أولاً أنا بعتذر للسادة أعضاء المنتدى عشان لي مدة عايز اكتب الموضوع دة و مكنتش لاقي وقت ، و شايف ناس عمالة تتخانق كل يوم على الميجان في الفترة الأخيرة و الموضوع سخن و بصراحة مش حبب أدخل في حوارات لن تجدي مع أراء متبنية وجهة نظر الرفض للرفض بدون تحليل الوضع

بسرعة كدة سؤال و أجاوب عليه ، سعر الميجان المستعملة موديل ٢٠٠٥ كام و سعر كورولا مستعملة ٢٠٠٥ كام و سعرهم جديد كان كام ؟
الإجابة سعرهم جديد كان حوالي ١٤٠ هم الاتنين (تزيد أو تقل شوية مش فرق كبير ) ، و سعرهم مستعمل ؟ .. الميجان دلوقتي حوالي من ٧٥ إلى ٨٠ و الكورولا من ٨٥ إلى ٩٠ (على حسب الحالة في الاتنين )

يعني الميجان نزلت كام ؟ ٦٥ ألف يعني ٤٦ ٪
الكورولا نزلت ٥٥ ألف يعني ٣٩ ٪
يعني بحسبة بسيطة في السنة الميجان تنزل ١٥٪ سنوياً و الكورولا ١٣٪ فقط !! علماً بإن شركات التأمين بتفترض نسبة إهلاك في تمن العربية ١٠٪ سنوياً .
و بحسبة أبسط إلي إشترى ميجان خسر في العربية دي ٧٪ أو ١٠ الاف جنيه خسارة عن لو كان إشترى عربية تانية ، طيب هل الموضوع دة يستاهل الخسارة دي ؟ ..
دي بقى حاجة نسبية .. يعني هل حضرتك قابل تخسر ١٠ الآف مقابل استمتاعك بشوية رفاهية زيادة ؟ (خلي بالك ١٠ الآف من أصل ١٤٠ ألف )،
أعتقد لو في امكانك تتحمل هذا المبلغ الكبير مش هيفرق معاك المبلغ دة في مقابل الرفاهية ، و لو جايبها قسط ببساطة كدة المبلغ إلي حضرتك دفعته فوايد في التلات سنين إلي فاتوا أكتر من الخسارة دي بكتيير !!!

الخلاصة لو واحد غاوي وجاهة و رفاهية في عربيته هيدفعهم و يجيب ميجان و هيكون سعيد باختياره ، و لو واحد فارق معه كل قرش و عايز عربية و السلام تؤدي الغرض فقط كعربية من غير "منظرة " هيجيب كورولا أو غيرها

* ملحوظة أنا أخدت الكورولا فقط كمثال عشان الجدل ديماً بين الاتنين دول مش عشان سبب معين أو فرق معين بين الاتنين