الموضوع: مشكله بنت 36 فى طلمبة بنزين لادا سمارا

النهارده شغلت العربيه عشان تلين بعد ما غيرت لها طقم شمبر اول امبارح..
العربيه اشتغلت شويه ووقفت؟؟؟
والفلتر مفيهوش بنزين خالص!!!
مليت الفلتر بنزين يدوى.. لقيت كل البنزين ينزل مباشرة من الفلتر الى الكربراتير ثم يرجع مباشرة من خرطوم الفايظ.. شكيت فى الكربراتير.. واللى زود شكى انى لما كاركت للطلمبه يدوى من الدراع اللى فيها.. البنزين اللى يدخل الفلتر يدخل للكربراتير مباشرة ثم يرجع من خرطوم الفايز مباشرة!!!
انا اصلا مبتدىء ومش عارف الدنيا المفروض تمشى ازاى!!!!!

شويه وعدى عليه سواق ميكروباص قالى نفك الطلمبه.. فكينها .. لقينا المسمار اللى بينقل الحركه للطلمبه من ورا الاسبراتير مكسور نص منه مكسور فى المنطقه اللى ورا الاسبراتير ونص منه فى الطلمبه..
مشى سواق الميكروباص وجه اخوه وقف معانا..
فكينا الاسبراتير.. وطلعت الجزء المكسور من المنطقه التى يركب فيها الاسبراتير من الخلف .. وجبت مسمار صلب وقطعته على طول اقل من طول المسمار القديم لانى توقعت ان القديم انكسر بسبب طوله.. قفلت وجربت.. ما اشتغلتش!!!
فكيت وقطعت مسمار مساوى لطول القديم واطول بحوالى ملى ونصف.. قفلت وجربت ..
دااااااااااااارت والطلمبه طلعت بنزين والحمد لله
شعور ابن ستين فى سبعين لما تدور على مشكله وانت مش عارف هي فين.. وانت مش خبره اصلا فى الموضوع.. بس انا كده بحب احط دماغى فى كل حاجه وبيساعدنى ان كل العده عندى ف البيت من الابره للكمبروسور واخويا فنى صيانه بيحط دماغه برضه فى كل حاجه.. المهم دى تجربتى المتواضعه ولعلها يكون فيها افاده لحد من الاخوه..