استفسار عن rpm الفلوانس 2014

**SamehEmeel** · 02-12-2013 06:05 PM

تحياتي لكل وحوش الرينو
استفسار مهم جدا علشان بصراحه اول مره اسوق عربيه فيها فتيس cvt و عايز اعرف اللي بيحصل معايا دا طبيعي و لا فيه حاجه غلط
في وقت التسارع و لو مثبت دوسة رجلي علي البنزين ال rpm بيرفع و يفضل ثابت طوال فتره التسارع لحد ما اوصل للسرعه اللي انا عايزها و اول ما اخف رجلي بينزل مره واحده للطبيعي يعني في الاتوماتيك و الايزيترونك كان ال rpm بيرفع و مع كل نقله ينزل و هكذا لكن هنا مش بيحصل كده هل دا طبيعة الفتيس cvt و لا عندي حاجه غلط لاني بحس لما بحب اقرص شويه ان صوت الموتور بيعلي و ال rpm بيوصل ل 5 و بمجرد ما اوصل للسرعه المطلوبه بينزل لل 2 او 2 و نص

اتمني اني اكون قدرت اشرحلكم و منتظر خبراتكم

**Hosam_Optrawy** · 02-12-2013 06:12 PM

طبيعى ياباشا هو ال CVT كدا

طول مانت كابس بنزين للأخر ال Rpm هايفضل ثابت على العالى , ومش هاينزل غير لما تخف رجلك

والف مبروك

**ahmedelfeky** · 02-12-2013 06:20 PM

+111111111

**hossam_elwani** · 02-12-2013 08:34 PM

المشاركة الأصلية كتبت بواسطة hosam_optrawy

طبيعى ياباشا هو ال cvt كدا

طول مانت كابس بنزين للأخر ال rpm هايفضل ثابت على العالى , ومش هاينزل غير لما تخف رجلك

والف مبروك

طيب والميكانيزم بيكون ايه فى حالة انه اول مايخف رجله الابى ام بينزل

هل بيقل على ترس اصغر ولا ايه الاليه ؟؟

**Hosam_Optrawy** · 02-12-2013 08:40 PM

المشاركة الأصلية كتبت بواسطة hossam_elwani

طيب والميكانيزم بيكون ايه فى حالة انه اول مايخف رجله الابى ام بينزل

هل بيقل على ترس اصغر ولا ايه الاليه ؟؟

بص ياباشا اللى أعرفه ان ال CVT هو فتيس بعدد لا نهائى من النسب , يعنى نقلاته مفتوحه ملهاش عدد

اللى بتحسه لما تخف رجلك ان الموتور صوته هدى شويه وال Rpm نزل والسرعه اللى انت هديت عليها ثبتت , بس مش هاتحس بأى نقله أو نتشه فى الفتيس

الكلام دا كله طبعا وإنت جايب ال D

فى عربيات CVT وفيها تبترونيك وفى الحاله دى بتبقى النقلات متحدده ( أعتقد فى الفلوونس 6 نقلات ) وطبعا هاتحس بالنقلات وإنت بتغير بإيدك أو بالشيفتات اللى فى الطاره لو موجوده

تجيب على ال D ترجع للانهائى والملل تانى :)