السلام عليكم ورحمة الله وبركاته

وأخيراً انضميت من تاني لعالم الوحوش بعد ميجي الجميلة، انهاردة بفضل الله استلمت الفليونس 2013 خليجي فول أوبشن في الدوحة.

العربية بشكل عام ماشاء الله عليها، وطبعاً أنا كعاشق للميجان حبيتها أوي وحسيت بالطعم المميز للميحان بمجرد ما دخلت العربية

الحقيقة لسه مالحقتش آخد عنها انطباع منفصل عن الميجان لكن هي نفس الطعم تقريباً مع شوية الأوبشنز الزيادة زي العداد الديجيتال والهاند بريد زرار والبلوتوث و التكييف الدوال زون مع الفتحات الخلفية وبرضو المفتاح البصمة وبتدور بدون إدخال الكارت في مكانه وإمكانية فتح الشنطة من داخل السيارة وده بالإضافة للكاسيت الجميل اللي فيه AUX و USB
لكن للأسف مش لاقي فيها وحدات رفع من الريموت وأصلاً هي شكلها رفع أمامي بس لأن الزجاج اللي ورا مش بيقفل ويفتح أوتو - اللي قدام بس هو اللي كده
برضو ينقص عن الميجان إن العربية مش مرسومة في التابلوه (العدادات) بشكل يوضح الأبواب المفتوحة


انطباعي عن التكييف رائع بفضل الله بس أنا مجربتهوش لسه وقت الظهر مثلاً لأن أنا استلمت بعد العصر

سحب العربية جميل جدا ماشاء الله والعفشة ماشاء الله ناعمة بشكل ملحوظ

ده انطباع أولي سريع عن العربية وإن شاء الله أوافيكم بأي إضافة إن وجدت

والأجمل من ده كله هو إني رجعت تاني لمجتمع الوحوش الرائع :)