الموضوع: رأي محترم فعلا

بس هو مش بيتكلم عن تيوتا فقط . ده بيتكلم على اليابانى و الكورى عموما .

و بعدين الاوروبى و الامريكى بيلعب اللعبه دى برضه .نفس القصه بتعملها شيفورليه و الاوبل و فولكس و الرينو و البيجو .

المشاركة الأصلية كتبت بواسطة madmant

ما هو ده المقصود من الفيديو
دي ارواح ناس مش لعبة
وسائل الامان دي مش كماليات عشان تحطها علي فئات اه و فئات لا
الموضوع كله بايد الوكيل
هو اللي بيحدد المواصفات اللي عاوزها من المصنع على كل فئة
و ده طبعا بيخليه يقلل في وسائل الامان عشان يطلع بهامش ربح اكبر
و مش مهم حياة الانسان اللي هايركب العربية دي
و للاسف السوق الصري مليان بامثلة كتير
ياريت الوكلاء يتقوا الله فينا و ماينزلوش العربية ناقص فيها وسائل امان عشان يكسب كام ملطوش زيادة

بص مع ايمانى طبعا بوسائل الامان . بس فيه نقطه . وسائل الامان فعلا مكلفه و مش ممكن تتعامل فى بلد اقصى سرعه فيها طبقا للقوانين 100 كم بنفس نظرية وسائل الامان فى بلد مسموح فيها بسرعات 180 و 200 كم فى الساعه .

الاهم الطرق تكون مجهزه حتى لسرعة 100 . الطريق لو مش مجهز مش هاتعمل حاجه كل وسائل الامان اللى فى العربيه .

و انا دايما كنت باقول مثال . حادثة الاميره ديانا الشهيره و برغم انها كانت راكبه مرسيدس اعلى موديل و اعلى تجهيزات امان الا علشان النفق مش مجهز للسرعه اللى كانت ماشيه بها العربيه ما فيش وسيلة امان واحده استطاعت تعمل حاجه .

السرعات لغاية 100 تكفى جدا وسائل الامان اللى بتنزل فى العربيات عندنا .

انا بصراحه مش معاه مهو الوكيل لازم فعلا يكسب هو مش ابوك عشان يصرف عليك
من الاخر عايز تدلع وخايف على نفسك ادفع مفيش حاجه ببلاش وهاتلك حته فولفو ١٢ ايرباج وانسى الدنيا
مش معاك فلوس وعايز عربيه وخلاص يبقا تمشي براحتك وتعرف امكانيات عربيتك ومتجريش يعني مبقاش راكب فيرنا وامشي بيها ٢٠٠ اكيد يبقا استاهل الي يجرالي خايف على نفسك واهلك يبقا تمشي براحتك
وفي الاخر محدش ضربك على ايدك انت الي اشتريت العربيه وعارف انها مش فيها اي وسائل امان ومحدش ضربك على ايدك
كل واحد وهو بيشتري لازم يكون عارف هو عايز ايه من العربيه وكل الناس عارفه كده كويس بس بتنسا وفجأه بيتخيل انه راكب بوجاتي او فيراري
وعلى فكره انا بجري مش مبجريش بس يوم ما يحصلي حاجه مش هحمل حد مسؤوليت الي حصل غيري انا لا وكيل ولا غيرو
والباشا في الفيديو بيتكلم عن ليكزس ب ٤٠٠ الف ريال يعني ٨٠٠ الف جنيه تقريا يعني المفروض تكون بطير وليها جناحات كمان مش اير باج بس
وفي الاخر كل واحد ودماغه
ده رأيي ممكن اكون صح وممكن اكون غلط
اسف لو طولت في التعليق
تقبلو مروري

يا جماعه مينفعش الكلام ده
اي عربيه مهما كان سعرها لازم تكون مجهزه على الاقل يكون فيها 4 ايرباج للركاب الاماميه والخلفيه
النهارده فى مصر بتشترى عربيه زي لوجان ولا فيرنا ولا لانوس ولا عربيه صينى اللى هى كارثه فى حد ذاتها مافيهاش اي امان
بتلاقى فيهم ايرباج واحد فقط للسائق !
يعنى اللى قاعدين ورا واللى قاعد جمب السواق دول مش بنى ادمين مثلآ !
افرض ان انت سواقتك هاديه وماشى على 100 كيلو ومعاك صحابك ولا اهلك
وقامت جايه تريله معديه جمبك خبطتك ولا واحد مستهتر قطع عليك الطريق ولا كاوتش ضرب ولا مقص اتكسر ولا ولا !
هتلاقى العربيه بتتشقلب على الاسفلت ايرباج السواق هيفتح والباقى هيفضل يتخبط فى الصاج والازاز
صحيح هو مش حمايه 100% ولكنه بيخفف الاضرار
وسائل الامان دى مش كماليات يمكن الاستغناء عنها

المشاركة الأصلية كتبت بواسطة super_star_h

يا جماعه مينفعش الكلام ده
اي عربيه مهما كان سعرها لازم تكون مجهزه على الاقل يكون فيها 4 ايرباج للركاب الاماميه والخلفيه
النهارده فى مصر بتشترى عربيه زي لوجان ولا فيرنا ولا لانوس ولا عربيه صينى اللى هى كارثه فى حد ذاتها مافيهاش اي امان
بتلاقى فيهم ايرباج واحد فقط للسائق !
يعنى اللى قاعدين ورا واللى قاعد جمب السواق دول مش بنى ادمين مثلآ !
افرض ان انت سواقتك هاديه وماشى على 100 كيلو ومعاك صحابك ولا اهلك
وقامت جايه تريله معديه جمبك خبطتك ولا واحد مستهتر قطع عليك الطريق ولا كاوتش ضرب ولا مقص اتكسر ولا ولا !
هتلاقى العربيه بتتشقلب على الاسفلت ايرباج السواق هيفتح والباقى هيفضل يتخبط فى الصاج والازاز
صحيح هو مش حمايه 100% ولكنه بيخفف الاضرار
وسائل الامان دى مش كماليات يمكن الاستغناء عنها

ما فيش عربيه دلوقتى بتنزل من غير 2 ايرباج و حتى الصينى و من فتره . لو مشيت فعلا على سرعة 100 ما فيش حاجه هاتحصل حتى لو عجله او مقص ضربوا . السرعات دى سرعات امان . الا طبعا قدر ربنا . و ساعتها ما فيش اى حاجه هاتقف امام القدر . لكن اللى بيجرى على سرعات 160 و 180 . لا يلوم الا نفسه . انا مش بادفع فلوس فى وسائل امان لحمايتى من تهورى