الموضوع: نصيحة لمالكي الرينو بالإسكندرية

هو محترم ككلام وتعامل وأسلوب، وبيكلمك بادب وكل حاجة، لكن كل دا علشان يقلبك من الناحية التانية :(
بالنسبة لحد محترم انا دايخ زيك بالضبط
انا أعرف كهربائي 100% لو تحب اوديك ليه
بالنسبة للميكانيكا للأسف لسه مش مستقر على حد
لكن انا مقسم الاعطال يعني لو حاجة تغيير سيور او عفشة او اي حاجة بعيدة عن الكمبيوتر واعطاله في واحد كويس عند كلية الطب اسمة محمد وهو بصراحة أمين ومش بتاع اشتغالات

كلام صاحب الموضوع صح ١٠٠٪ كل المواضيع دى بتحصل فعلا ولى معه اكثر من قصة مماثلة وعلى فكرة أنا بتعامل معا اكثر من سبع سنوات
زمان اول ما فتح كان كويس لكن اخر سنتين ثلاثة بعد ما ربنا فتح عليه وعمل زبون وتوسع فى اكثر من ورشة بدل ما يحافظ على النعمة بدء الطمع بتوسيع الشغلة على الزبون وعدم الاهتمام بالتشخيص السليم للعطل فيطلب تغير قطع بدون داعى علشان يمشى قطع الغيار اللى اصبح بيبعها جديدة ومستعملة ويلبس حاجة ده فى ده .
على سبيل المثال تغير رداتاتير بدون داعى والعيب كان من طرومبة المياه ، تغير طنابير خلفى باخرى اسوأ من عنده المفروض انها استيراد وأحسن من الجديد ، اخر حاجة قبل وقف التعامل تغير طقم كوليهات والعيب كان طرومبة البنزين ثم ركب طرومبة من عنده استعمال علشان أصلى وقوية كانت فى عربية ٢٠٠٠ سى سى تكلفة إجمالية للطرومبة والمصنعية وصامولة وخلافه ٤٥٠ جنيه ماشى و العربية تمام
المشكلة تانى يوم وانا خارج لقيت العربية مش بتدور وكان اول ايام العيد وطبعا كله اجازة أسبوع كامل نقول عادى بتحصل ، بعد العيد اتصلت بيه بعتلى صنايعى بطرومبة جديدة بعد ما صلحها رحت لحمدى لقيته بيطلب الحساب ٢٠٠ جنيه مصنعية تصليح خارج الورشة هنا وصلت لآخر صبرى معاه لان اقل حاجة كان المفروض يعتذر وبشدة ده لو مقدر يعنى إيه أسرة تقضى أسبوع عيد بدون عربية ، اختصارآ للكلام عملت مشكلة معاه ودى كانت اخر مرة
معلش طويلت عليكم بس للإستفادة والحذر عند التعامل عند الحاجة

المشاركة الأصلية كتبت بواسطة r_gamal1

انا بتعامل مع حمدى من زمان ومشفتش منه حاجه وحشه وموضوع كمبروسير التكييف دة مش شغله ليه يتصلح عندة وكمان الدينامو دة عايز كهربائي بردة المفروض ميشتغلش فيه وزمان مرة سئلته على التكييف قلى روح ل حد بتاع تكيفات المفروض حضرتك كمان كنت تبص على الطلمبه هل فعلا مشروخه ولا بيقولك اى كلام .. ربنا يسترها معانا

أستاذ جمال، أنا ماليش مصلحة في هذا الموضوع غير التحذير وكل واحد حر في قرارة، لكن انا مش بفتري عليه، ولا بشوة سمعته بباطل، حضرتك ماقريتش الموضوع كويس
بالنسبة للكمبريسور لو زي ما حضرتك بتقول كان يقول للراجل على الاقل ان دا ممكن يتصلح عند حد تاني، لكن هو قالوا دا كمبيرسور ولازم يتغير مع ان العيب سهل إصلاحه، لكن مش كل اللي بيروح لميكانيكي يعرف كدا، فمراعاة لله والامانة كان لازم يقول لصاحب العربية ويسيبه يقرر، لكن هو علشان عايز يبيع اللي عندة بيقول غير وخلاص
بالنسبة للدينامو انا بقول ان اللي شغال في العربية اللي محتاجة دينامو جاء للي شغال في عربيتي وبيقولوا عايز دينامو علشان أركبوا، قالوا خد اللي حلناة من السينيك، وهنا في مشكلتين أولا اللي حيغير فاكر انه حياخد دينامو إستعمال خارج، مش محلول من عربية تانية، وثانيا الدينامو نفسه أكيد محلول من السينيك على اساس انه لا يصلح وبايظ، لكن هو صلحة بعد ما حله وباعة لواحد تاني.

اخر حاجة اللي حصل معايا انا شخصيا، موتور الطرمبة حاسبة ب 250 جنية ولو حضرتك غيرت القلب قبل كدا سعرة من 90 جنية واغلى حاجة عند اغلى محل قطع غيار 150 جنية، لأنه صيني ولا عليه اسم ولا علامة ولا اي حاجة خالص، والصاموله اللي قالي لازم تتغير ومش حتنفع ولازم اشتري واحدة جديدة من عندة ب 120 جنيه، لما اصريت انوا يركب بتاعتي، ركبت وقعد يقرط عليها بقوة شديدة علشان تتكسر ويداري غلطتة لكن الحمد لله علشان هي الاصلي بتاعت العربية ما اتكسرتش، وفوق كل دا بقى وبعد كل دا الموتور اللي ركبه ب 250 جنية طلع بايظ ولما رجعتلة تاني يوم وخليتة يجرب العربية لاقاة بايظ وقالي خلاص حركبلك واحد تاني بس انا كنت اشتريت واحد ب 120 جنيه، راح ركبة طبعا وهو متضايق جدا، وطلب مصنعية 50 جنية تاني غير اليوم الاول، وقولتلة دي غلطتك وانت اللي ركبت واحد بايظ من عندك ودفعتلك مصنعية امبارح، عايز مصنعية تاني النهاردة علشان بتغير الموتور البايظ اللي انت بعتهولي !!!!!!!!!!!!!!!!!

دي التجربة بالكامل احكيها بما يرضي الله، والله على ما أقول شهيد.

أستاذ رامي جمال
هو بتاع الكمبريسور كان رايح مش عارف العيب في ايه، هو كان عندة صوت إحتكاك في الكبوت ومش عارف جاي منين، فلما اللي شغال فتح الكبوت وبص عليه رجع قاله الصوت من الكمبريسور ولازم يتغير، والراجل مش فاهم حاجة راح قاله خلاص غير
لكن عموما انت كلامك صحيح تماما، لأن انا فعلا شفت ان اللي شغالين معاه هما اللي مبوظين الدنيا، ومافيش إدارة مضبوطة للورشة، وكل واحد شغال لوحدة في اتجاه، ومافيش سيطرة ولا إشراف على الشغل خالص، وكل همهم انهم يبيعوا قطع غيار وخلاص.