الموضوع: الجزء الرابع (بالصور الجديدة تقريرال5000 للجميلة برسونا)

جماهير و أعضاء المنتدى الجميل


بعد طول انتظار مرحبا بيكم فى الجزء الرابع تقرير صيانة ال5000 للسوبر ستار برسونا


أولا الصور الجديدة بس ماحدش يتخض لما يشوفها عشان احنا مادام عايشين فى مصر يبقى ده العادى و الحمد لله إنى ما حصليش حاجة كبيرة زى أغلب الزملاء

أول خبطة و الله يسامحه اللى كان السبب فيها

ده يفترض بيه أول خروش بس للأسف مش باين كويس عشان الشمس بس لو شفتوه تحسوا إنه معمول بسكينة مش بمسمار أو طوبة لأ معمول بمزاج يعنى

و دى أول تقشيرة دلوقتى بقى عندى منها 3 أو 4 تقريبا كلها بنفس الشكل كده و فى أماكن مشابهة مش عارف هل دى خبطات ولا عيب دهان؟

و دى صور العربية بشكل عام

و دى صورها من جوا

حبة Night Vision

نيجى لرحلة العذاب اللى بيسموها غلط صيانة ال5000

ابتدت القصة بمكالمة من أيمن:


أيوة يا سوما أنا فى التوكيل أدى النمرة لو عايز تحجز صيانة يوم الأربع


ما شى يا مون أنا هكلم داليا دلوقتى ميرسى على النمرة باى


باى


كلمت داليا و حجزت و كان أيمن واقف قدامها بيأكد الحجز بتاعى و سألتنى إيه المشاكل اللى عندى اللى عايز أكشف عليها بالمرة


الحقيقة المرة دى عندى مشاكل


1- المالتى فانكشن مش بيعلق بس ده بقى بيستعبط


2- تقل الفتيس و العضة اللى فى التانى و الاتنين دول من أيام صيانة ال1000 بس للأسف ماعملتهمش ساعتها


3- الباب بتاع السواق خلاص ما بقاش له دعوة بباقى العربية و لا الريموت لا فى الفتح و لا فى القفل و لا فى الأوتو لوك بيشتغل بس مانيوال أو بالمفتاح


4- الزجاج بتاع السواق برده فى صوت سيىء وعالى فى القفل وفى الفتح


المهم سجلت كل ده و قالتلى تمام معادك يوم الأربع الساعة 10 ص


روحت قدمت على أجازة فى وقتها و الحمد لله اتوافق عليها على الرغم من زنقة الشغل و إنها جاية مباشر بعد أجازة 6 أكتوبر إنما الحمد لله ربنا ستر و أخدتها.

اليوم الكبير


صحيت اليوم ده حوالى الساعة 7 بجد مش حاسس إزاى أبقى واخد أجازة و أصحى كده بس كله نصحنى عشان أيقى هناك بدرى و فى معادى لازم أنزل على الأقل 7:30 عشان المحور بقى زى الزفت و عمرى ما هلحق أروح بعد ما ابتدت المدارس و الجامعات


المهم نزلت فعلا 7:30 و معايا اللاب توب بتاعى عشان القعدة المتوقعة و مشيت


الدنيا كانت ظريفة و فاضية لحد ميدان لبنان مع العلم أنا أصلا ساكن فى المهندسين فالبظبط 5 دقايق كنت هناك بس أول ما طلعت المحور ما كانش فى حركة أصلا و حمدت ربنا و دعيت للى نصحنى إنى أنزل بدرى ربنا يجازيه خير على النصيحة الجميلة و بعد 10 دقايق ما اتحركتش فيهم 100 متر على بعضهم فجأة السكة فتحت و بقدرة قادر لقيت نفسى فى التوكيل الساعة 8:50 طبعا برده الحمد لله على كل شىء لقيت الباب بتاع الصيانة مقفول و واقفة قدامه عربيتيتن جين و أنا التالت بعدين جت ورايا واجا و برسونا الناس كلها نزلت تفطر و تجيب عصير و أنا شغلت اللاب توب و حبة نت لحد ما فتحوا الباب على الساعة 9:00 كده و دخلوا أول عربيتين و ماكانوش حاجزين فروحوا و اتسألت: حاجز يا أستاذ


طبعااااااااااااااا


خلاص اتفضل تحت التنده


ركنت و دخلت على المهندسة إيمان بصت على جدول الحجز و سألتنى على اسمى و بتدور ...................


و الصدمة الأولى مالقيتش اسمى


أنا طبعا اتخضيت مش هينفع آخد أجازة تانية و مش هعرف أرجع الشغل المهم أنا اتلجمت شوية و بعدين فتحت على الرابع و الله أنا حاجز و معادى الساعة عشرة أنا مكلم داليا يوم الاتنين الصبح و كان ليا صديق هنا كمان فى التوكيل بيحجزلى بنفسه


المهم كلمت المهندس أحمد هو راجل لا تقدر تقول عليه محترم أوى و لا تقدر تغلط فيه مسك العصاية من النص معايا و ابتدى الكلام


اسم حضرتك مش موجود فى جدول الحجز و ماحدش هيحاسبنى لو ما دخلتكش صيانة و عموما داليا ليها مدير تقدر تشتكيه بس أنا مش هكدبك انت كنت حاجز والغلط عندنا فيه إيه غير الصيانة بتشتكى منه


رصيتله الأربع عيوب


فرد عليا:


خلاص حبة عليك و حبة علينا انت بالنسبة لى مش حاجز فأنا هعملك الصيانة و أكشفلك على السنتر و الزجاج على أساس إنهم الأهم تمام؟؟؟؟؟


و طبعا ده ماكانش سؤال مستنى أى جواب ده موقف اتفرض عليا يا أوافق يا مش هتدخل العربية أصلا


قلت فى نفسى خلاص العربية تتعمل الأول و لما تيجى داليا و المهندس آمر يبقى ليا كلام تانى


و دخلت العربية و روحت أنا على داندى مول حبة شوبينج فى كارفور شوية حاجات للعربية بقى ما دلعتهاش من ساعة ما جت (شماسة/ معطر جليد/ موبيل هولدر/ سى دى هولدر) يعنى حاجات من دى و رجعت تانى بعد ما جبت فطار على استراحة الموظفين اللى عندهم دى


قابلت العضو سارى ربيع كان بيعمل صيانة ال15000 بصراحة شخصية رائعة و الحديث معاه متعة فعلا قعدنا نتكلم عن عربيته و عربيتى و دخلنا على الويب سايت شوية نبص إيه الأخبار


و ما بين كل 5 أو 10 دقايق نخرج نتابع أخبار العربيات لقيت عربيتى واقفة بره سألت المهندس أيمن ايه اللى تم فيها قاللى عملوا شغل الميكانيكا و كشفوا على الزجاج لسه السنتر و كان هو بنفسه ثبتلى الاكصدام الأمامى ربنا يباركله من غير ما يضيفه على أمر الشغل عشان كان اتلط منى فى ركنة


و أخيرا بضرب بعينى كده لقيت داليا دخلت و أنا عامل حسابى على خناقة و بعد ما فكرتها بنفسى و قلتلها الموضوع اعتذرتلى و قالتلى إنها حجزتلى خدمة لأيمن و ماكانش فى مكان اليوم ده و عشان كده ما قدرتش تضيفنى على الجدول بشكل رسمى و لما حكيت لأيمن ما علقش فما قدرتش أحرجه معاهم وتقبلت الموضوع


بعد كده دخلت العربية الورشة تانى و طلعت سألت إيه اللى اتعمل المرة دى قالولى السنتر و كده خلاص


راجعت السنتر شغال تمام الحمد لله والإزاز لقيته لسه بيعمل صوت بس بصراحة صوت مختلف عن الأولانى و لما سألت قالولى المكنة محتاجة تتغير و الحقيقة و كالعادة مش موجودة دلوقتى بس تابع معانا بالتليفون و احنا أول ما هتيجى هنكلمك


طبعا أنا ما صدقت روحت سلمت على محسن صالح و روحت علطوووووووووووووول


كانت الساعة 4:30 يعنى يوم شغل كامل و يمكن أكتر كمان

نيجى للتكلفة اللى تهم ناس كتير 282 جنيه متقسمة كالتالى
45 جنيه فلتر زيت/ 96 جنيه 4ك زيت/ 115 جنيه مصنعية/ 10% صريبة على كل اللى فات

بشكل عام بعد الصيانة مش حاسس بفرق كبير أوى مش زى إحساسى بصيانة ال1000 يمكن تكون تكتيفة الموتور فكت أكتر لكن ما بحسش بيها غير لما أقرص على الغيار


صوت الموتور حاسس إنه بيعلى مع كل صيانة مش عارف إذا كان بيتهيألى و لا بجد


أما معدل استهلاك البنزين فلسه ما حسبتوش إنما هو كان قبل الصيانة بيعمل تقريبا من 9.5 ل 11 كم لكل لتر و ده طبعا فى وسط البلد و مع التكييف مش عارف كده كويس و لا عالى يا ريت حد يفيدنى؟


و أشوفكم إن شاء الله فى صيانة ال10000

مبروك عليك الصيانة بالرغم من الصعوبات الى قبلتك يا هيثم

ومتزعلش خالص هو توكيل الصحراوى مقرف حبتين مفيهوش نظام محكم ولا دقة فى الاداء وهرجلة فى المواعيد هو ميزته فى تغيير قطع الغيار بس وياريت اصلا تلاقيها

ايه ده ده انا متحامل على التوكيل قوى

اه بصراحة

لما تيجى كمان مع اعز الناس يبقى لازم اقول رائ بمنتهى الصراحة

وانا هكرس مجهودى الفترة القادمة ان شاء الله

فى حس التوكيل على توافر قطع الغيار

واصبره عليا - يا انا يهما

ولما تكون عايز تعمل صيانة فى روقان وكل حاجتك تتعمل عليك بفرع العجوزة - وراء مسرح البالون - ده مختلف كلياً

وربنا يوفقك يا هيثم ويحفظهالك ويبارك فيك