الموضوع: طلب هام :- اسعار الصيانات و قطع الغيار لرينو ميجان

السلام عليكم و رحمة الله و بركته

بعد اذنكم انا محتاج مساعدتكم فى عمل موضوع احصائى عن اسعار الصيانات و قطع الغيار فى التوكيل
لكذا موديل - منهم رينو ميجان .
و بعد كده حكتبهم فى موضوع واحد فى قسم المقارنات و يبقى مرجع لينا كلنا و لاى حد بيفكر يشترى العربيه علاشان يبقى عرف و هو بيشترى العربيه حيدفع كام فى صيانتها و قطع غيارها

المطلوب من حضراتكم الاتى :-

1- اسعار الصيانات الاساسيه و الدوريه :-

صيانه ال 10000
صيانه ال20000
صيانه ال40000
صيانه ال80000
مع ذكر قطع الغيار الى بتتغير فى كل صيانه " لو توافرة هذه المعلومه " .

2- اسعار قطع الغيار :-

قطع الغيار الميكانيكيه :
- طقم كاتينه ( سير , بلية شداد )
- سيور خارجيه ( تكيف و دينامو )
- موبينه
- طرمبه بنزين
- طرمبه ميه
- طقم دبرياج

قطع غيار العفشه :
- مساعدين
- تيل فرامل
- علبة دركسيون
- مقصات
- دسكات فرامل و الطنابير
-بليه العجل الامامى - الخلفى

الاجزاء الخارجيه :
- الرفارف " امامى خلفى "
- اكصدامات
-فوانيس اماميه - خلفيه


* ياريت اى حد عنده اى اسعار لأى قطعة غيار مايبخالش علينا بالمشاركه .. حتى لو اجزاء و قطع بره القايمه الى انا كاتبها
حتى لو سعر مسمار او صاموله او مصنعيه ..... اى اسعار حتفيدنا

* طبعا احنا بنتكلم على الاسعار فى التوكيل " فقط "

و لكم جزيل الشكر

الأسعار يتم تحديثها كل شوية بالتعاون مع الإدارة

و أخر تحديث حاليا كان 15-10-2008

المشاركة الأصلية كتبت بواسطة sharky

الأسعار يتم تحديثها كل شوية بالتعاون مع الإدارة

و أخر تحديث حاليا كان 15-10-2008

تسلم ايدك يا باشا
بجد موضوع وافى جدا جدا جدا جدا
تقريبا الوحيد فى المنتدى الى مكتوب بالتفصيل ديه
بس عاوز اسأل حضرتك عندك فكره صيانه ال60000 و ال80000 بيتغير فيها ايه ؟

شكرا يا باشا على ذوقك

صيانة الـ 60 الف دى الصيانة الشاملة و بالنسبة للتفصيل هى دى :
1-فلتر زيت 35 جم
2-بوجيهات 86 جم
3- فلتر بنزين 55 جم
4-طقم كاتينة 560 جم
5-سير دينامو 60 جم
6- فلتر هواء 90 جم
7-طلمبة مياه 520 جم
8-مياه ردياتير 45 جم
9-زيت موتور 278 جم ( 5 لتر )
10- plug 70 L.E.
11- Plug 28 L.E.
12- Drain Plug 1.85 L.E.
13-مصنعيات 600 جم
14- أجمالى الضرائب حوالى 300 جم

و تفاصيل صيانة الـ 80 الف نفس تفاصيل صيانة الـ 20 الف
و هى دى :
1- تغيير زيت ------------ 278 جم
2-فلتر زيت ------------- 35 جم
3- فلتر الهواء ---------- 90.00 جم
3- بوجيهات ----------- 86.00 جم
4- عمالة ------------- 200.00 جم
5- ضرائب ------------ 85.00جم



دايما رجالة رينو جاهزين بأى معلومة عن الميجـــان

انا عامل نفس الموضوع فى كذا قسم تانى , بس فعلا " رجاله " رينو قامو بالواجب و زياده و فى وقت قياسى ما شاء الله " انا ماسك الخشب اهه "

بجد انا مستغرب جدا
الواحد من الكلام الى بيسمعو عن اسعار قطع غيار الرينو كان حاسس انها تقارن بالمرسيدس فى الاسعار .
انا شايف ان كتير منها معقول جدا , و فى حاجات رخيصه جدا " زى الفلاتر مثلا و طقم الكاتينه و سير الدينامو " .

و اسعار الصيانات مش مبالغ فيها و تعتبر متوسطه فى العموم " و ممتازه بالنسبه لفئتها و التكنولوجيا الموجوده فى العربيه "

صيانه ال60,000 بتتكلف 2730 جنيه بطرمية الميه و من غيرها بتتكلف 2070 جنيه
صيانه ال80,000 بتتكلف 774 جنيه .

فعلا الاسعار كويسه جدا و مش زى ما الناس بتفتى انها غاليه جدا .

** بس ياترى عندك فكره عن سعر بليه العجل الاماميه و البليه الخلفيه !!!! ديه مهمه جدا بالنسبالى


متهيألى الموضوع ده حيعمل انقلاب فى المقارنه الى حعملها " ممكن نقول قنبله من العيار التقيل " .

كل الشكر ل استاذ احمد على سرعة الرد
و استاذ شاركى على المعلومات الوافيه , الاسعار و " المجهود الكبير و الجميل فى قسم رينو " .
انا بحب الميجان من زمان بس بجد انتو دخلتوها فى دماغى جدا .

ما هو دا إللى بقولوا من زمان فى المنتدى وبعض الناس مش عايزة تصدق

أسعار قطع غيار الميجان و صيانتها أرخص من اسعار صيانة و قطع غيار السيارات اليابانية فى التوكيل

على فكرة لو عملت الموضوع دا حتلاقى هجوم عاصف منا لجانب اليابانى لإنهم حيكتشفوا إن الميجان قطع غيارها و اسعار صيانتها أرخص من اليابانى فحتلاقى الموضوع حيتحول لجدال لإثبات إنها وحشة و خلاص

بلسبة لسعر بلية العجل للأسف مش معايا

المشاركة الأصلية كتبت بواسطة sharky

ما هو دا إللى بقولوا من زمان فى المنتدى وبعض الناس مش عايزة تصدق

أسعار قطع غيار الميجان و صيانتها أرخص من اسعار صيانة و قطع غيار السيارات اليابانية فى التوكيل

على فكرة لو عملت الموضوع دا حتلاقى هجوم عاصف منا لجانب اليابانى لإنهم حيكتشفوا إن الميجان قطع غيارها و اسعار صيانتها أرخص من اليابانى فحتلاقى الموضوع حيتحول لجدال لإثبات إنها وحشة و خلاص

بلسبة لسعر بلية العجل للأسف مش معايا

والله يا استاذ شاركى هى مش حتكون ارخص من اليابانى بس فى بعض قطع الغيار
..... ده فى مفاجئات غير موضوع المقارنه باليابانى .