حرارة كورسا 98 جننتني

**Mahmoud Saqr** · 06-07-2014 12:58 AM

السلام عليكم
لا أعرف هل نشر مشكلة هنا هو المكان الصحيح أم لا وأعتذر إن كنت مخطئ
هذه أول مشاركة لي في هذا المنتدي الجميل

سوف أحاول عرض المشكلة بقدر معرفتي القليلة بالسيارات

معايا اوبل كورسا من سنه وهي موديل 1998 وموتورها 1400 سي سي استيراد
كانت ماشية تمام التمام
ومن ست شهور أخدها واحد صاحبي رجع بجوان وش سلندر

المهم اتعمل والعربية مشيت تمام وزي الفل
ولكن ،،،،،،،،،،،،،

بعدها بشهرين بدأت الحرارة ترتفع بدون مبرر عند التوقف على السلانسيه في الزحمه
(ولا تنخفض فقط ترتفع) ولكن على الطريق المفتوح الحرارة عادية
ولكن المشكلة حين تتوقف تظل الحرارة ترتفع ولا ترجع فقط ترتفع وتصل لل 95 حتى تتوقف السيارة

والغريب أن السيارة ترتفع الحرارة فقط عند غلق الكبوت ولكن اذا كان مفتوحا فالحرارة على السلانسيه ترتفع لل 90 وترجع عادي جدا ( حتى فكرت أشيله وأريح دماغي )

طبعا في الرحلة دي ... شيكت على دورة التبريد والمراوح وطلمبة الميه وكل الشياء التي قراتها هنا في المنتدى وكل ما قاله من حولي
المروحة زي الفل بتشتغل في وقتها والترموستات 70\80 والميه مش بتنقص وسحب العربية زي الفل

لغاية واحد ميكانيكي قاللي شيل سربنتينة التكييف واستغنى عنه .. ( كنت هضربه )

المهم فكرت في التالي :

1- أكشف عليها على الكمبيوتر
2- أشوف موضوع لباد كبوت السيارة يمكن يعزل الحرارة ...
3- شكيت إن يكون جوان فرن الشكمان بيسرب وبيسخن ( وده تم الكشف عليه )
4- المروحتين تمام ومروحة الريدياتير عامل ليها زرار بيشغلها ع السرعه العالية في الزحمه
5- مروحة الريدياتير ربما تكون بتاخد هوا سخن من الداخل وبفكر أقفل عليها كويس بحيث يكون منفذ سحبها الوحيد من على الريدياتير ...

يارب تفيدوني .. أنا تعبت بجد ... لدرجة اروح للميكانيكي أقوله شوفلي لو جوان وش السليندر عايز يتغير تاني نغيره ...

كل سنه وانتم طيبين واسف للاطالة ... على فكره دي مش مقال في الاهرام دي مشكله ..ههههههه

**Mahmoud Saqr** · 06-07-2014 03:22 AM

يااااااااااااااااه

30 مشاهدة ومفيش رد واحد

للدرجة دي المشكلة مستعصيه

ربنا يهون

**عمارمطر** · 06-07-2014 05:47 AM

الموضوع بسيط ان شاء الله هقولك على شويه حجات الاول ممكن تتاكد منهم بنفسك اتاكد من اتجاه دوران المراوح وتتاكد انها بتشفط من الخارج وبعدين تفك كوعه المياه ال خارجه من طلمبه المياه لتتاكد من ضغطها وبعد كده تكشف على سير الكاتينه لان بعد تغير الجوان ممكن الميكانيكى خلى العربيه مقدمه شويه مظبطش السير ودا يسخن العربيه جدا ويا ريت تتابعنا وتقولنا عملت ايه

**elmo7areb** · 06-07-2014 06:14 AM

انا نفس الكلام واقفة على 95 وعلى فكرة اظن كدة مش ماسكة حرارة
انا عملت كل حاجة
ريداتير جديد
ثرموستات جديدة اصلي
ساعة حرارة ريداتير اصلي 83/88
حساس الحرارة الاصلي بتاع العداد اصلي
وش سلندر
المروحة زي الفل
كتينه تمام
لسة بس طرمبة المية اكشف عليها بس ويبقى كدة عملت كل حاجة
انا اوبل كورسا 95 1200
لو لقيت حل عرفني

**Mahmoud Saqr** · 06-07-2014 12:36 PM

المشاركة الأصلية كتبت بواسطة عمارمطر

الموضوع بسيط ان شاء الله هقولك على شويه حجات الاول ممكن تتاكد منهم بنفسك اتاكد من اتجاه دوران المراوح وتتاكد انها بتشفط من الخارج وبعدين تفك كوعه المياه ال خارجه من طلمبه المياه لتتاكد من ضغطها وبعد كده تكشف على سير الكاتينه لان بعد تغير الجوان ممكن الميكانيكى خلى العربيه مقدمه شويه مظبطش السير ودا يسخن العربيه جدا ويا ريت تتابعنا وتقولنا عملت ايه

السلام عليكم ...
إن شاء الله يكون بسيط فعلا
اتجاه المروحة تمام وطلمبة الميه كمان .. دول لسه مشيك عليهم امبارح
انما موضوع سير الكاتينة ده أشيك عليه ازاي ؟؟ وهل ده بيسخن العربية وهي ماشيه ولا وهي واقفه بس ؟؟

وهل موضوع اللباد بتاع الكبوت ممكن يحل المشكلة ... أو موضوع ان المروحة بتسحب بعض من الهواء بتاعها من الداخل من الجوانب بتاعتها مثلا يعني ما تكونش محكمة الغلق من الجوانب فمايكونش الهواء اللي داخل كله من بره الريدياتير؟؟

مشكور على اهتمامك والرد ... معلش وقعت في واحد هس هس شويه ههههههههههههه

**Mahmoud Saqr** · 06-07-2014 12:45 PM

المشاركة الأصلية كتبت بواسطة elmo7areb

انا نفس الكلام واقفة على 95 وعلى فكرة اظن كدة مش ماسكة حرارة
انا عملت كل حاجة
ريداتير جديد
ثرموستات جديدة اصلي
ساعة حرارة ريداتير اصلي 83/88
حساس الحرارة الاصلي بتاع العداد اصلي
وش سلندر
المروحة زي الفل
كتينه تمام
لسة بس طرمبة المية اكشف عليها بس ويبقى كدة عملت كل حاجة
انا اوبل كورسا 95 1200
لو لقيت حل عرفني

ربنا يسهل ونوصل لحل ...
هي المشكلة بتحس ان المكنه نفسها مش بتسخن ... المشكلة ان الهواء السخن اللي بيكون جوا الكبوت بيكون سخن (وطبيعي الهواء السخن بيطلع لفوق في الكبوت والهواء البارد بينزل لتحت لانه اتقل) ومع زيادته فبيعمل جو سخن حول الموتور .. وبيزيد وانا واقف ،،،
فأنا بفكر في موضوع لباد الكبوت ...بس انا مش فاهم بالظبط هو ممكن يعمل إيه ؟؟؟ ممكن يحل المشكلة مثلا والعربية واقفه
وبرده هحاول في موضوع جوانب المروحة بحيث يكون كل الهواء اللي المروحة بتسحبه يكون من بره وما يكونش فيه بعض منه من داخل الكبوت ...

لكن أولا هشوف سير الكاتينة زي ما قال الأستاذ عمار وربنا يسهل إن شاء الله
ومتابعين ان شاء الله لغاية ما نوصل لحل

**Mahmoud Saqr** · 08-07-2014 07:10 PM

المشاركة الأصلية كتبت بواسطة عمارمطر

الموضوع بسيط ان شاء الله هقولك على شويه حجات الاول ممكن تتاكد منهم بنفسك اتاكد من اتجاه دوران المراوح وتتاكد انها بتشفط من الخارج وبعدين تفك كوعه المياه ال خارجه من طلمبه المياه لتتاكد من ضغطها وبعد كده تكشف على سير الكاتينه لان بعد تغير الجوان ممكن الميكانيكى خلى العربيه مقدمه شويه مظبطش السير ودا يسخن العربيه جدا ويا ريت تتابعنا وتقولنا عملت ايه

ميكانيكي امبارح قاللي هنشيك على سير الكاتينة
وواحد تاني النهارده قاللي لا سير الكاتينة تمام ... عشان لو كان مقدم أو مأخر كنت تلاقي العربية بترعش
واحد تالت قاللي ان العربية تمام بس سربنتينة التكييف كاتمه على الريدياتير عشان هما ملاصقين لبعضهم ولازم نبعد السربنتينة شويه عن الريدياتير
أنا مبقتش فاهم أي حاجه

أنا خليت مروحة الريدياتير شغالة على السرعه العاليه دايما عن طريق كتاوت للبطارية
وبفكر أخلي مروحة السربنتينه هي كمان على السرعه العالية ده لو كان ليها سرعه عاليه .. ومش عارف ده صح ولا غلط

هو باي حال من الأحوال حاسس انه غلط لان مش ده فبريكة العربية

أرجو الافادة

**elmo7areb** · 09-07-2014 04:39 AM

حكاية لباد الكبوت بصراحة انا مش مقتنع بيها لاني شفت 3 عربيات كورسا مفيش فيهم لباد للكبوت ومش ماسكين حرارة !

**Mahmoud Saqr** · 14-07-2014 06:29 PM

مبقتش عارف اعمل ايه ؟؟؟

رحت لكذا ميكانيكي ومحدش بيفيدني ...
يقولي أي عربية طبيعي وهي واقفه تسخن ... أقول للميكانيكي اوك طبيعي تسخن بس بترجع الحرارة تنزل تاني .. انما دي في ازدياد مستمر طول ما هي واقفه وأول ما اتحرك تنزل عادي ...
الميكانيكي يقول خلاص شيل السربنتينه هي كاتمه على الريدياتير ...

هل ممكن قميص مروحة الدايو اللي هو 2 مروحة يحل المشكله لو ركب ... بس برده الواحد هيفضل في قلق لان مش ده طبيعي العربية ..

أنا زهقت بجد .. ياريت يا جماعه لو حد يعرف حل يقول