الموضوع: مطلوب مساعدة في شراء سيارة في حدود 110 الف

السلام عليكم ,,

محتاج مساعدة تنورلي الطريق ولو قليلا لان الموضوع محير ومعنديش خبرة تساعدني في الموضوع
الحاج عايز يجيب عريبة جديدة ومستعد يدفع مبلغ في حدود 110 الف تقريبا

وانا بتصفح اسعار العربيات في الطريق لـ 110 الف مريت بخيارات كتير
فيه شفروليه وهيونداي ورينو وحتى نيسان وبيجو وسيتروين ده غير العربيات الصيني زي جيلي وسبيرانزا

والمطلوب المساعدة في تضييق الخيارات عشان اعرف ارسي على حاجة
المهم المطلوب عربية قوية ,, يعني 1600 cc او 1500 cc ,, اقل من كده بلاش
عربية عائلية او شبه عائلية وكل ما تكون قطع غيارها بسعر معقول واستهلاكها للبنزين معقول كل ما يكون افضل
العربية مش متوقع تتغير خلال السنين القادمة ,, يعني مطلوب عربية تستحمل
ومش مهم تكون اوتوماتيك وبلاش هاتشباك

في الطريق للـ 110 عبر الفئات السعرية لقيت الآتي :
شيفروليه افيو
شيفروليه اوبترا
رينو لوجان
هيونداي فيرنا
فيات لينيا
بروتون "معرفش ايه دي"
نيسان صني
بيجو 301
سيتروين c-elysee

لو حد يقدر يقولنا ايه الاختيار المناسب يبقى كتّر خيره
لو حد شايف ان فيه خيار من اللي فوق غير مناسب او سيء يقول وده هيساعد في استبعاده وتقليل الخيارات والتركيز في حاجة تانية ,,
لو حد يقدر يقارن بينهم او يقارن بين اي اتنين منهم عشان اعرف الافضلية يبقى مشكور بردو وهيكون امر مفيد

لو حد معاه عربية منهم وحابب يدينا رأيه او يحذرنا منها يبقى مشكور
ولو حد اشترى بالفعل عربية في الفئة السعرية دي ويقدر يشاركني تجربته يبقى تمام

ويارب الاقي مشاركات مفيدة

لو مش فيات لينيا يبقي أوبترا الشكل القديم و تقريبا نازلة عند الوكيل فئة فيها 2 ايرباجز و abs و ebd بس ب 122000 ... ليه أنا قلت فيات لينيا ؟!
-اللينيا موتور تي جيت 1400 تربو بيولد 120 حصان يعني أقوي واحدة فيهم
-أمان عالي أوي و فيها كل ما تتمناه من وسائل الأمان (6 ايرباجز)
-الايطالي عامة شأنه شأن الألماني ... يعني هيبقي عندك نفس إحساس ركوبة الألماني لا و كمان زيرو
-الفتيس بتاعها ايزي ترونيك و لكن من غير مشاكل ... قصدي المشاكل اللي كانت في الفيكترا سي
-رفاهية عالية و نظام بلو أند مي و فولو مي هوم و حاجات فخيمة بصراحة ... ديه فيها كيس هواء بيتنفخ ورا ضهرك عشان يريحك و انت سايق
-تتميز بارتفاعها عن الأرض و ده مفيد جدا في بلدنا و شوارعنا الحرير !!!
-الثبات بتاعها وهم بصراحة و أنا مجربه لحد 190
-بص يا باشا مبدئيا كدة سيبك من اللي يقولك لا ديه وحشة و سعر إعادة البيع واقع و كدة و توكيلها مش كويس ... حضرتك قلت إنك مش هتبيعها خلال كام سنة و أنا بصراحة شايفها أكتر واحدة معمرة فيهم ...ممكن تصلحها في الحرفيين عادي جدا و أسعار قطع غيارها مش غالية و الكلام ده أنا شفته بعيني ... قطع غيارها كمان متوفرة استيراد في بورسعيد عند بنك الإسكان
-حضرتك قلت عائلية و هي أوسع شنطة فيهم و قعدتها مريحة جدا و الكراسي شامواه
-اللي بيحكم علي العربية ده ماركبهاش ولا ساقها ... مجرد سمعة
-العربية مش منتشرة أوي و ده في حد ذاته تميز
-صدقني لو جبتها مش هتندم أبدا و هتستمتع و انت راكبها
-أرجو من الإخوة الأعضاء اللي ناويين يعدلوا علي كلامي يركبوها الأول عشان الحكم يبقي تمام
-ممكن حضرتك تتأكد من الكلام اللي قلتهولك و أتمني أكون أفدت حضرتك