عايز أبقى منكوا

**احمد عبدالله** · 05-10-2008 03:59 AM

الأول كل سنة و إنتوا طيبين
بصوا يا شباب أنا معايا 80000 كنت بفكر أجيب أوبل فكترا موديل 2002 و أشدها بالفلوس الباقية بس أنا حاسس إنها بقى شكلها قديم أوي و بعدين لما أجي أبعها هخسر فيها كل الفلوس دي و لما أنا لقيتكوا بتتكلموا عن إن الميجان المستعمل بتاعها رخيص قولت إن هيا أنسب لإن شكلها تحفه و هتبقى موديل أعلى و كيلو أقل طبعا غير إنها مليانة كماليات بس كل اللي مقلقني من العربية حكاية الرفارف الفيبر دي و مدى تحملها و بعدين كوني ساكن في طنطا يعني أقرب توكيل في المنصورة ؟
وبعدين 80000 ممكن يجبوا ميجان بانوراما 2005 ولا لأ ؟ و المفروض أدور فين لإن العربية دي قليلة عندنا في طنطا ؟

أنا أسف أوي إن أنا صدعتكوا و شكرا

**M.Mokhtar** · 05-10-2008 06:14 AM

من غير تحيز والله
انا بحب الميجان جدا وبحرتمها
بس فى المستعمل
الفكترا تكسب بمراحل
عربيه قوية ومتينه والمانى
ثبات ومتعه قياده اعتقد احسن من الميجان
حتى اعداه البيع الالمانى مش بينزل جامد عكس الميجان تماما

وربنا يوفقك

**Ahmed Selim** · 05-10-2008 11:20 AM

أنا كان معايا فيكترا 97 وحالياً معايا ميجان 2005

و أرشحلك الميجان بشرط واحد.....انك تحافظ على صيانة العربية أول بأول زى ما الكتاب بيقول

ده ميقللش من الفيكترا فى حاجة أبداً بس هى المشكلة أن شكلها بقى قديم شوية وكمالياتها قليلة.

الرفارف الأتنين اللى قدام بس هما اللى فيبر والفيبر ميزته حاجة ( وبرضه ليه عيب ) ميزته أن لو خبطة خفيفة زى اللى بيتردو على البارد فى الصاج يستحملها ويرد تانى لبرة بأيدك عادى جداً وفى الخبطات اللى أقل من كده كمان بيرد لبرة لوحده.....يعنى أنا اكتر من مرة حد يخبطلى العربية خبطة بسيطة و لما أنزل ملقيش حاجة خالص....اللهم الا بعض الخدوش فى الدهان

عيب الفيبر أنه لو خبطة جامدة لا قدر الله ( يعنى تحتاج سمكرة ورش فى الصاج العادى ) يبقى الفيبر هيتكسر وهتحتاج تغير الرفرف وتدهنه .
لكن من ناحية الأمان الفيبر أحسن لأن من خواصه أمتصاص الصدمة بصورة أكبر من الصاج

80 ألف تجيبلك 2005 بس مش بانوراما ( أنا بتكلم عن عربية نضيفة مش سافة التراب )......ممكن تجيبلك الفئة اللى أقل من البانوراما على طول وبيبقى فيها كل حاجة معادا فتحة السقف و تقريباً الكراسى الجلد

**Ahmed Selim** · 06-10-2008 01:22 AM

البانوراما لو نضيفة و كيلو متر قليل تعمل فى حدود ال 85........ممكن تزيد أو تقل حاجة بسيطة

تدور فين دى بأة اللى هتاخد منك وقت شوية

عندك مواقع سيارات مختلفة وعندك مجلة عربيتى ومعارض العربيات

لو تاخد بنصيحتى............كلم 16202 توكيل رينو هتلاقى عندهم عربيات ناس بتبيعهالهم وبياخدوا مكانها عربية زيرو ( trade in ) و أسعارهم بتكون أغلى شوية من الطبيعى بس عادة عربياتهم بتكون نضيفة وممكن تسألهم أذا كانو ممكن يدوك ضمان سنة مثلاً على العربية ولا أيه .

لا أنصح بسوق العاشر ( مدينة نصر )

ربنا معاك ولو محتاج مساعدة قول

**k7loosh** · 11-10-2008 09:01 PM

انا بردو بتواجهنى مشكلة زى مشكلتك ----- بس انا محتار بين البورا والميجان ومش عارف اخد القرار الصح-----يا ريت لو حد يساعدنى لانى انا بصراحة ميال اكثر للميجان بس كل الناس عمالة تخوفنى منها .............ساعدونى يا رجالة و جزاكم الله خيرا