الموضوع: وأنت بتبيع عربيتك ,, أتقى الله وماتكدبش !!!!!!!!!

السلام عليكم ورحمة الله وبركاته وكل عام وانتم بخير بمناسبة الشهر الكريم ..
الموضوع ده بصراحة أنا كنت عاوز اعمله من زمان لكل اللى بيفكر أنه يبيع عربيته المستعملة ..

أخى الكريم .. أتقى الله وما تحاولش أنك تكدب عشان تبيع وتخلص , قول على كل حاجة فى عربيتك بصراحة حتى ولو كان مسمار معوج فيها , حتى لو أنت راشش رفرف ولأ حتة صغيرة من العتب وشايف أنها مش هأتأثر على حاجة فى العربية فمتكدبش وقول بصراحة على كل اللى فيها ...
أعرف أن كل حاجة مكتوبة من قبل ما تتخلق عند الله عز وجل فى اللوح المحفوظ , ومش بكدبك ولأ أنكارك البيعة هتمشى , لأ .. دى مكتوبة لك من الأول وممكن متكونش مكتوب لك البيعة دى مع الشخص ده .
أعلم أن بركة ربنا أهم بكتير من كتر الفلوس اللى بتجى بالغش واللى اكيد ربنا مش هايبارك فيها لو جاية من غش الناس .

أتقى الله .. أنت مش قد كلمة حسبى الله ونعم الوكيل ..أنت مش قد ربنا وأتنقامه منك لظلمك لأخيك ..ومش لأزم أنه يكون اللى بيشترى منك مسلم زيك ولأ مسيحي زيك عشان ماتخشهوش , وأنما تذكر بأن الدين المعاملة وتذكر كيف كان يعامل المصطفى صلى الله عليه وسلم الناس كلها بالصدق والأمانة وهو عرف بذلك بين أهل مكة كلها بالصادق الأمين .
صدقنى أن ربك بالمرصاد ..وصدقنى أكتر أن فى ناس لما بتزعل جداً من اللى غشوهم بيجلهم مرض وممكن تموت فيها , وبكده أنت هتشيل ذنب اللى بعت له عربيتك وكنت سبب فى مرضه وموته أو ضيقته وخنقته ليوم الدين !!!!
أوعى تفتكر أنك قوى وأنك حواليك بلطجية وناس تحميك .. أنت مش أقوى من ربنا , وقادر يهلكك ويذلك زى ما ذل وأهلك جبابرة الأرض .
يا أخى الدنيا متفاتة ومش عشان شوية فلوس تافها تشيل ذنب و تخللى حد يدعى عليك ويقول ربنا لأ يبارك له فى المال اللى خدوا ..أنت مش قد دعوة مظلوم بيدعيها عليك لربنا فى جوف الليل .. طب مش الفلوس اللى أنت هاتخدها من بيع العربية دي هتشتري بيها عربية تانية وممكن تشترى بيها أرض أو شقة أو حاجة تانية , وأكيد هتأكل منها أنت وعيالك .!!!!!!!!!!!!
ريح ضميرك وأرضى ربك وأشترى أخرتك .. عشان ربنا يبارك لك فى كل حاجة فى الدنيا والأخرة ..ومتنساش أن الدنيا ما هى الأ ساعة من الزمن ثم بعد ذلك يوم القيامة والميزان ( من يعمل مثقال ذرة خيراً يره ومن يعمل مثقال ذرة شراً يره )
اللهم انى بلغت اللهم فاشهد .. وكل عام وأنتم بخير مرة اخرى ورمضان كريم

لازم نطلع من التجارب المؤلمه بدروس مستفادة و هى عدم الاعتماد على كلام البائع لانه ممكن يكون عارف المشاكل اللى فى العربيه و يخفيها عمدا و احتمال ايضا يكون ليس له درايه بالمشاكل اللى فيها نتيجه لانه ما بيفهمش فى الميكانيكا مثلا او عنده عربيه تانيه و بالتالى ما بيركبش العربيه كتير او ان حد تانى هو اللى بيركب العربيه غيره و الخلاصه انه سواء نيته كان سليمه او غير سليمه لابد من جهه المشترى انه يكشف على العربيه فى التوكيل اذا كان موديلها حديث او يرفعها حتى لو فى اكتر من بنزينه او مركز صيانه اذا كانت قديمه و ده لكى يطمئن الى الحاله الفعليه للسياره و ايه اللى سوف تحتاجه على المدى البعيد و القريب و ده هيفيد على الاقل انه يسعر السياره بسعرها الحقيقى بناء على الحاله الفعليه و للأسف فى ناس كتير ممكن تكسل او تستكتر مبلغ الفحص و تعتمد على مظهر البائع او وظيفته او حتى دخله و تقول اكيد عربيته هتبقى بحاله ممتازه على خلاف الحقيقه و تدبس بعد كده و يكتشف ان فلوس الكشف اللى وفرها ما تجيبلوش اى حاجه من اللى طلعت بايظه و لذلك اركز على النقطه دى لابد من الكشف الدقيق على السياره فى التوكيل او مركز صيانه معتمد او اكتر من مكان فى حاله الشك فى حاجه معينه و عدم الاعتماد على شخصيه البائع و كلامه او وضع اى افتراضات و جعل نتيجه الكشف على السياره فى مكان مضمون هى الفيصل الذى بناء عليه نتخذ قرار الشراء