الموضوع: هل الزيت saturated liquid ام compressed ilquid

أشكرك شكرا جزيلا على ثقتك فيا.. والحقيقة أنا مجرد شخص عادي بيحاول يوصل للحقيقة من مصادرها الموثوقة بقدر الإمكان ..مش أكتر من كده.


الحقيقة حضرتك سألت مجموعة أسئلة فنية جدا.. ومع إني مش مهندس كيميا (أنا مهندس [ميكانيكا] إنتاج) ولا أشتغلت في البترول قبل كده.. بس الأسئلة اللي من النوع ده بتبسطني لإنها بتخليني أدور وأزود معلوماتي.

وأنا هحاول أجاوب على الأسئلة بقدر معلوماتي القديمة والمعلومات اللي قدرت أحصل عليها.. وياريت أخوانا من مهندسي الكيمياء ومتخصصي البترول يساهموا بمعلوماتهم كمان علشان كلنا نستفيد.

المشاركة الأصلية كتبت بواسطة عبدالله برعى

السؤال الاول:
بالنسبة لـ flash point او heat point في الزبت ذات اللزوجة 5w-30 هي 196 درجة مئوية. والزوجة 5w-40 تزيد عنها 9 درجات مثلا... دا كلام واحد في توكيل زيت مشهور.. ايه مدي صحة الكلام هذا الكلام؟؟

الحقيقة مفيش حاجة إسمها Heat Point في زيوت المحركات .. لإن كلمة Heat Point بتتقال على "مصدر الحرارة"... إنما الصحيح هو "Flash Point" والمقصود بيها "نقطة الوميض" .. وبتتعرف بإنها "أقل درجة حرارة اللي عندها بيتبخر السائل ويكون خليط قابل للاشتعال".



والخليط عند درجة الحرارة دي لازم يكون فيه مصدر شرارة قريب منه علشان يشتعل.. ولو شلنا مصدر الشرارة ده مش هيحصل هيبقى فيه اشتعال.

دي غير درجة الاشتعال Fire Point .. اللي بتبقى أعلى بكتير وبيكون فيها البخار بيكمل احتراق لوحده من غير مصدر شرارة.


معلومة على جنب: مفيش وقود سائل بيشتعل... إنما بخار الوقود هو اللي بيشتعل.

وبالتالي الكلام اللي كان بيتقال على ملء تانك البنزين لحد نصه بس في الجو الحار خطأ تماما .. وبالعكس.. التانك المملوء بالكامل بالبنزين أقل عرضة للانفجار من التانك النصف ممتلئ.. لإن كمية بخار البنزين "القابل للاشتعال" بقت أقل.


طيب..

بالنسبة للزيوت..

أيوه... كل ما زادت اللزوجة زادت معاها درجة حرارة الـFlash point... ومعظم الزيوت الخفيفة بتبقى الـFlash point بتاعتها حوالي 200 مئوية... وبتوصل لحدود 240 مئوية مع الزيوت التقيلة.

طبعا... ده أحد الأسباب اللي بتخلي الزيوت الخفيفة تستهلك وتنقص بسرعة.. لإن قابليتها للتحول إلى بخار بقت أسهل.. وإن كان الوضع ده مش بيحصل بسهولة لإن الموتور صعب يوصل لدرجة الحرارة دي إلا في الأجزاء القريبة من حجرة الاحتراق.

درجة الـFlash point بتختلف كمان حسب زيت الأساس المستخدم.. والزيوت التخليقية عموما درجة الـFlash point بتاعتها أعلى من المعدنية.. وممكن الزيوت الخفيفة توصل الـFlash point بتاعتها لحدود 240 مئوية.

المشاركة الأصلية كتبت بواسطة عبدالله برعى

السؤال الثاني :
ما هي صلاحية الزيت في حالة وجودة في العبو؟ وما هي صلاحيته في حالة استخدامة في محرك السيارة؟؟؟ لان واحد من مستوردين زيت LIQUI MOLY قاللي انه 6 اشهر فقط في العبوه و6 المحرك

على حسب معلوماتي.. معظم شركات الزيوت مش بتقول معلومات صريحة في الجزئية دي.. وفيه شركات زيوت كتير بتكتب صلاحية الزيت (قبل الفتح) على العبوة نفسها... وغالبا بتبقى في حدود 3-5 سنوات.. وغالبا الصلاحية دي مرتبطة بعمر الإضافات.. مش عمر زيت الأساس نفسه.

ببساطة.. زيوت الأساس البترولية عمرها ملايين السنين.

أما بالنسبة للصلاحية بعد التشغيل... فأغلب الآاراء هنا في المنتدى بتقول 6 شهور للزيوت المعدنية و سنة للزيوت التخليقية... ومع ذلك.. مفيش أي معلومة رسمية أو موثوقة بتقول حاجة في الموضوع ده أساسا.

كل اللي أقدر أقولهولك إنك ترجع للكتالوج وتشوف إيه المدة اللي الكتالوج بينصح بيها لتغيير الزيت... ولو بتستخدم العربية استخدام شاق (حسب الحالات المذكورة في كتالوجات العربيات.. زي القيادة لمسافات قصيرة أو في الزحمة مثلا) فيبقى لازم تغير الزيت على فترات أقل.. حوالي نص المسافة أو المدة المذكورة أصلا.

وممكن نستثني الزيوت التخليقية من الموضوع ده باعتبار إنها المفروض تمشي ضعف مسافة الزيوت المعدنية

يعني لو الكتالوج بيقول تغير على 10 آلاف كيلو (و5 آلاف في الحالات الشاقة).. نخليها 20 ألف (و10 آلاف في الحالات الشاقة)... ودي كمان مش مضمونة في كل الزيوت التخليقية (مجموعة 3 تحديداً).

المشاركة الأصلية كتبت بواسطة عبدالله برعى

السؤال الثالث:
الزيت في حالة الاستخدام الفعلي في الموتور في هذه الحالة يعتبر saturated liquid ام compressed ilquid لانه يوجد لبس في هذا الموضوع؟؟؟

أعتقد هيبقى Compressed Liquied... لإن الـSaturated Liquid بيبقى غالبا على درجة حرارة الغليان تقريبا.. وأكيد حضرتك عارف إن درجة غليان الزيت أعلى من حرارة الموتور بكتير.

تقدر ترجع للمواضيع دي لتفاصيل أكتر:
https://en.wikipedia.org/wiki/Compressed_fluid
https://en.wikipedia.org/wiki/Vapor-liquid_equilibrium

المشاركة الأصلية كتبت بواسطة عبدالله برعى

رابعا :ايهما المهمة الـ viscosity ام density والرقم الخاص بكل منهم يزيد ام يقل افضل

الأهم هي اللزوجة Viscosity بدون شك

الكثافة Density قيمتها تعتبر شبه ثابتة لكل أنواع زيوت المحركات تقريبا.. والاختلافات فيها بسيطة.. ده غير إن الكثافة بتتغير مع تغير درجة الحرارة.. بمعنى إنها بتقل كل ما الحرارة زادت..

كثافة الزيت عموما تتراوح بين 0.8-0.9 كج/لتر تقريبا... وده كمان متاخد في الاعتبار اختلاف درجات الحرارة.

أما اللزوجة.. فالمسألة فيها أوسع.. وهي الأهم هنا ..


تقدر ترجع للموضوع ده لو عايز تفاصيل أكتر بالنسبة للزوجة

http://www.nilemotors.net/Nile/466047-a.html



يا رب أكون قدرت أجاوب بالقدر الكافي.


...