16 اما الفرامل فا هى فى الافيو اكبر و بالتالى فرامل الافيو احسن من اللانوس اما العفشة فا مقصات الافيو الامامية خليط من تصميم مقصات اللانوس و النوبيرا و بالتالى ممكن يكون فيه احتمال ظهور مشكلة الجلب الشهيرة للنوبيرا... بس الافيو فيها جلبة واحدة من اللى بتتقطع مش اتنين زى النوبيرا و بالتالى ممكن تكون بتستحمل عن النوبيرا بس الاكيد ان اللانوس بتعمر اكتر
العفشة الخلفية مختلفة كتير اوى عن اللانوس و هى اسبة لعفشة الكورسا السيدان... مسمعتش حد اشتكى من العفشة دى و بالتالى مش شايف سبب لاى شكوى فى الافيو... بس و انا ببص على عفشة ورا لقيت فلتر البنزين تحت العربية... انا بكرة الحركة دى اوى
انا طبعا مش حتكلم على الشكل الخارجى او الصالون لان دى فروق كلكم شفتوها و مش محتاجة تعليق اساسا اما عن تجربة القيادة فا انا مسوقتش الافيو بس انا متوقع انها على اسواء اسواء الفروض لازم تبقى احسن من اللانوس لانها بتنزل ب جنوط 14 و كاوتش 14/60/185 و فيها فرامل اكبر و عفشتها الخلفية احدث (عفشة اللانوس اللى ورا هى عفشة اوبل استرا 92)... اللى ممكن يفرق السحب لان موتور الافيو اقل 3 حصان و عجلها اكبر بس طبعا الوزن له عامل و انا معرفش وزن الافيو كام
من ناحية قطع الغيار فا انا شايف ان الافيو مكلفة... جوز الطنابيرالكورى الاصلى ب 400 جنية فى حين ان طنابير النوبيرا (نفس الحجم و الوزن تقريبا) ب 280 جنية ايطالى... قيس على كدة باقى الاجزاء و اكيد قطع غيار الدايو منتشرة اكتر من الشفروليه على الاقل فى الوقت الحالى
MMamdouh
===========================================
تقييم العضو السوبر ahmed1981
الكماليات:
1- تكييف
2- باور
3- كاسيت
4- إتنين زجاج كهرباء
5- سنتر
6- فتح الشنطة والبنزيم من الداخل تقريباً
المهم تعليقي على السيارة مبدئياً
1- العزل ممتاز جداً صوت الماتور غير مسموع وأنا ركبت لانوس 2003 وأقول الأفيو أفضل في العزل جدااااا
2- التكييف ممتاز بدون مبالغة ولا تحس بتأثيره على السيارة نهائي
3- الصاج متين متين متين إنسى اللانوس والفرنا الورق
4- شكل العربية من بره ما شاء الله جميل جداً
5- العفشه جميله مبتحسش بأي خبط
**
أنا ركبت اللانوس وسافرت بيها مرة
وركبت الأفيو زيرو
فرق السماء عن الأرض لصالح الأفيو من حيث :
العزل & التقفيل & الخامات & المتانة & الشكل & التوكيل
========================================
تقييم العضو running_man
الأفيو 83 عند 5600 دورة بس
و في كذا موقع قريت عليه ان الموتور ده بيطلع من83 الى 91 حصان حسب حالته
يعنى حكاية 83-84 حصان دى في أسوأ الفروض
و يميز العربيتين العزم الجميل عند لفات قليلة 130 عند 3000 دورة بس
متهيألي اللانوس 2 و الأفيو الاتنين فيهم علبة واحدة للبئة
الافيو جابت معايا حوالى 185-187
اللانوس عمرها ما جابت معايا أ كتر من 175
يمكن عشان الأفيو أخف شوية
===========================================
مقال منقول عن العضو export
يعد مظهر افيو الخارجي أحد ابرز سماتها بفضل الخطوط الانسيابية.. كما ان ابعادها تعد الانسب للطرق ذات الطبيعة الخاصة فطولها 4.235م، أما العرض ف 1.67م، والارتفاع 1.495م، وقاعدة العجلات 2.48م.. تلك الأبعاد التي جعلتها تنافس بقوة في فئة السيارات المتوسطة.
إلي جانب التصميم هناك المحرك الفعال سعة 1500 سي سي وهي سعة مرتفعة نسبيا بالنسبة لكثير من السيارات في فئتها، مما يجعل انطلاق السيارة في منتهي القوة، كما يوفر كثيرا في استهلاك الوقود لأنه يعمل بنظام الحقن الاليكتروني. محرك افيو يتكون من أربعة أشواط والكامة المفردة يولد قدرة تصل إلي 83 حصانا وعزمه 128 نيوتن متر.. أما ناقل الحركة فيدوي يتيح لقائد السيارة التنقل بين 5 سرعات.
لا تتركز عناصر الاقتصادية فقط في انخفاض سعر السيارة وسعر قطع الغيار، ولكن في انخفاض تكلفة التشغيل، فهذه السيارة المثالية في استهلاك الوقود لا تحتاج أكثر من 5.8 لتر من البنزين لتقطع رحلة طولها 100كم، وقد ساعد السيارة علي تحقيق هذا المعدل الاقتصادي في استهلاك الوقود سببان: أولهما التصميم الخارجي الديناميكي الذي يحقق أقل ممانعة للهواء أثناء السير، ثانيهما انخفاض وزن السيارة الذي لا يتعدي 1065 كجم في السيدان و1055كجم في الهاتشباك، ولهذا فخزان وقودها الذي يتسع ل45 لترا، يكفي لانطلاق السيارة دون الاحتياج للتزود بالوقود لمسافة 775كم. كما انها مجهزة بتكييف قوي وباور ستيرينج وسنترال لوك وزجاج كهربائي أمامي وكاسيت مزود ب4 سماعات موزعين بالتساوي في الأمام والخلف.
تتمتع السيارة افيو بقمة الاتزان علي الطريق حتي في أصعب المنحنيات خاصة أن ارتفاعها عن الأرض يصل إلي 15سم في حين أن قاعدة العجلات تصل إلي 2.48 متر، كما أن الجنوط والاطارات تعطي المزيد من الاتزان علي الطريق بفضل مقاييسها المناسبة وهي: 175/70 أر/ ..13 تتميز أبواب السيارة أفيو بأنها مدعمة بقضبان فولاذية لامتصاص الصدمات الجانبية وتشتيتها بعيدا عمن بالداخل.
الجدير بالذكر أن شركة المنصور للسيارات تتمتع باسم عريق في السوق المصري تزيد عن 32 عاما منذ تاريخ تأسيسها بالإسكندرية ، حيث عرفت بالمصداقية والإتقان واليوم تعد المنصور أكبر شركة للسيارات في مصر بفضل شبكتها المتسعة من المعارض ومراكز الخدمة ومنافذ بيع قطع الغيار . كما تعد شركة المنصور للسيارات هي الرائدة في تقديم أحدث أساليب خدمة العملاء بفضل استثمارها المستمر في تدريب فريق العاملين بها محليا وعالميا.
منقول
===========================================
تقييم العضو mido
العربية كويسة جدا على قد فلوسها
التقفيل كويس
التكيف كويس بس بياخد من الموتور جامد وبيأثر على السحبة
السحبة من غير التكيف كويسة.... برده بالنسبة ل 1500 8 valve single cam
انا مرة جبت على التانى 80 وكان ال rpm 4.5
بس التانى اخره 40 الغريب انى بجيب 100 على rpm 2.5
العفشة كويسة على المطبات علشان عالية بس برده لو عايز تجرى العربية مش ثابتة بعد 100 انا اخرى جبت مرة 150 بعد كده مزودتش
العربية واسعة من جوه و الشنطة كويسة برده
التوكيل كويس
الموتور موتور لانوس بس ده مش عيب خالص
اعتقد العربية كويسة بالنسبة لسعرها جدا
=========================================
و دي صور من العبد لله eng / AhmeD
صور الافيو من الخارج
http://www4.0zz0.com/2007/11/10/12/48100760.jpg
http://www4.0zz0.com/2007/11/10/12/35830275.jpg
http://www4.0zz0.com/2007/11/10/12/44483693.jpg
http://www4.0zz0.com/2007/11/10/12/18851441.jpg
http://www4.0zz0.com/2007/11/10/12/13735733.jpg
صور من الداخل
http://www4.0zz0.com/2007/11/10/12/86190027.jpg
http://www4.0zz0.com/2007/11/10/12/76079317.jpg
http://www4.0zz0.com/2007/11/10/12/81589709.jpg
http://www4.0zz0.com/2007/11/10/12/46130233.jpg
http://www4.0zz0.com/2007/11/10/12/33794267.jpg
م / أحمد