استلمت الفلوينس الحمد لله

**ramymechanics** · 06-09-2013 10:41 PM

الحمد لله استلمت الفلوانس الجديدة امبارح من الطارق مول العرب الفئة التالتة اللون موكا ... السعر من الوكيل 169500 جنيه والطارق قال لى 175 الف واخدتها منه ب 172 ألف فى نفس اليوم الحمد لله يعنى اوفر برايس ألفين ونص بدل الحجز والأنتظار .. انا مسافر فى شغل وواحد قريبى استلمهالى معاه كورولا 2010 بيقوللى أنت كدة بتلعب فى دماغى انطباعه عنها ممتاز واول ما انزل ان شاء الله هعملكم تقرير كامل ... للعلم هو بيقوللى فولها فى اكتوبر ب 100 جنيه وراح بيها المقطم وبعدين الرحاب ورجع ركنها فى المريوطية بيقوللى يادوبك مؤشر البنزين اتهز بس طبعا انا كنت مهتم اوى بالموضوع دة لأن الصنى كانت سفاحة بنزين وتانكها صغير

**kareem_eg** · 06-09-2013 11:03 PM

الف الف مبروك .. ربنا يديك خيرها و يكفيك شرها .
و مستنيين التقرير ان شاء الله :)

**ahmedelfeky** · 06-09-2013 11:09 PM

الف مبروك يا بشمهندس رامي ربنا يديك خيرها ويكفيك شرها احسنت الاختيار وماتنساش تورينا صور اللون الموكا ده عشان نشوفه اماتنزل بالسلامه من الرج

**Ahmed Amin** · 06-09-2013 11:16 PM

جميل أوي أستهلاك البنزين علي وصفك دا,, أحب أعرف الأستهلاك هيبقي عامل ازاي معاك بعد اول 1000 كيلو
ألف مبروك علي العربية, وربنا يبارك لك فيها,
ومستنين منك أجمد تقرير عنها في أقرب فرصة.

**cosmo** · 07-09-2013 01:02 AM

الف مبروك وربنا يكفيك شرها

**batour** · 07-09-2013 04:41 AM

1000 مبروك وفى انتظار تقرير مصور مفصل :)

**moh158** · 07-09-2013 06:49 AM

الف مبروك يا باشا و ربنا يرزقك خيرها

انا كنت عايز اسأل علي حاجتين علشان ناوي اشتريها ان شاء الله

اولا هل مراية الصالون تعتيم ذاتي و لا لأ علشان انا شوفت الفئة الثانية ديه بدون علي الرغم ان التوكيل في الورقة بتاعته بيقول فيها تعتيم.

ثانيا فيها اوتو بارك و لا لا برضه

شكرا و مستني ردك بسرعة علشان نازل اخلص النهاردة ان شاء الله

**ramymechanics** · 07-09-2013 07:54 PM

المشاركة الأصلية كتبت بواسطة moh158

الف مبروك يا باشا و ربنا يرزقك خيرها

انا كنت عايز اسأل علي حاجتين علشان ناوي اشتريها ان شاء الله

اولا هل مراية الصالون تعتيم ذاتي و لا لأ علشان انا شوفت الفئة الثانية ديه بدون علي الرغم ان التوكيل في الورقة بتاعته بيقول فيها تعتيم.

ثانيا فيها اوتو بارك و لا لا برضه

شكرا و مستني ردك بسرعة علشان نازل اخلص النهاردة ان شاء الله

الفئة دى نازلة من غير أوتو بارك والمرايا والله مش عارف لأنى لسة مشفتهاش الصراحة ... بس صدقنى العربية سعر مقابل امكانيات تححححفة