عاجل ...مفاجأة سيئة من توكيل سوزوكي ... ماذا تفعل لو كنت مكاني ؟

**Dr_Smart** · 10-10-2009 07:32 AM

انا حاجز سوزوكي sx4 سيدان من مودرن موتورز ( توكيل سوزوكي ) فرع مدينة نصر يوم 15/9/2009 وقالولي الاستلام خلال اسبوعين ... وفلوسي كانت جاهزه كاش وكان ممكن أستلم فوري من أي معرض بره بس قلت خليني مع التوكيل هيبقى أضمن .

المهم كلمت التوكيل قالي ان شاء الله تستلم يوم الاحد ( اللي فات ده ) 4/10/2009 او الاتنين

كلمتهم تاني يوم السبت قاللي معلش العربيه لسه ماجاتش من اسكندريه لسه ماخدتش الافراج الجمركي وان شاء الله تستلم يوم الاربع او الخميس

قلنا ماشي ... كل تأخيره وفيها خيره ... كلمتهم يوم الاربع قالي العربيه وصلت ابو رواش وهيتعملها ال PDI وهتستلم الخميس 8/10

يوم الخميس .. وهي دي المفاجأة العجيبه الغريبه ... مسؤول المبيعات كلمني قالي للأسف حصل خطأ غريب ... كان المفروض هيوصلهم عربيتين واحده سيلفر ( بتاعتي ) وواحده نبيتي
العربيتين اللي وصلو بقى كانو واحده شامبين وواحده سودا
طيب ازاي حصل الكلام ده ؟؟؟؟؟؟ قالي والله انا كمان اتفاجئت ومش عارف ... بيقولي لقيو السيلفر والنبيتي راكنين جوه فاضطروا يطلعوا اللي بره وكانو شامبين وسودا !!!! طبعا مش عارف أقول ايه الحقيقه استهتار يصعب التعليق عليه

طيب والناس هتركبوها ألوان على مزاجكم ؟؟؟ قالي حضرتك شوف اللونين الموجودين لو عجبتك كان بها لو عايز السيلفر يبقى استنى كمان أسبوعين !!!! هل حد عنده تفسير منطقي للي حصل ده ؟؟؟

المفروض النهارده ( السبت ) هروحله المعرض عشان نتفاهم ونشوف هنعمل ايه ... بس بيقولي ممكن يستعجلوها واستلمها بعد اسبوع .

انا دلوقتي في حيره شديده جدااااااا وأرجوكم تنصحوني ... ماذا تفعل لو كنت مكاني ؟؟؟؟

انا في دماغي عدة تساؤلات :

1- طبعا اللي حصل ده يدل على ان مفيش متابعه و ان فيه استهتار بالعميل ودي بادره لا تبشر بالخير في التعامل مع التوكيل ده .

2- هل ممكن تكون دي حاجه مقصوده للتخلص من عربيتين مركونين بقالهم فتره ؟؟؟؟؟؟ كل شيء وارد في مصر ... ازاي بقى أتأكد من سلامة العربيه اللي هستلمها .. لأن العربيتين دول تاريخ صناعتهم 8/2008 وهما موديل 2009 يعني ممكن يكونو مركونين في الشمس ومتهانين في التخزين .

3- لو قلت ماشي هستنى اسبوع كمان ... ايه اللي يضمنلي حقي ؟ هل ممكن يكتبو وصل بمعاد الاستلام وغرامة تأخير عن كل يوم زياده ولا دي هتبقى بدعه في سوق السيارات المصري ؟
خصوصا اني مستعجل جدا لأني مشغول في ظروف امتحاناتي وصاحب بالين كداب ... الانتظار ده عاملي قلق ومش عارف أركز .

4- هل كان المفروض عملت شكوى وكبرت الموضوع ؟ أنا قلت خلينا بالحسنى لعله يكون خير .

أنا اتضايقت جدا وبفكر بجديه أسترد مقدم الحجز لأني مابقتش مرتاح نفسيا بسبب الموقف ده .

اسف عالاطاله ... بس ربنا يعلم انا قلقت قد ايه وحاسس ان العربيه دي مش من نصيبي وعلى أي حال الحمدلله وربنا يكتبلي اللي فيه الخير حيث كان .

**hani945** · 10-10-2009 08:33 AM

أنا شايف إن حضرتك ممكن تستنى شوية كمان وتاخد اللون اللى حضرتك عاوزه
بس هما كده بيخلوا العميل يضايق منهم وياخد عنهم فكرة وحشة والحاجات دى ساعات بتخلى الناس تتنباً بحاجات مش كويسة قدام بالذات بخصوص الصيانة والمعاملة مع التوكيل ، المفروض إنهم يوفروا اللون اللى حضرتك طلبته ، صاحب العربية بيحب ياخد العربية باللون اللى هو عاوزه ، مش اللى بيفرضه عليه التوكيل .
لكن العربية ممتازة ، واختيارك موفق إن شاء الله ، فمتخليش الحاجات اللى زى دى تعكنن عليك .
بس فيه نقطة حضرتك وضحتها أنا مكنتش واخد بالى منها وهى إن تاريخ صنع العريية 8/2008 ودى يخلى الواحد يتخيل شكل العربية وهى مرمية فى الشمس والتخزين السئ ، بس على فكرة أغلب العربيات اللى فى مصر بتتخزن بالطريقة السيئة دى يعنى ساعات أنا كنت بشوف العربيات مرمية فى الشمس والرطوبة فى الصيف ، وفى الشتا تحت المطر والتراب مغرق العربيات ، يعنى عادى ، هتعمل إيه بقى ..

**hani945** · 10-10-2009 08:35 AM

مش المفروض إن طالما العربية موديل قديم من 2008 يبقى تخفيض فى السعر
حضرتك جبت العربية بكام وإيه المواصفات بتاعتها ، وياريت حضرتك تعمل لنا تقييم عن العربية وبالصور لما تستلمها إن شاء الله
وألف مبروك مقدماً وبارك الله لك فيها

**Dr_Smart** · 10-10-2009 08:52 AM

المشاركة الأصلية كتبت بواسطة hani945

أنا شايف إن حضرتك ممكن تستنى شوية كمان وتاخد اللون اللى حضرتك عاوزه
بس هما كده بيخلوا العميل يضايق منهم وياخد عنهم فكرة وحشة والحاجات دى ساعات بتخلى الناس تتنباً بحاجات مش كويسة قدام بالذات بخصوص الصيانة والمعاملة مع التوكيل ، المفروض إنهم يوفروا اللون اللى حضرتك طلبته ، صاحب العربية بيحب ياخد العربية باللون اللى هو عاوزه ، مش اللى بيفرضه عليه التوكيل .
لكن العربية ممتازة ، واختيارك موفق إن شاء الله ، فمتخليش الحاجات اللى زى دى تعكنن عليك .
بس فيه نقطة حضرتك وضحتها أنا مكنتش واخد بالى منها وهى إن تاريخ صنع العريية 8/2008 ودى يخلى الواحد يتخيل شكل العربية وهى مرمية فى الشمس والتخزين السئ ، بس على فكرة أغلب العربيات اللى فى مصر بتتخزن بالطريقة السيئة دى يعنى ساعات أنا كنت بشوف العربيات مرمية فى الشمس والرطوبة فى الصيف ، وفى الشتا تحت المطر والتراب مغرق العربيات ، يعنى عادى ، هتعمل إيه بقى ..

المشاركة الأصلية كتبت بواسطة hani945

مش المفروض إن طالما العربية موديل قديم من 2008 يبقى تخفيض فى السعر
حضرتك جبت العربية بكام وإيه المواصفات بتاعتها ، وياريت حضرتك تعمل لنا تقييم عن العربية وبالصور لما تستلمها إن شاء الله
وألف مبروك مقدماً وبارك الله لك فيها

ربنا يبارك فيك شكرا جزيلا لرد سيادتك
هي عليها عرض حاليا ب 107 بدلا من 112

والله الحاجات دي ممكن تظهر بسيطه لكن ليها تأثير كبير في نفسية الواحد وانطباعه تجاه التوكيل خصوصا انك مش هتدفع مبلغ صغير والواحد مش بيجيب عربيه كل يوم
إضافه لكده قلة انتشار العربيه والكلام المحبط اللي بسمعه عن التوكيل يخلي أي حاجه صغيره تأثر فيا وتقلقني

على فكره العربيه موديل 2009 ولكنها تصنيع 2008 ... كل العربيات كده ... يعني السيراتو الجديده تقريبا ناس استلمتها موديل 2010 والتصنيع أساسا في شهر 4 و 5 / 2009 ويمكن قبل كده

بس أنا بتكلم عن ركنة العربيه في الجمرك ... يعني ممكن تكون العربيه بقالها شهور مركونه هناك وياعالم ظروف التخزين ايه ...

ربنا ييسر الامور ويقدم اللي فيه الخير

**blazer** · 10-10-2009 08:59 AM

لو مش مستريح ليها و تقدر تصبر على العربيه
اسحب فلوسك واستنى بدايه 2010 اكيد هيبقى فىه عروض كويسه فى معرض الاهرام وبدايه السنه الجديده

**zarkoor** · 10-10-2009 09:20 AM

كل تاخيرة وفيها خيره وكان دعاء الرسول الكريم "اللهم اجعل لى الخير حيث كان ثم ارضنى به)

بس عاوز حضرتك تفكر تانى فى موضوع اللون السيلفر و عموما الالوان الميتلك الفاتحة
عيبها انها بتتأكسد بسبب الشمس الحاميه بتاعتنا بسرعة ونوعا ما اللون بيطفى البهجه بتاعته اللى بتشدك وانت فى المعرض وخصوصا لما بيكون اضاءة المعرض سبوتات بيضاء ... كمان لا قدر الله الفاتح صعب انك تداوى الخرابش و الحكات اللى لايمكن تخلى منها شوارعنا ... ركز كده مع عربيه لونها فاتح وماشيه سنتين وللا تلاته وانت تعرف قصدى

عيب الغوامق الحر وبتترب بسرعه وكمان طفية اللون لو بتستعمل فوطة زفرة علشان بتئذى طبقة الدهان الشفاف اللى فوق اللون الاصلى بس لو بتلمعها بميه بس اللون عمره ما حيطفى

طبعا هى اذواق ...ربنا يقدملك الخير (على فكرة عربيتي شامبين بس ندمت بعد تلات سنين وبأطر اعمل واكس كل اسبوعين تلاته علشان اشيل طبقة الاوكسيد وكمان الخرابيش السطحيه)

**Dr_Smart** · 10-10-2009 09:41 AM

المشاركة الأصلية كتبت بواسطة blazer

لو مش مستريح ليها و تقدر تصبر على العربيه
اسحب فلوسك واستنى بدايه 2010 اكيد هيبقى فىه عروض كويسه فى معرض الاهرام وبدايه السنه الجديده

بس متهيألي العكس .. ان في بداية السنه الجديده هتكون موديلات 2010 نزلت وبالتالي الأسعار هتكون أغلى خصوصا انها عليها عرض حاليا من 112 الف ل 107 ( وده غالبا عشان يخلصو من موديل 2009 قبل السنه الجديده )

شكرا جزيلا على رد حضرتك ربنا يكرمك

**Dr_Smart** · 10-10-2009 09:55 AM

المشاركة الأصلية كتبت بواسطة zarkoor

كل تاخيرة وفيها خيره وكان دعاء الرسول الكريم "اللهم اجعل لى الخير حيث كان ثم ارضنى به)

بس عاوز حضرتك تفكر تانى فى موضوع اللون السيلفر و عموما الالوان الميتلك الفاتحة
عيبها انها بتتأكسد بسبب الشمس الحاميه بتاعتنا بسرعة ونوعا ما اللون بيطفى البهجه بتاعته اللى بتشدك وانت فى المعرض وخصوصا لما بيكون اضاءة المعرض سبوتات بيضاء ... كمان لا قدر الله الفاتح صعب انك تداوى الخرابش و الحكات اللى لايمكن تخلى منها شوارعنا ... ركز كده مع عربيه لونها فاتح وماشيه سنتين وللا تلاته وانت تعرف قصدى

عيب الغوامق الحر وبتترب بسرعه وكمان طفية اللون لو بتستعمل فوطة زفرة علشان بتئذى طبقة الدهان الشفاف اللى فوق اللون الاصلى بس لو بتلمعها بميه بس اللون عمره ما حيطفى

طبعا هى اذواق ...ربنا يقدملك الخير (على فكرة عربيتي شامبين بس ندمت بعد تلات سنين وبأطر اعمل واكس كل اسبوعين تلاته علشان اشيل طبقة الاوكسيد وكمان الخرابيش السطحيه)

هي المشكله مش في اللون قد ما انا مش متقبل الغلطه اللي التوكيل عملها ومش مرتاح للسبب الحقيقي ورا اللخبطه دي عشان كده هحاول اثبت على طلبي اللي طلبته من البدايه .

انا حسيت ان السيلفر مخليها تنطق والأحمر كمان رائع ... الأسود بتاعها باهت شويه مش مبهر زي عربيات تانيه خصوصا ان الشبكه الاماميه سودا ( هي عايزه شويه نواكل هتخلي الاسود عليها تحفه ) ... الشامبين برضو مدي على بيج اكتر مش دهبي حاسس انه ( عواجيزي ) شويه .

بالنسبه للخدوش انا في اعتقادي ان الخدوش بتظهر اكتر في الغوامق مش عارف رأي حضرتك إيه .

العربيه مواصفات خليجي اتمنى يكون دهانها محترم شويه ويتحمل الشمس والرطوبه

عموما ربنا يكرمك شرفتني بردك والله .

**mr_sameh** · 10-10-2009 10:29 AM

اسحب فلوسك واشتريها من اي معرض واستلمها علي طول

**zaza_lanos** · 10-10-2009 11:15 AM

على فكرة التوكيلات مشهورة بالحركة ده
وتقريبا التجار بيبقى ليهم الاولوية

الموضوع: عاجل ...مفاجأة سيئة من توكيل سوزوكي ... ماذا تفعل لو كنت مكاني ؟

LinkBack

أدوات الموضوع

عرض

عاجل ...مفاجأة سيئة من توكيل سوزوكي ... ماذا تفعل لو كنت مكاني ؟ - انشر الموضوع فى :

-

-

-

-

-

-

-

المواضيع المتشابهه

ماذا تفعل لو كنت مكاني ؟

ماذا تفعل لو كنت مكاني ؟؟؟

ماذا تفعل لو كنت مكاني

ماذا تفعل لو كنت مكاني !!!!!!!!!!!!!!!!!!!

ماذا تفعل لو كنت مكاني؟

الكلمات الدلالية لهذا الموضوع

المفضلات

المفضلات

ضوابط المشاركة