عندى عربية نيفا انجكشن العربية فجأة بدأت تبطل لما أدوس دبرياج ألاقى العربية بطلت رحت للكهربائى جابلى واحد بتاع انجكشن فك حاجة إسمها البوابة عند بوز الإنجكشن و نضفها باسبراى و خرج عدة سودة فيها بنط نحاس عليه كاوتشة صغيرة خضراء , قعد يلف فيها و يضغطها و يفكها و يقولى دور من غير ما تشغل و قصص.

المهم العربية اشتغلت بس بقى فيه مشكلة لما كنت بدورها الار بى ام بيبقى 10 و لما تسخن بعد 3 دقائق يبقى 5 بعده بقت لما أشغلها الأربى ام 10 يعلى و يبقى 15 أقوم طافيها و مشغلها

المهم قلت مش مشكلة اطفيها و أشغلها لحد الجمعة اللى فاتت و أنا راجع دخلت البنزينة و بعد ما مونت جاى خارج بشيل رجلى من على الدبرياج طفت!!

قلت أروح للميكانيكى بدل الكهربائى , المهم رحتله فى الوراق و لفينا على كل بتوع الإنجكشن مفيش حد عايز يكشف عليها عشان نيفا و معندهمش الجهاز بتاعها , المهم الراجل كتر خيره قعد يقلب و يجرب من عربية نيفا تانية لقى السنسور اللى قبل فلتر الهواء سليم و لقى الحساس اللى على البوابة فيه مشكلة

المهم ركبلى حساس أوبل مكان بتاع اللادا اشتغل أحسن من بتاع اللادا بس طبعا لأنه أوبل لما بشغل التكييف يزود قوة الشفط فبيرفع الار بى ام الى 20 بس على الأقل لما بشغل العربية بيبقى الأر بى ام على 5 مظبوط أحسن من بتاع اللادا

السؤال دلوقتى ان مفيش حد بيكشف على كمبيوتر اللادا فهل ممكن أقلب العربية كربراتير أحسن لأن الحساسات على البوابة 2 كل واحد ب 300 جنيه يعنى الاتنين ب 600 جنيه و الكربراتير تمنه 500 جنيه أصلى أو 300 جنيه استيراد فأيهما الأفضل؟

و هل محرك النيفا 2010 1700 هو نفس محرك النيفا القديم بتاع 1600 ولا فيه مفاجائات؟

يا ريت لو حد عنده تجربة يقولى أعمل إيه لأن كمبيوترات السيارات فى مصر لعنة فعلا للأسف