ايه سر العلاقه النفسيه اللى بتخلى الواحد يرتبط بعربيته ارتباط وثيق ؟ السيد المهندس الفاضل سبعاوى كان اتكلم عن الموضوع ده فى منتدى كونتاكت من فتره بخصوص عربيته الشاهين و من المفارقات ان انا كمان معايا شاهين 1996 و هيا اول عربيه فى حياتى و اول عربيه اشتريتها و اتعلمت عليها مع العلم انى كنت بعرف اسوق ايامها بس كانت هيا اللى علمتنى اكتر و زودت خبرتى اكتر , انا فاكر يوم ما اشتريتها كانه امبارح و فاكر لما اشترتلها الفرش الجاد و الجنوط و الكاسيت و مشاوير الكهربائى و الميكانيكى علشان الصيانه اول ما جبتها و بدايه تعاملى مع الصنايعيه و محلات قطع الغيار لاول مره , و المواقف و المناسبات الاجتماعيه و العائليه الكثيره جدا سواء سعيده او حزينه اللى عاشتها معايا العربيه و مشاركتها فى افراح غالبيه شباب العائله و افراح اصحابى و فرحى انا شخصيا و مشاوير تجهيز الشقه قبل الفرح و المشاوير لمعارض الموبيليا ... ذكريات جميله :) ... كل ده ادى الى ان العربيه اصبحت جزء منى لا استطيع الاستغناء عنها و لا اطيق البعد عنها نظرا لكم الذكريات و المواقف اللى جمعتنا سوا و مع اعجاب كل اصحابى و اهلى دون استثناء بالعربيه و ثنائهم عليها علشان اهتمامى الغير محدود بيها و علشان اضافاتى البسيطه عليها خلتها مميزه جدا عن اى عربيه شاهين تانيه..... المشكله بقى ان من فتره و انا معجب جدا بالمتسوبيشى لانسر و نفسى ربنا يوفقنى و اجيب واحده مع العلم انه بفضل الله المبلغ متوفر و ممكن اجيبها بدون مشاكل بس كل ما احس ان الشاهين هتبعد عنى و هابيعها يحصلى ارتكاريا و ابقى حاسس انى هاموت من غيرها و بسبب ذلك حصل عدد من المواقف البايخه منى للناس اللى عايزه تشتريها و كل ما حد ييجى و يشوف العربيه و نتفق اقوم بعدها رافض فكره البيع علشان مش هاينه عليا ..... انا عارف انى دوشتكم بس كنت عاوز افضفض معاكم عن العربيه و ياريت ما تبخلوش عليا برايكم فى الموضوع ده و خصوصا السيد الفاضل المهندس سبعاوى ....... و لكم جزيل الشكر و الاحترام