عاجل ...مفاجأة سيئة من توكيل سوزوكي ... ماذا تفعل لو كنت مكاني ؟

انا حاجز سوزوكي sx4 سيدان من مودرن موتورز ( توكيل سوزوكي ) فرع مدينة نصر يوم 15/9/2009 وقالولي الاستلام خلال اسبوعين ... وفلوسي كانت جاهزه كاش وكان ممكن أستلم فوري من أي معرض بره بس قلت خليني مع التوكيل هيبقى أضمن .

المهم كلمت التوكيل قالي ان شاء الله تستلم يوم الاحد ( اللي فات ده ) 4/10/2009 او الاتنين

كلمتهم تاني يوم السبت قاللي معلش العربيه لسه ماجاتش من اسكندريه لسه ماخدتش الافراج الجمركي وان شاء الله تستلم يوم الاربع او الخميس

قلنا ماشي ... كل تأخيره وفيها خيره ... كلمتهم يوم الاربع قالي العربيه وصلت ابو رواش وهيتعملها ال PDI وهتستلم الخميس 8/10

يوم الخميس .. وهي دي المفاجأة العجيبه الغريبه ... مسؤول المبيعات كلمني قالي للأسف حصل خطأ غريب ... كان المفروض هيوصلهم عربيتين واحده سيلفر ( بتاعتي ) وواحده نبيتي
العربيتين اللي وصلو بقى كانو واحده شامبين وواحده سودا :B4_556:
طيب ازاي حصل الكلام ده ؟؟؟؟؟؟ قالي والله انا كمان اتفاجئت ومش عارف ... بيقولي لقيو السيلفر والنبيتي راكنين جوه فاضطروا يطلعوا اللي بره وكانو شامبين وسودا !!!! طبعا مش عارف أقول ايه الحقيقه استهتار يصعب التعليق عليه :U_thin1[1]:

طيب والناس هتركبوها ألوان على مزاجكم ؟؟؟ قالي حضرتك شوف اللونين الموجودين لو عجبتك كان بها لو عايز السيلفر يبقى استنى كمان أسبوعين !!!! :L_bhuhhh[1]: هل حد عنده تفسير منطقي للي حصل ده ؟؟؟

المفروض النهارده ( السبت ) هروحله المعرض عشان نتفاهم ونشوف هنعمل ايه ... بس بيقولي ممكن يستعجلوها واستلمها بعد اسبوع .

انا دلوقتي في حيره شديده جدااااااا وأرجوكم تنصحوني ... ماذا تفعل لو كنت مكاني ؟؟؟؟

انا في دماغي عدة تساؤلات :

1- طبعا اللي حصل ده يدل على ان مفيش متابعه و ان فيه استهتار بالعميل ودي بادره لا تبشر بالخير في التعامل مع التوكيل ده .

2- هل ممكن تكون دي حاجه مقصوده للتخلص من عربيتين مركونين بقالهم فتره ؟؟؟؟؟؟ كل شيء وارد في مصر ... ازاي بقى أتأكد من سلامة العربيه اللي هستلمها .. لأن العربيتين دول تاريخ صناعتهم 8/2008 وهما موديل 2009 يعني ممكن يكونو مركونين في الشمس ومتهانين في التخزين .

3- لو قلت ماشي هستنى اسبوع كمان ... ايه اللي يضمنلي حقي ؟ هل ممكن يكتبو وصل بمعاد الاستلام وغرامة تأخير عن كل يوم زياده ولا دي هتبقى بدعه في سوق السيارات المصري ؟
خصوصا اني مستعجل جدا لأني مشغول في ظروف امتحاناتي وصاحب بالين كداب ... الانتظار ده عاملي قلق ومش عارف أركز .

4- هل كان المفروض عملت شكوى وكبرت الموضوع ؟ أنا قلت خلينا بالحسنى لعله يكون خير .

أنا اتضايقت جدا وبفكر بجديه أسترد مقدم الحجز لأني مابقتش مرتاح نفسيا بسبب الموقف ده .

اسف عالاطاله ... بس ربنا يعلم انا قلقت قد ايه وحاسس ان العربيه دي مش من نصيبي وعلى أي حال الحمدلله وربنا يكتبلي اللي فيه الخير حيث كان .

أنا شايف إن حضرتك ممكن تستنى شوية كمان وتاخد اللون اللى حضرتك عاوزه
بس هما كده بيخلوا العميل يضايق منهم وياخد عنهم فكرة وحشة والحاجات دى ساعات بتخلى الناس تتنباً بحاجات مش كويسة قدام بالذات بخصوص الصيانة والمعاملة مع التوكيل ، المفروض إنهم يوفروا اللون اللى حضرتك طلبته ، صاحب العربية بيحب ياخد العربية باللون اللى هو عاوزه ، مش اللى بيفرضه عليه التوكيل .
لكن العربية ممتازة ، واختيارك موفق إن شاء الله ، فمتخليش الحاجات اللى زى دى تعكنن عليك .
بس فيه نقطة حضرتك وضحتها أنا مكنتش واخد بالى منها وهى إن تاريخ صنع العريية 8/2008 ودى يخلى الواحد يتخيل شكل العربية وهى مرمية فى الشمس والتخزين السئ ، بس على فكرة أغلب العربيات اللى فى مصر بتتخزن بالطريقة السيئة دى يعنى ساعات أنا كنت بشوف العربيات مرمية فى الشمس والرطوبة فى الصيف ، وفى الشتا تحت المطر والتراب مغرق العربيات ، يعنى عادى ، هتعمل إيه بقى ..

مش المفروض إن طالما العربية موديل قديم من 2008 يبقى تخفيض فى السعر
حضرتك جبت العربية بكام وإيه المواصفات بتاعتها ، وياريت حضرتك تعمل لنا تقييم عن العربية وبالصور لما تستلمها إن شاء الله
وألف مبروك مقدماً وبارك الله لك فيها

اقتباس:

---

المشاركة الأصلية كتبت بواسطة hani945

أنا شايف إن حضرتك ممكن تستنى شوية كمان وتاخد اللون اللى حضرتك عاوزه
بس هما كده بيخلوا العميل يضايق منهم وياخد عنهم فكرة وحشة والحاجات دى ساعات بتخلى الناس تتنباً بحاجات مش كويسة قدام بالذات بخصوص الصيانة والمعاملة مع التوكيل ، المفروض إنهم يوفروا اللون اللى حضرتك طلبته ، صاحب العربية بيحب ياخد العربية باللون اللى هو عاوزه ، مش اللى بيفرضه عليه التوكيل .
لكن العربية ممتازة ، واختيارك موفق إن شاء الله ، فمتخليش الحاجات اللى زى دى تعكنن عليك .
بس فيه نقطة حضرتك وضحتها أنا مكنتش واخد بالى منها وهى إن تاريخ صنع العريية 8/2008 ودى يخلى الواحد يتخيل شكل العربية وهى مرمية فى الشمس والتخزين السئ ، بس على فكرة أغلب العربيات اللى فى مصر بتتخزن بالطريقة السيئة دى يعنى ساعات أنا كنت بشوف العربيات مرمية فى الشمس والرطوبة فى الصيف ، وفى الشتا تحت المطر والتراب مغرق العربيات ، يعنى عادى ، هتعمل إيه بقى ..

---

اقتباس:

---

المشاركة الأصلية كتبت بواسطة hani945

مش المفروض إن طالما العربية موديل قديم من 2008 يبقى تخفيض فى السعر
حضرتك جبت العربية بكام وإيه المواصفات بتاعتها ، وياريت حضرتك تعمل لنا تقييم عن العربية وبالصور لما تستلمها إن شاء الله
وألف مبروك مقدماً وبارك الله لك فيها

---

ربنا يبارك فيك شكرا جزيلا لرد سيادتك
هي عليها عرض حاليا ب 107 بدلا من 112

والله الحاجات دي ممكن تظهر بسيطه لكن ليها تأثير كبير في نفسية الواحد وانطباعه تجاه التوكيل خصوصا انك مش هتدفع مبلغ صغير والواحد مش بيجيب عربيه كل يوم
إضافه لكده قلة انتشار العربيه والكلام المحبط اللي بسمعه عن التوكيل يخلي أي حاجه صغيره تأثر فيا وتقلقني

على فكره العربيه موديل 2009 ولكنها تصنيع 2008 ... كل العربيات كده ... يعني السيراتو الجديده تقريبا ناس استلمتها موديل 2010 والتصنيع أساسا في شهر 4 و 5 / 2009 ويمكن قبل كده

بس أنا بتكلم عن ركنة العربيه في الجمرك ... يعني ممكن تكون العربيه بقالها شهور مركونه هناك وياعالم ظروف التخزين ايه ...

ربنا ييسر الامور ويقدم اللي فيه الخير

لو مش مستريح ليها و تقدر تصبر على العربيه
اسحب فلوسك واستنى بدايه 2010 اكيد هيبقى فىه عروض كويسه فى معرض الاهرام وبدايه السنه الجديده

كل تاخيرة وفيها خيره وكان دعاء الرسول الكريم "اللهم اجعل لى الخير حيث كان ثم ارضنى به)

بس عاوز حضرتك تفكر تانى فى موضوع اللون السيلفر و عموما الالوان الميتلك الفاتحة
عيبها انها بتتأكسد بسبب الشمس الحاميه بتاعتنا بسرعة ونوعا ما اللون بيطفى البهجه بتاعته اللى بتشدك وانت فى المعرض وخصوصا لما بيكون اضاءة المعرض سبوتات بيضاء ... كمان لا قدر الله الفاتح صعب انك تداوى الخرابش و الحكات اللى لايمكن تخلى منها شوارعنا ... ركز كده مع عربيه لونها فاتح وماشيه سنتين وللا تلاته وانت تعرف قصدى

عيب الغوامق الحر وبتترب بسرعه وكمان طفية اللون لو بتستعمل فوطة زفرة علشان بتئذى طبقة الدهان الشفاف اللى فوق اللون الاصلى بس لو بتلمعها بميه بس اللون عمره ما حيطفى

طبعا هى اذواق ...ربنا يقدملك الخير (على فكرة عربيتي شامبين بس ندمت بعد تلات سنين وبأطر اعمل واكس كل اسبوعين تلاته علشان اشيل طبقة الاوكسيد وكمان الخرابيش السطحيه)

اقتباس:

---

المشاركة الأصلية كتبت بواسطة blazer

لو مش مستريح ليها و تقدر تصبر على العربيه
اسحب فلوسك واستنى بدايه 2010 اكيد هيبقى فىه عروض كويسه فى معرض الاهرام وبدايه السنه الجديده

---

بس متهيألي العكس .. ان في بداية السنه الجديده هتكون موديلات 2010 نزلت وبالتالي الأسعار هتكون أغلى خصوصا انها عليها عرض حاليا من 112 الف ل 107 ( وده غالبا عشان يخلصو من موديل 2009 قبل السنه الجديده )

شكرا جزيلا على رد حضرتك ربنا يكرمك

اقتباس:

---

المشاركة الأصلية كتبت بواسطة zarkoor

كل تاخيرة وفيها خيره وكان دعاء الرسول الكريم "اللهم اجعل لى الخير حيث كان ثم ارضنى به)

بس عاوز حضرتك تفكر تانى فى موضوع اللون السيلفر و عموما الالوان الميتلك الفاتحة
عيبها انها بتتأكسد بسبب الشمس الحاميه بتاعتنا بسرعة ونوعا ما اللون بيطفى البهجه بتاعته اللى بتشدك وانت فى المعرض وخصوصا لما بيكون اضاءة المعرض سبوتات بيضاء ... كمان لا قدر الله الفاتح صعب انك تداوى الخرابش و الحكات اللى لايمكن تخلى منها شوارعنا ... ركز كده مع عربيه لونها فاتح وماشيه سنتين وللا تلاته وانت تعرف قصدى

عيب الغوامق الحر وبتترب بسرعه وكمان طفية اللون لو بتستعمل فوطة زفرة علشان بتئذى طبقة الدهان الشفاف اللى فوق اللون الاصلى بس لو بتلمعها بميه بس اللون عمره ما حيطفى

طبعا هى اذواق ...ربنا يقدملك الخير (على فكرة عربيتي شامبين بس ندمت بعد تلات سنين وبأطر اعمل واكس كل اسبوعين تلاته علشان اشيل طبقة الاوكسيد وكمان الخرابيش السطحيه)

---

هي المشكله مش في اللون قد ما انا مش متقبل الغلطه اللي التوكيل عملها ومش مرتاح للسبب الحقيقي ورا اللخبطه دي عشان كده هحاول اثبت على طلبي اللي طلبته من البدايه .

انا حسيت ان السيلفر مخليها تنطق والأحمر كمان رائع ... الأسود بتاعها باهت شويه مش مبهر زي عربيات تانيه خصوصا ان الشبكه الاماميه سودا ( هي عايزه شويه نواكل هتخلي الاسود عليها تحفه ) ... الشامبين برضو مدي على بيج اكتر مش دهبي حاسس انه ( عواجيزي ) شويه .

بالنسبه للخدوش انا في اعتقادي ان الخدوش بتظهر اكتر في الغوامق مش عارف رأي حضرتك إيه .

العربيه مواصفات خليجي اتمنى يكون دهانها محترم شويه ويتحمل الشمس والرطوبه

عموما ربنا يكرمك شرفتني بردك والله .

اسحب فلوسك واشتريها من اي معرض واستلمها علي طول

على فكرة التوكيلات مشهورة بالحركة ده
وتقريبا التجار بيبقى ليهم الاولوية

لو افترضنا حسن النيه ممكن نقول بس ان عنده مخزون من اللونين ومحدش بيطلبهم فهو بيجرب حظه معاك انك ممكن تكون مستعجل وتاخد لون منهم , ومش معنى كدا انه مخزون مضروب لا عادى زى باقى الالوان اللى عنده بس عايز يمشى اللون شويه لأنى فعلا نادر جدا لو شوفت sx4 سوداء او شامبين

لو افترضنا سوء النيه يبقى مثلا العربيتين دول بقالهم فتره كبيره عنده وده احتمال مستبعد لأنك بتقول تاريخ انتاجها 8/2008 يعنى ممكن نقول وصلت مصر اول 2009 واساسا العربيه مفيش عليها سحب فدى مده طبيعيه , أو ان هو عاوز يرفع عليك السعر علشان انت مستعجل مثلا

رأى روح شوف العربيتين النهارده واعمل استخاره لو لقيت نفسك مرتاح لواحده فيهم خلص فيها , لو حسيت بأى حاجه مش مظبوطه قوله يا تجيب لى عربيه خلال اسبوع يا هسحب فلوسى

وساعتها تجيبها من اى معرض وتريح بالك , لان صدقنى لو خدت العربيه وانت مش مستريح لها هتبقى موسوس منها واى حاجه تظهرلك هتحسسك ان العربيه كلها بايظه

هما دول مودرن موتورز

مش عاوزك تزعل او تتعكنن ابدا, اللى بيحصل معاك بحصل مع كل التوكيلات احيانا وفى توكيلات بتاخر اكتر من كدا كمان , بس على العربية نفسها العربية دى ممتازة جدا ولو فضل سعرها كدا حتعمل انتشار جامد

وبلنسبة الى الالوان العربية خاليك فى السليفر جامد جدا والاحمر جامد جدااااااااااااااااااا
ولو مش مرتاح معاهم فى المواعيد والاستلام اسحب فلوسك واستلم من اى معرض تانى لان انا سمعت كمان ان وصل سعرها ب105 دلوقتى وفى معارض بتبيع بكدا

واخر حاجة انا سالت واحد معاه العربية بس مانول وقالى العربية دى حتى مش بينزل منها مانول كتير ولا دلوقتى بينزل , وفضل يشكرلى فيها والى انه بيعمل الصيانات فى ابورواش وقالى ممتازين هناك بس المشكلة فى الزحمة , وسالته على تكاليف لصيانة قالى انه عمره ما دفع اكتر من 500 جنية وسالته هو عامل كام الف كيلو قالى 40 الف , ده كل اللى معاه العربية بيشكر فيها وكفاية انها يابانى بالكامل والجير بوكس بتعها يابانى وحتى الزجاج بتعها يابانى وفيها امكانيات هائلة

فعاوزك تطمن من كله صيانات ابورواش كويسة ومن العربية

السلام عليكم ورحمة الله

باشا انت بتتكلم عن نفس اللي حصل معايا بالملي.. نفس الوكيل بس كنت حاجز انا ألتو 3 شهور لحد لما استلمت لون غير اللي كنت عايزة في النهاية

و مش عايز احبطك بس هما توكيل في معاملة المبيعات مش جيدين.

العربية لا خلاف عليها اطلاقا
لكن الوكيل ؟؟؟؟؟؟؟؟؟؟؟؟؟؟؟؟؟؟؟؟؟؟ كتير بقي من علامات الاستفهام

انا بس لسه طالع من تجربة اكتر من سيئة في عربيتي معاهم و مش عايز ابقي متأثر بيها و انا باتكلم معاكم لكن الواضح ان ده تريند عندهم
عايز رأي الشخصي

حضرتك تسحب فلوسك .. وتنزل اي معرض سمعته كويسه و تنقي عربيتك اللي انت عايزها بلونها اللي انت عايزه و تدفعلك 2000 زيادة.. بس خد بالك برضو ان المعارض فيها نصب كتير و فيه ناس كتير بتاخد عربيات من معارض متسمكرة ولا مين شاف ولا دري... فحرص علشان احنا بقينا في غابة

اسف لجرعة الاحباط

تقبل اعتذاري

من اللي شوفته النهارده مودرن موتورز من أسوأ توكيلات مصر معامله زفت وخدمه زفت حتى الشغل اللي بيعملوه في العربيه لا يرقى لمستوى التوكيلات وصنايعية كتير في مصر بيطلعوا شغل انظف من شغلهم حسبنا الله ونعم الوكيل
وفعلا دلوقتى انا اققدر اقول تغور من وش مودرن موتورز مش من وش غبور

من اللي شوفته النهارده مودرن موتورز من أسوأ توكيلات مصر معامله زفت وخدمه زفت حتى الشغل اللي بيعملوه في العربيه لا يرقى لمستوى التوكيلات وصنايعية كتير في مصر بيطلعوا شغل انظف من شغلهم حسبنا الله ونعم الوكيل
وفعلا دلوقتى انا اققدر اقول تغور من وش مودرن موتورز مش من وش غبور

انا شاكر جدا لكل ردودكم يا جماعه ربنا يكرمكم جميعا

انا رحت النهارده التوكيل لأستاذ كريم ناصر ( زميلنا في المنتدى )

الصراحه كان ذوق وجدع معايا جدا بس للأسف هو كمسؤول مبيعات فهو اللي في وش المدفع رغم انه مالوش يد في اللي حصل

ووعدني بالاستلام ان شاء الله يوم الخميس ووعدني أنه هيعمل معايا أحسن واجب ... ربنا يسهل الأمور وييسر للي فيه الخير

ان شاء الله هتابعكم بالأخبار

عاوز تتطمن من التوكيل انزل اى مرز صيانةليهم وقابل الناس اللى بعمل صيانات هناك وعربياتها بتتصلح واسالهم اخبار التوكيل معاكم ايه فى التعامل والصيانات وده احسن حل لسبب لان اى واحد ليه تجربة سيئة مع التوكيل بيطلع اسوء توكيل , وحتى مثلا توكل زى كيا او السبع مع انهم محترمين جدا بس ممكن تلاقى واحد من لناس بيعمل صيانة معاهم ومش ارتاح وحصل مشكلة بيطلع فبيطلع ويقولك التوكيل مش كويس واوعى تتعامل معاه وكذااا
فاحسن حل بجد انزل اى مركز تبع مودرن واسال ملاك العربيات اللى موجودين هناك وبيعملوا صيانات عن اخبار التوكيل معاهم واطلب كمان من اى مهندس يدخلك قسم الصيانات واتفرج عليهم وهما بيعلوا الصيانات واعتقد ده مش ممنوع وحقك وتبقا كدا اطمنت

اقتباس:

---

عاوز تتطمن من التوكيل انزل اى مرز صيانةليهم وقابل الناس اللى بعمل صيانات هناك وعربياتها بتتصلح واسالهم اخبار التوكيل معاكم ايه فى التعامل والصيانات وده احسن حل لسبب لان اى واحد ليه تجربة سيئة مع التوكيل بيطلع اسوء توكيل , وحتى مثلا توكل زى كيا او السبع مع انهم محترمين جدا بس ممكن تلاقى واحد من لناس بيعمل صيانة معاهم ومش ارتاح وحصل مشكلة بيطلع فبيطلع ويقولك التوكيل مش كويس واوعى تتعامل معاه وكذااا
فاحسن حل بجد انزل اى مركز تبع مودرن واسال ملاك العربيات اللى موجودين هناك وبيعملوا صيانات عن اخبار التوكيل معاهم واطلب كمان من اى مهندس يدخلك قسم الصيانات واتفرج عليهم وهما بيعلوا الصيانات واعتقد ده مش ممنوع وحقك وتبقا كدا اطمنت

---

كلامك منطقي جدا و باحييك عليه
و انا نفسي قلت عن تجربتي الشخصية وقلت انا مش عايز حتي احكي او اتكلم عنها لحد لما اهدي و اقرر بهدوء مين اللي غلطان

مفيش أخبار جديدة لسه يا دكتور ؟

اقتباس:

---

المشاركة الأصلية كتبت بواسطة ahmadelsaeed

مفيش أخبار جديدة لسه يا دكتور ؟

---

أكيد فيه جديد يا باشا :E_braces[1]:

انا هعمل موضوع تاني دلوقتي عن الاستلام يا ريت حضرتك تشرفني وتشوفه

اسف اني اتاخرت بس النت عندي كان بايظ ولسه راجع

بكل تأكيد ما حدث مع حضرتك يدعو الريبة و الشك و يزرع عدم الثقة فى التوكيل فيما هو أتى مستقبلاً و لكن على أية حال الأفضل ان تتنتظر و تأخذ اللون المفضل لك لأنه مش كل يوم الواحد بيشترى عربية و مبروك مقدماً لحضرتك