انا خايف أشارك في المنتدى او على الفيس بوك !!!




بقالي فترة وانا مبخوشش على المنتدى ولا على الفيس ... ولكن الحقيقة بخوش وكل ما اكتب مشاركة بقوم ماسحها على طول وفوري. ... والسبب بصريح العبارة انا خاااااااايف


ههههههههههههه
لا لا بجد فعلاً انا بتكلم جد انا خايف ... والموضوع بمنتهى البساطة من بعد الثورة في قسم الشارع المصري لقيت الشباب بقو يشتكوا بعض على التافهة والمليانه كل شوية يبعتوا للاشراف ده زغ زغني وده قرصني. وده قالي انتا ووحش !!!

والاشراف ياعيني دايخ بين ده ودااه ... بس ساعتها قلت منتدى وشباب عادي بيهزروا مع بعض ... بس وانا بتابع الاعلام المصري لقيت كمية قواضي لاتعد ولا تحصى حتى الرئاسة الي هيا رئاسة (( سمعاً وطاعه )) رافعه قضية على مش عارف مين علشان اهان ميييين ... الهام رافعه قضية على بدر. وبدر رافع قضية على فلان وفلان رافع قضية على الزند والزند رافع قضية على عند وهكزا. حسيت ان البلد كلها بقيت زي المنتدى كده كل شوية يبعتوا للقضاء (( الاشراف )) ده زغزغني وده قرصني وده قالي يا ووحش ... بس القضاء معندهوش وقف اسبوع ههههههههه ده عندوا وقف سنة مع الشغل والنفاذ يا حبيبي انتا وهو. .

المهم انا بقيت خايف في ظل التخبط الحالي اني اكتب او اشارك حتى لو كنت عاوز انوه او اشير الى مشكلة في المجتمع لعل وعسى المسؤوليين يتداركوا الخطء ... وبقول لنفسي يا واد وانتا مالك هيا كانت بلد ابونا ... ايه يعني. علشان انا مصري الله طيب مافي تسعين مليون مصري غيرك يا خوياااااا ... (( مرات بقول على نفسي كده هبقى مصري سلبي ومرات بقول لأ من خاف سلم )) ...


لان من البساطة امسك قلم وورقة واتكلم او اقعد قدام كمبيوتر واكتب ... لكن بصراحة انا غلبان قدام العمالقه ... وبامكان اي مذيع يفعصني بسهولة ويسر لان كل ذنبي اني مواطن غلبان وهو يامشالله عندوا محاميين اشتغلوا مشتغلوش اكيد بياخدوا راتب شهري ...

مرات بقول. طيب وانا خايف من ايه ما انا ورى الكمبيوتر
لحد ما جت رسالة من المنتدى (( عزيزي الزائر قبل استكمال تصفحك اضغط هنا ))

طبعاً ساعتها قلت خير اللهم اجعلوا خير. ... لقيت كانت الرسالة اياميها. الناس الي بتشتم في الشارع المصري وكده لو جهه امنية طلبت بياناتك فاكيد هيبعتولهم بيناتك على الانترنيت


يعني وادحرج واجري يا رمان ... وتعاله على حجري يا رمان ... ورحنا في داهية يارمان
ههههههههههههههههه .
الغريب اني مبخوشش الشارع المصري كتير ومبحبش اتكلم في السياسة ... ( غير لما هبقى اطرشق من غيظي كده ). بس انا بسئل نفسي هل دلوقتي لو اتكلمت في المنتدى هنا ولا حتى على الفيس عن مطعم ولا حتى توكيل. وقلت عليهم انهم وحشين او انهم نصبوا عليا وعملوا كزا كزا كزا

هل ممكن صاحب التوكيل او صاحب المطعم ولا حتى مذيع معين يرفع عليا قضية ... ويلبسني قضية التشهير والتفشيش ... ومحدش يقلي يعني ايه التفشييش دي اهي قضية. من ضمن قواضي ٢٠١٣ الي بقينا نسمع عنها .

وياترى ايه الخطوط الحمره ... او بلاش الحمره دي يمكن تكون تنافي الاداب العامة هههههه. خلينا نقول ايه هيا الخطوط الصفرة او الخضرة . الي الواحد مش لازم يتجاوزها في الكتابه على الانترنيت !!

زي ميثاق. للعمل الصحفي للمنتديات والفيس بوكاات والتويترات ..... وشكراً

@@@@@@@@
وتحياتي