الموضوع: ال esp ما له و ما عليه

طبعاً كثر الكلام فى الأونة الأخيرة عن خاصية ال esp او ال vsc او ما يسمى electronic stability program او veichle stability control و بالعربى نظام الثبات الالكترونى

للأسف و نتيجة الأسم فهمها الكثير على انها لها دخل بأتزان السيارة على السرعات او مد تماسكها على السرعات او مدى التحكم فى السيارة على السرعات و هى من كل هذا براء

* تعالوا نشوف ايه هى العوامل اللى بتأثر فى ثبات و اتزان السيارة:
- وزن السيارة
- توزيع وزن السيارة على الجسم
- مركز ثقل السيارة و مدى ارتفاعه عن الأرض
- ارتفاع السيارة عن الأرض
- عرض الكاوتش و نقشته
- اسبويلرات امامية و جانبية و خلفية
- نوع العفشة
- وجود استابيليزر بار
- ايروديناميكس جسم السيارة
و عوامل اخرى
* يا ترى فكرة ال esp قايمة على ايه :

تقوم فكرة عمله على استغلال منظومة ال abs اللى موجودة فى السيارة antilock braking system و تركيب حساس على كل عجلة و قراءات هذه الحساسات تغذى كنترول يونيت علشان تطمن ان كل العجل بيلف بنفس السرعة و ان مبيحصلش ظاهرة oversteeer او understeer و هو انه فى حالة الدوران على سرعات عالية فى ملفات متبقاش العربية بتلف معاك فى الملف و على هذه السرعة العالية أزيد من اللازم oversteer او اقل من اللازم understeer

فى هذه الحالة يتدخل ال esp عن طريق فرملة العجلات و بكرر فرملة عجلة او اتنين لظبط اتجاه السيارة فى الملف و فى بعض السيارات ممكن كمان يقلل من قوة الموتور لضبط الاتجاه

* لاحظ الاتى:
لا يؤثر ال esp نهائياً فى احساسك كسائق باتزان السيارة و مدى تحكمك فيها و مدى ثباتها او امانها....او مدى ثقتك فى نفسك و انت تقود لان ببساطة لن تفعل خاصية ال esp الا فى حالة خروج السيارة عن مسارها نتيجة السرعة العالية فى الملفات او المناورات او مشابه

هذا النظام يصحح اخطاؤك كسائق و لكن لا يصحح من ثبات او اتزان السيارة

عايز ادى مثال على ذلك علشان الناس تفهم:
لو فرضنا الهيونداى النترا على سبيل المثال و ليس الحصر و مع كامل احترامى لملاكها عربية غير ثابتة بعد سرعة 120 كم/ساعة
هل لو فيها خاصية esp و ده فعلاً بينزل فى الخليج اصبحت سيارة قمة فى الاتزان و نقارنها مثلاً باتزان الباسات؟؟!!!

الأجابة القطعية طبعاً لأ
هتفضل برده النترا زى ما هى و بتلعب على سرعات فوق ال 120 كم/ساعة و فى مطبات الهوا و فى فواصل الكبارى...اومال ايه اللى زاد عليها؟ كل اللى زاد عليها ان نسبة حوادثها نتيجة فقد السيطرة عليها هتقل نتيجة وجود هذا النظام فيها
و لكن احساسك بيها كسيارة غير متزنة و غير امينة و غير ممتعة على السرعات كما هو لن يتغير
يعنى هتفضل تسوقها على السرعات و انت خايف برده و لكن نسبة حوادثك هتقل

* هل يناسب نظام ال esp السواقة الشبابى و الغرز و الشمال يمين السريع؟

الأجابة طبعاً لأ لأنه لو لا قدر الله اشتغل معاك النظام و انت بتاخد غرزة ضيقة و نتيجة انه بيعتمد على الفرامل لضبط اتجاه السيارة يبقى حضرتك وارد جداً تلبس و انت بتاخد غرزة لانك عايز تجرى و هو بيفرمل العجل

* هل ال esp يندرج تحت نظام اتزان ام نظام أمان؟
ال esp هو نظام امان يساعد السائق فقط فى حالة فقد السيطرة على اتجاه السيارة و ليس له اى دخل بأتزان السيارة فى القيادة العادية اليومية

* ينصح البعض بشراء السيارة اللى فيها نظام esp لأنها اكثر اتزاناً و ثباتاً من غيرها

طبعاً هذا خطأ شائع جداً لانه لايوجد اى علاقة ما بين ال esp و اتزان السيارة او ثباتها
الصح هو : السيارة اللى فيها esp اكثر اماناً من غيرها

* الخلاصة ان ال esp من عوامل الأمان المهمة زيها زى الايرباجز كلها موجودة لحماية السائق فى حالة الحوادث و لكن كلا النظامين لن تشعر بوجوده فى القيادة اليومية للسيارة و لا يحسنوا من ثبات او اتزان السيارة او من متعة قيادتها

تحياتى