الموضوع: عيوب الداستر من وجهة نظر ملاكها

سيبك من موضوع قطع الغيار دة العربية لسة ضمان

المشاركة الأصلية كتبت بواسطة shawkylotfy

سيبك من موضوع قطع الغيار دة العربية لسة ضمان

طب افرض سيادتك لا قدر اللة سوء استخدام الحل يبقي ايه

المشاركة الأصلية كتبت بواسطة stonecoldmido5

مساء الخير لاقيت ناس كتير خايفة من الداستر باعتبارها عربية جديدة و لسه نازلة و لاقيت ناس اكتر بتسأل علي عيوب العربية بعد مدة من الاستخدام و علشان كدة حبيت اعمل الموضوع ده علشان نقدر نفيد الناس المترددة في شراء العربية من خلال عرض اهم عيوب العربية من وجهة نظرهم اللي واجهت مالكي العربية في المنتدي مع تحديد عدد الكيلومترات المقطوعة و ارجو مشاركة من جميع .
و خصوصا ان ملاك العربية بيشكروا فيها جدا فعلشان كده عايزين نطمن الناس من خلال عرض مشاكل العربية علشان انا عارف ان معظم الملاك مواجهتهمش عيوب كبيرة و هبدأ بنفسي من وجهة نظري العربية عاملة 9 الاف كيلو موديل 2012 و اهم عيوبها من وجهة نظري :

1- العربية بتتهز شوية بعد 160 كم .
انا ما حسيتش بأى اهتزازت واضحه عند 160 ك فى فيديو انا رفعته لاختبار التسارع على 160 فى الصحراوى وفى واحد تانى عند سرعه 200 فى الخارج ممكن تراجع التوكيل لو عندك مشكله .
2- قطع غيارها لسه مش موجودة في السوق لغاية دلوقتي .
حتى لو موجوده افضل ما تخليش ميكانيكى او كهربائى عادى يحط ايده فيها للحفاظ على السياره .
3- بتفتقر شوية لبعض كماليات السيدان مثل (مفيش لوحة تحكم للسائق في زجاج السيارة - مفاتيح التحكم في زجاج السيارة في اماكن غريبة - مفيش اماكن تخزين في العربية- مبيظهرش اتجاه الاشارة في التابلوة - غطاء التانك الخارجي للبنزين مفتوح علي طول و الداخلي لازم يتفتح بمفتاح العربية )
السيارهcrossover SUV ليست من النوع السيدان
لذلك معيار القوه والمتانه يضفى على الرفاهيه . اماكن التحكم فى الزجاج الامامى فى الطابلوه والزجاج الخلفى فى الكنسول . بيظهر ضوء الاشاره فى الطابلوه لكن ما بيحددش يمين او يسار زى سيارات كتير . اماكن تخزين انا موش فاهم ايه تقصد بالتخزين ؟
4- الخامات الداخلية مش عالية اوي زي الفلوانس .
فعلا موش ذى الفلوانس فى الرفاهيه بس هى قويه التحمل .
5-الفيبر الاسود العازل بين التابلوه و الماتور واضح و خارج شوية من التابلوة و ممكن اي حد يلاحظة.
انا فعلا ما لاحظتش الموضوع ده
6- صاج العربية خفيف شوية مقارنة مثلا مع الكارينز .
ما تقارنش بالكارينز لانها زى البطه فى المشى انا جربت الفرق الصاج قوى وتستعمل فى الخارج فى الطرق الوعره وغير الممهده شركه داتسا المصنعه للسياره تتميز بالسيارات قويه التحمل من عام 1960
7- سحب العربية مخنوق شوية في التلات نقلات الاولي .
انا حسيت بالخنقه فى النقله الاولى فقط حتى عرفت انه بتطلع بالسياره من النقله الثانيه زى ما الكتالوج بيقول فأصبح السحب رائع دلوقتى بدايه من الطلعه على الثانى اعتقد انك لازم تراجع مركذ الصيانه لو فيه مشكله فى النقلات
ودي اغلب عيوب العربية من وجهة نظري وكلها عيوب مش جوهرية و ممكن يختلف عليها ملاك العربية و الله انا كمان جاي علي العربية جامد بس دي ملاحظاتي و في انتظار آراء ملاك الداستر في المنتدي.

شكرا لسيادتك و عندي بعض ملاحظات :
1- بالنسبة لي العربية فيها بعض الاهتزازات بعد 160 و نفس الوضع مع اصحابي بس حضرتك ممكن متحسش بيها اوي لانها مش ملموسة اوي لان كان معايا مرسيدس ومكنتش بحس بالوضع ده ونفس الوضع بالنسبة للاسبيرانزا516 و كلهم سيدان .
2- لا قدر اللة افرض فانوس اتكسر او حتي فانوس اشارة طبيعي هنلجأ للتوكيل و طبعا السعر ازيد بكتير من القيمة الحقيقية .
3- انا قصدي اما اقارنها بعربيات سيدان بالنسبة لسعرها انا متدخلتهاش مقارنة مع عربيات من نفس الفئة (ك-روساوفر) لانها احسن عربية في الفئة بتاعتها انا بتكلم اما تتقارن بعربيات السيدان من نفس السعر مع فروق الكماليات و في ناس متفرقش معاها دفع رباعي .
4- اقصد باماكن التخزين الداخلية زي مكان للنظارة او مكان للمفاتيح و الموبايل ( طبعا ماقصدش الشنطة ) .
5- الفايبر الاسود ده انا شوفته في كذا عربية قبل الشراء علشان اتأكد ان كله كده كأن السوجي مقصش الحتة الزيادة .
6- بالنسبة للصاج انا اقصد الامان لان العربية حققت 3 من 5 في اختبارات الامان اما الكارينز 4مثلا .
7- مفيش مشكلة و اتفق مع حضرتك ان الغيار التاني احسن بس انا بقارنها بعربيات سيدان العادية و خصوصا بالنسبة للناس اللي نفسها تغير من سيدان الي كروس اوفر او suv .
واشكر حضرتك علي اهتمامك

اخوانى الاعزاء (Gogo & Stonecold) كلامكم انتوا الاتنين صح - العربية فيها شوية نقص امكانيات (رفاهية فقط) و بها غنى فى القوة و الاداء و المقابل المادى - فعلا لغاية دلوقتى العربية مش منتشرة الانتشار اللى تستحقة و فعلا الناس خايفة تشتريها لكن مع الوقت سمعتها هتزيد و انتشارها هيزيد و بالتالى قطع الغيار هتبقى متوفرة.
لكن فى ناس تانية تقولك لأ صالون العربية الفلانية اشيك و يروح يشتريها بغض النظر عن قوتها و متانتها

هو من وجهه نظرى الداستر عربيه عمليه جداً و جاءت بناء على دراسه ممتازه للسوق و احتياجه الى سياره دفع رباعى و suv و ١٦٠٠ سى سى و موتور و انظمه تعليق ممتازه و فيها وسائل امان و تقفيل جيد جدا و فى نفس الوقت ماركه محترمه و بسعر ممتاز لا يوجد له منافس فى الفئه السعريه دى و طبعا كان ده على حساب الرفاهيه الى حد ما زى الاتوماتيك و الحاجات اللى الناس ذكرتها فى الردود السابقه و الكماليات اللى موجوده فى السيدان و ان كانت رينو قادره تعمل الكلام ده طبعا و موجود فى الفلوانس على الاقل لكن الهدف ان السعر يفضل ممتاز و فارق عن المنافسين بكتير و كمان باعطال اقل علشان تكنولوجيا معقوله مش معقده اللى كانت بتزهق الناس من السيارات الفرنسيه بصفه عامه و بكده هى تكون استحوذت على السوق فى الجزء ده .و كمان بتنافس فى الاجزاء الاعلى و الاقل.

المشاركة الأصلية كتبت بواسطة land_cruiser

هو من وجهه نظرى الداستر عربيه عمليه جداً و جاءت بناء على دراسه ممتازه للسوق و احتياجه الى سياره دفع رباعى و suv و ١٦٠٠ سى سى و موتور و انظمه تعليق ممتازه و فيها وسائل امان و تقفيل جيد جدا و فى نفس الوقت ماركه محترمه و بسعر ممتاز لا يوجد له منافس فى الفئه السعريه دى و طبعا كان ده على حساب الرفاهيه الى حد ما زى الاتوماتيك و الحاجات اللى الناس ذكرتها فى الردود السابقه و الكماليات اللى موجوده فى السيدان و ان كانت رينو قادره تعمل الكلام ده طبعا و موجود فى الفلوانس على الاقل لكن الهدف ان السعر يفضل ممتاز و فارق عن المنافسين بكتير و كمان باعطال اقل علشان تكنولوجيا معقوله مش معقده اللى كانت بتزهق الناس من السيارات الفرنسيه بصفه عامه و بكده هى تكون استحوذت على السوق فى الجزء ده .و كمان بتنافس فى الاجزاء الاعلى و الاقل.

معلهش اختلف مع حضرتك ان الداستر استحوذت علي السوق بدليل ان سيادتك هتشوف الكيا الاسبورتاج انتشرت في وقت قياسي بالاضافة الي الكارينزو التيجو , لا لسه طبعا ماستحوذتش علي السوق في مصر علي الرغم من جدارتها في استحواذ السوق المصري بدليل انتشارها في السوق العالمي و اقل نسبة عيوب ظهرت في فئتها علي مستوي العالم . و شكرا طبعا لسيادتك

المشاركة الأصلية كتبت بواسطة stonecoldmido5

معلهش اختلف مع حضرتك ان الداستر استحوذت علي السوق بدليل ان سيادتك هتشوف الكيا الاسبورتاج انتشرت في وقت قياسي بالاضافة الي الكارينزو التيجو , لا لسه طبعا ماستحوذتش علي السوق في مصر علي الرغم من جدارتها في استحواذ السوق المصري بدليل انتشارها في السوق العالمي و اقل نسبة عيوب ظهرت في فئتها علي مستوي العالم . و شكرا طبعا لسيادتك

عايز بس اوضح لحضرتك نقطه مهمه و هى انها ملهاش دعوه بالاسبورتيج لسببين اولا انها مانيوال و جر رباعى بينما الاسبورتيج اتوماتيك و جر امامى ثانيا علشان فرق السعر الرهيب اللى هو يقرب من ٤٠ الف جنيه بينها و بين اقل فئه فى الاسبورتيج من غير اوفر برايس كمان و كذلك بينها و بين القشقاى المانيوال و الجر الامامى ٣٠ الف و برضه فرق سعر كبير و اللى انا اتكلمت عليه تحديدا هو رينج سعرها مفيش حاجه معاها فيه غير التيجو اللى حضرتك ذكرتها و ان كانت اقل منها فى السعر برضه بمبلغ كبير و دى موجوده بقالها كذا سنه و يمكن ده سبب الانتشار اللى حضرتك بتقول عليه مع توكيل سىء و شكاوى كتير و اكيد لا تقارن بالداستر و توكيل رينو و ارجو ان ده يكون وضح لحضرتك الصوره