طلب تسعير هوندا سيتى 2008

**jackson_75** · 01-09-2012 07:05 PM

السلأم عليكم ورحمة الله وبركاته
السيارة هوندا سيتى 1300 سي سي مانيوال , فابريكة برة وجوة ,فرش جلد , عداد 28 ألف كيلو , رخصة منتهية , وثيقة تامين ضد الحوادث باقى عليها 6 شهور .. كنت عاوز أعرف تعمل كام ؟!!

وهل هى أفضل من حيث الأداء وتوافر قطع الغيار وليس سعر أعادة البيع ولأ التويوتا الياريس أفضل ؟!!
وهل التكيف بيأثر على الموتور ؟!!!

شاكر جداً لحضراتكم وفى أنتظار الرد

**elpasha1** · 01-09-2012 07:53 PM

المشاركة الأصلية كتبت بواسطة jackson_75

السلأم عليكم ورحمة الله وبركاته
السيارة هوندا سيتى 1300 سي سي مانيوال , فابريكة برة وجوة ,فرش جلد , عداد 28 ألف كيلو , رخصة منتهية , وثيقة تامين ضد الحوادث باقى عليها 6 شهور .. كنت عاوز أعرف تعمل كام ؟!!

من 65 الي 70

وهل هى أفضل من حيث الأداء وتوافر قطع الغيار وليس سعر أعادة البيع ولأ التويوتا الياريس أفضل ؟!!

الاداء الهوندا اما قطع الغيار فالياريس افضل

وهل التكيف بيأثر على الموتور ؟!!!

معرفش

شاكر جداً لحضراتكم وفى أنتظار الرد

**jackson_75** · 02-09-2012 08:36 PM

ألف شكر لحضرتك ياباشا , وهو فعلا ً صاحبها طالب فيها 70 ألف .. بس بصراحة الأداء بتاع الموتور ال 1300 هو اللى مخلينى محجم عن البيعة ومتأخر فى تنفيذها لأنى شاكك فى أن الموتور ده هايستحمل السفر والبهدلة بتاعة الطريق مع التكيف ...!!!!!!!!!!!!!!!
ياريت لو حد عنده فكرة عن الموتور ال 1300 وأداءه يدلنى وينورنى ...

**3mr Farrag** · 05-09-2012 05:47 AM

معلش بس انا مش فاهم...
ما هي الياريس 1300 و السيتي 1300
ايه اللي خايف منه انها ما تستحملش
الياريس تكيفها كويس...بس الفرق بين العربيتين مش فرق في مواتير علشان تحس ان السيتي مش هتستحمل يعني!!!!

**jackson_75** · 05-09-2012 03:02 PM

بصراحة ماكدبش على حضرتك , أنا كان معايا الياريس من 5 سنين أول مانزلت مصر وكنت بحس أن سحبها ضعيف وتعبانة وعشان كدة بعتها وهى لسة 26 ألف كيلو يعنى كانت تعتبر زيرو وبصراحة نسيت أحساس قيادتها لأنى ركبت بعدها عربيات كتير متنوعة , بس أنا ما جربتش مواتير الهوندا وأعرف أنها أفضل من التويوتا بس اللى يخللى التويوتا تكسب أن قطع غيارها متوفرة ..
أنا عاوزأعرف الهوندا سيتى تسوى كام بالظبط مستعمل بنفس الحالة اللى كاتبها فوق .
وهل قطع غيارها متوفرة ولأ لأ , أنا ما يهمنيش غالية ولأ مش غالية . أنا بس عاوز أعرف سهل يتعمل لها صيانة ولأ صعبة , وكمان تكيفها هيبقى كويس ولأ تعبان لأن لو هانقارنها بالتويوتا الياريس فأصحاب الياريس بيشتكو من ضعف التكيف فى الصيف .........!!!!!!!!!!

**amr_lamor** · 06-09-2012 02:32 PM

الهوندا قطع غيارها غاليه جدا جدا بطريقه مبالغ فيها,,,وده عن تجربه ناس ركباها ,,,انا شايف الياريس افضل بس مش عارف ليه الناس بتقول تكييفها ضعيف مع العلم ان العربيه معانا وتكيفها ممتاز جدا

**jackson_75** · 06-09-2012 04:23 PM

ألف شكر ليكم ياجماعة ولردودكم , أنا بصراحة شايف أن سعرها مبالغ فيه جداً خصوصاً أن صاحبها كلمتوا تانى بالليل عشان أنزل معاه السعر شوية لدرجة مش هاتصدقوا أنى عرضت عليه 65 ألف وبكل غرور وتناكة يقولى لأ مش هابيع غير ب 69 ألف , ليه أن شاء الله طب دي مانيوال وكمان 1300 ياريتها حتى 1500 وأنا والله موتى وسمى التناكة والغرور عشان كده أنا كرهت البيعة دى وكرهت الفئة دى من الهوندا . أنا مش عارف بصراحة اللى بيبيع ده بيبقى فعلاً عاوز يبيع ولأ بيبقى عاوز يتسلى على خلق الله لأن هو مش غرمان حاجة , أعلأن ببلأش فى النت وكمان اللى بيتصل بيه هو اللى بيدفع من جيبه حق المكالمة وده يفضل يتنك ويجبلك حوارات وحكايات من الشرق والغرب كانه قاعد على قهوة بلدى مش بيتكلم فى التليفون , تغوووووووووور البيعة دى وأنا أرجو من أى حد بيبيع أنه يكون عنده مصداقية وروح مرونة فى البيع عشان ربنا يبارك للطرفين ومتشكر أوى على نصحيتكم ومشورتكم ياجماعة ...