الموضوع: تجربه سيئه لتوكيل رينو ابو رواش

السلام عليكم يا شباب ..

انا حجزت عشان اروح اعمل صيانه ال 1000 لعربيه لوجان اتوماتيك وكان ميعادي الساعه 12 ونص امبارح ... المهم روحت و انا مبسوط واخت معايا ولادي على اساس انها صيانة الالف كل اللي هتاخده بكتير ساعه ونص مثلا لاننا كنا خارجين بعدها ... المهم وصلت هناك 12 و ربع و كنت قدام مكتب الاستقبال ... وسجلت اني وصلت ومن بعدها ابتديت سوء المعامله اللي بصراحه مش لاقي وصف ليه

اولا : قاعدت لغاية الساعه واحده و ربع لحد ما المهندس جالي (45 دقيقه) ، وده بعد الزن عليهم و وبعد ما اديتهم كلمتين ، لان البهوات مش مخلين في مهندسين كفايه مع وجود الضغط ... ملوحظه برده عشان حق ربنا المهندس كان استقباله و كلامه كويس و هو المهندس كريم

ثانيا : بعد ما عمل تقرير الاستلام ، بقوله في ملاحظات عندي ، فبيقولي لا حضرتك مبلغتش عليها في الحجز ... انت كده جاي تعمل صيانه و بس الملاحظات لازم تتقال عشان بتأثر في الوقت وممكن تبييت العربيه ، طبعا مسكتش و قولتله ان ما فيش توكيل بيعمل كده و انا اتعاملت قبل كده مع نيسان وغيره ومحدش بيقول الكلام ده ، المهم انه قالي انا هعديها لحضرتك مجامله عشان دي اول مره ... مع العلم انها كانت الملاحظات العاديه اللي كل الناس اتكلمت عليها في المنتدي ( رعشه مع لف الدريكسيون وتأخير في السرعات الاولي في الفتيس)

ثالثا : العربيه تم استلامها من الفني وفوجئت انها اتركنت بره لمده 30 دقيقه كمان ... روحت داخل الورشه من على الباب لقيت الراجل اللي بيوزع الشغل فقالي هات ايصال الاستلام فلما بص فيه قالي انت هتستلم الساعه 4 راجع المهندس اللي استلم منك هو كاتبلك كده .. وعربيتك واخده دور عشان الزحمه ...وده كان باسلوب صوت اللي هو "متوجعش دماغنا بقى "

رابعا : العربيه طلعت فعلا من الورشه الساعه 4 وخمسه ، وقاعدت بلا مبالغه نص ساعه كمان لحد ما الفاتوره طلعتلي عشان اترحم من زن ولادي اللي كانوا جابوا اخر من القاعده و المطوحه ومدفعتهاش الا بالخناق برده مع المحاسب عشان راكن كذا عميل حواليه

من حيث الجانب الفني فبصراحه انا حسيت ان العربيه فرقت شويه بعد الصيانه ، بس دي صيانه الالف ويعتبر معملوش حجات فيها كتير عشان نقيممهم ، ده غير انها كانت فيها زيت و خرابيش مطرح الرفع في الاكصدام

*** مشكلتي معاهم في المعامله و التاخير المبالغ ، وعدم وجود اي خدمه مشروبات زي اي توكيل تاني ( وده طبعا عشان هما مأجرين لكوستا جوه ) ... و المحسوبيه في العربيات اللي مكنتش حاجزه و دخلت في الوسط و خلصت قبلنا ، ده غير ان صيانه الالف غاليه 550 شامله الضريبه عن المراكز التانيه بكتير ( السبع بي 120 جنيه غير الزيت ، ومراكز تانيه مبتخدش غير 50 جنيه )
وخرجت من هناك على اخري بدل ما اكون مرتاح و مبسوط اني شاري عربيه جديده ....و الطريف ان بنتي بتقولي يلا عشان نخرج بقى .. قولتلها ما انتم خرجتم و جيتوا معايا .. قالتي دي مكنتش خروجه دي كانت "مرمطه "
متاسف على الاطاله وياريت حد يرشحلي مركز خدمه تاني