الموضوع: تقييم اداء FRV Cross او FSV من ملاكها

انت دور في مشاركات الاخوة هتلاقي تقييمات الاعضاء و وملاك البريليانس عالي خالص
انا حبيتها ودفعت مقدمها وحجزتها من غير ما اشوفها
ده بعد استخارت ربنا ثم عدم وجود اي شكاوي من السيارة
العيوب الوحيدة قطع الغيار اسعارها عالية وسعر اعادة البيع مش في صالح مالك السيارة

استاذ sonson56 انا معاك فعلا في اللي انت بتقولوا وانا اخترت البريليانس على قناعة برده مش علشان السعر فقط واهم سبب عندي هو ليه انا افضل حارم نفسي من امكانيات عربية متاحة ليا علشان خاطر الناس والبيع بعد كده ؟؟؟؟؟ انا دورت على عربية في نفس السعر وبنفس الامكانيات لم اجد والاهم ان كل اللي جرب البريليانس لم يشتكي من كفاءتها وانا رأي ان العربية دي مع الوقت هتاخد وضع تاني لو فضل تصنيعها على نفس الجودة وفضل يتطور مع تهدئة اسعار قطع الغيار

مشكووووووووووووور sonson 56 على النصائح الحلوة

المشاركة الأصلية كتبت بواسطة sonson56

و بعدين مش يمكن لما تحب تبيعها بعد عمر طويل تكون اتعرفت و الناس بتتهافت عليها و سعرها زاد و ما يخسرش كتير و تكون ركبتها و اتمتعت و استفدت بيها و بأمكانياتها اكتر من فرق السعر بعد البيع . ربنا يباركلك فيها - بالمناسبة و انا بقرأ فى الكتالوج بتاعها النهاردة لقيتهم كاتبين ان أداء السيارة بيختلف كتير للأحسن بعد مسافة 2500 كم . أتطمن و على مهلك و سخن كويس لمدة دقائق فى فترة التليين قبل ما تطلع و ما تقرصش عليها و ما تمشيش بسرعة اكتر من 80 كم / ساعة الكلام ده مكتوب فى الكتالوج و ما تخليس ال آر بي إم اكتر من 2500 لفة و ما تسمعش كلام الناس اللى بتفتى احسن انا سمعت كلام عجب - اللى يقوللك ما تسخنش السيارة السيارات دى ما بتتسخنش و اللى يقول امشى يا عم على 100 - 120 انشالله حتى على 150 فتّح الموتور ما يهمكش المواتير دى متلينة و اللى يقوللك حمّلها و اجرى ولا يهمك دى مواتير حديثة الكلام ده كان زمان- من الآخر دى عربيتك انت و الفتايين مش هيخسروا حاجة لو باظت و لا عمر الموتور قصر - اسمع كلام الكتالوج بس و الكلام الناس العاقلة زى مشمش باشا و ربنا يباركلك فيها يا رب .

يا جماعه اللي بيتكلم عن سعر اعادة البيع , و الله فكرت و انا باشتري بنفس الطريقه بس لقيت حاجه مهمه , حد يقوللي سعر الاوكتافيا 5 كام مستعمل في احسن حاله و هيه تمنها جديد 160000 ؟ ما بيزيدش عن 85000 , حد يقوللي تمن ال باسات كام ؟ ما بيزيدش في احسن الاحوال عن 130000 و هي جديده 240000 , بلاش , حد يقوللي تمن bmw مستعمله موديل سنتين فاتوا الفئه التالته كام ؟ زوج خالتي اشتري بيجو 406 من سنتين عامله 30000 كم بس ب 100000 و هي كان تمنها جديد 220000 اوتوماتيك . الرينو ميجان اللي كان سعرها 127000 قدام عيني ب 65000 و تفاصل كمان , يعني اللي بيشتري عربيه جديده ما يفكرش هو هيبيعها بكام و ازاي من قبل ما يركبها و يتمتع بيها الاعمار بايد ربنا و الارزاق كمان يمكن ربنا يرزقك و يكون تمنها بالنسبه لك ملاليم و سعتها تقول اسيبها للعيال و لا لمراتي احسن من 50000 حنيه اللي هتجيبهم , انا لما اشتريت اول عربيه زيرو من 10 سنين و كانت لانوس قلت خلاص لا قبلها و لا بعدها تكييف و باور و زجاج كهرباء و سيبتها لمراتي و غيرت مرتين بعدها و لا فكرت في سعر البيع مستعمل برغم انه اول ما شتريت لانوس ما كان ليها اي تمن مستعمله دلوقتي اتفرج عليها مستعمله و الله اغلي من لما اشتريتها زيرو , خلاصة الكلام فكر في مميزات العربيه اللي هتشتريها و عيوبها و جهز نفسك ازاي هتتمتع بيها