الموضوع: عربيتي الكليو طلعت عاملة 220,000 كم !!!!!!!!

فعلاً زي ما العنوان بيقول.......إكتشفت إن عربيتي عاملة 220ألف كم !!!!

بدأت القصة من ثلاث سنين تقريباً عند شرائي للسيارة وهي من المفترض عاملة 58ألف كم وإصراحة العربية حالتها كانت زيرو من الداخل ومعظم الخارجي ومازالت ما شاء الله ولم أشك بها إطلاقاً.......وبعد شرائي لها بإسبوع واحد فقط طلمبة البنزين إتحرقت وغيرت موتورها الحمد لله بسهولة......... بعد حوالي 7 شهور ظهرت مشكلة بأحد صبابات البنزين وتم حل المشكلة ولله الحمد وكنت مستغرب إزاي عربية عاملة حوالي 70ألف كم تظهر فيها مشكلة زي دي وقولت قدر الله ما شاء فعل ودي سعات بتكون من ذنوب الواحد.....
المهم على مدار السنتين العربية زي الفل ولله الحمد.....بس كان في مشكلة بتظهر عندي كل فترة والاحظها عند تغير فلتر الهواء...وجود زيت موتور بكمية كبيرة على الفلتر ومن خلفه في المانافولد في بركة زيت كبيرة ممكن تملى كوب وكل مرة الميكانيكي يقولي إيه كمية الزيت الرهيبة دي...المكنة دي شكلها خفيفة....وأقوله خفيفة إزاي والعربية سحبها ما شاء الله قوي جداً والمفروض إنها جديدة
مع الوقت بدأت ألاحظ نقص في مستوى الزيت...يعني ممكن أضيف كيلو زيت في فترة الـ10الف كم....كل ده مش مأثر على شيء في العربية وهي حمالة أسية فعلاً
من حوالي 6 شهور ذهبت إلى الميكانيكيون العرب لتغير أحد كاوتش الكوبلن....عامل الإستقبال وهو بيكتب رقم العربية قالي "أستاذ يحيى ؟"..قولتله لأ..وإفتكرت إن الراجل إلي أنا شاري منه إسمه يحيى ...المهم بإختصار إكتشفت إن العربية عداد السرعة فيها باظ عند الـ100ألف والعدادات كلها إتغيرت.....يعني أنا كنت شاري العربية وهي عاملة 158ألف كم
فهمت أنا كده حوار الطلمبة والصباب والزيت عشان يستحيل الحاجات دي تظهر في عربية أقل من 100ألف كم

الحمد لله وقدر الله ما شاء فعل وأنا مسامح الراجل الي بعهالي لأن العربية فعلاً عمرها ما خذلتني وكل الحاجات إلي ظهرت فيها دي بفضل الله كانت سهلة في الوقت والتكاليف في معالجتها ومش ندمان لحظة إني إشترتها والعربيات دي فعلاً فيها شىء بيجذبك ليها ويخليك تعشق ركوبها

العربية دلوقتي عاملة 220,000 كم !!!!!!
طبعاً مشكلة الزيت دي بدأت تزيد مؤخراً ولحظت ضعف في سحب العربية وصوت تنقير بسيط جداً مسموع من الموتور

المهم أنا قررت من حبي للعربية دي أجبلها إن شاء الله موتور إستيراد جديد.....مش هجيب موتور كامل..لأ..هجيب بلوك ووش سيلندر فقط عشان الإكسسوارات عندي سليمة وعشان أقلل من التكلفة ولو لقيت الموتور الكامل على أد الميزانية ممكن أشتريه

أول خطوة هتبداْ إن شاء الله بالذهاب إلى بورسعيد ونظرة خاطفة على الماكينات.......همتك معايا يا حج أيمن لو تقدر تساعدني في الموضوع ده لأني عارف حبايبك في موضوع الإستيراد ده كتير

اللهُ المستعان