مشــكلة فى لمبة الفانوس و الـ Cd - ريــنو ميجان II

**Ahmed20101** · 22-12-2008 12:40 AM

السلام عليكم ورحمة الله وبركاته

أرجو منكم أن تساعدوني في بعض المشاكل في سيارتي

1- لما أدخل السي دي في مشغل الأسطوانات
مابتتطلعش الأسطوانة إلا بطلوع الروح
فهل المشكلة في السي دي ولا الأسطوانة
مع إن في أسطوانة تانية بدخلها وبتطلع على طول
وياريت حد يقولي ازاي أطلع الأسطوانه من السي دي
لأني كل مابطلعها بتعمل صوت زي صفارة كده
وبيشغل الراديو
(أنا لسه مشتري العربية جديد)

2- المشكلة دي للناس اللي معاهم ميجان

فهل حد عنده حل للمشكلة دي

3- لمبة الفانوس اللي من قدام محروقة ازاي أفك الفانوس وأغير اللمبة (العربية متغطية من فوق ومن تحت مش باين أي حاجة غير الموتور)

فهل حلول المشكلات دي
إني أروح التوكيل

وشكراً

**momo10000** · 22-12-2008 01:30 AM

يا باشا اهلا بيك في حلبة الوحوووووووووش ( اللقب الرسمي لملاك الرينو)

اولا .. الف مبروك العربية وبكرة تتاكد ان اختيارك كان صح الصح إن شاء الله.

بالنسبة للمشاكل :
1 - 100 % مشكلة الاسطوانة ... لان الاسطوانة الردئية بتاخد وقت والسي دي بيحاول يقراها... وبعد كدة يدي خطا وصفارة ويطلع الاسطوانة.( ظبط اسطواناتك بس يا باشا)

2- الفوانيس اللي ورا كل واحد فيها لية فيوز ... كل مافي في الموضوع انة فيوز ... بس لازم التوكيل عشان هما عارفين مكانة فين بالظبط.

3- اللمبة اللي عايزة تتغير ... لازم تتغير في التوكيل عشان الباكتات تتشال صح وتركب صح وعشان الكلابسات.

الخلاصة : كل الحاجات دي سهلة وبسيطة إن شاء الله ومفيهاش مشكلة وروح للوكيل بدون حجز لان دي حاجات سهلة وتتعمل علي السريع.

وياريت تطمني يا باشا...

**Ramy_Tantawi** · 22-12-2008 07:20 AM

عليكم السلام ورحمة الله وبركاته اهلا بحضرتك استاذ احمد وان شاء الله تكون المشاكل بسيطه كلها ولها حل .

- لما أدخل السي دي في مشغل الأسطوانات
مابتتطلعش الأسطوانة إلا بطلوع الروح
فهل المشكلة في السي دي ولا الأسطوانة
مع إن في أسطوانة تانية بدخلها وبتطلع على طول
وياريت حد يقولي ازاي أطلع الأسطوانه من السي دي
لأني كل مابطلعها بتعمل صوت زي صفارة كده
وبيشغل الراديو

طالما الاسطوانات الاخرى بخلاف دي بتطلع طبيعي يبقى مافيش مشكله في الجهاز نفسه ويفضل تجربة اسطوانات اخرى وشوف حضرتك لو بتطلع طبيعي ماعادا واحده فيهم يبقى طلع قرار بإبعاد ونفي الاسطوانه العيانه اللي بتدخل ومابترضاش تطلع دي عشان هاتبوظ الجهاز .

2- مشكلة الفانوس انا للأسف مش متذكر اللمبه الضعيفه دي موجوده عندنا ولا لأ مفروض ان الجزء ده في الفانوس للمبة الشبوره الخلفيه ودي مش فاكر هي شمال فقط ولا يمين كمان هتأكد وأقول لحضرتك .......اما بخصوص اللمبه المحروقه فا ممكن تتغير بسهوله ان شاء الله حضرتك فك الفبره السوده ناحية الفانوس في الشنطه هتلاقي زي مسمارين بلاستيك ماسكين فكهم هاتوصل للمبات بسهوله ان شاء الله.

3- مشكله لمبة الفانوس الاماميه :- فك الفانوس هو الحل الأخير دائما بالنسبه لنا لان فك الفانوس في الميجان زي فك الموتور بالظبط

حاجه صعبه جداً باختصار هانحتاح نفك الاكصدام .....عموما لتغيير اللمبه في الفانوس مش هانحتاج ان شاء الله نفك الفانوس ابداً ...حضرتك بص على الكارتيره ناحية اللمبه المحروقه هتلاقي داخل الكارتيره عند الكاوتش مربع صغير كده بيتفك لو فكيت الجزء ده من الكارتيره هاتوصل بسهوله ان شاء الله للمبة الفانوس وتغيرها بتفسك ان شاء الله .

آخر حاجه حضرتك شاري العربيه جديد وهي جديده ولا شاريها مستعمله ؟ لو شاري العربيه جديد يبقى التوكيل هو اللي يعمل الحاجات دي كلها عشان الضمان والكلام ده لو شاريها مستعمله يبقى التوكيل برضه في المقام الاول لكن في موضوع تغيير اللمبات والكلام ده حاول فيه حضرتك الاول وان شاء الله يتحل كل شيء.

**farahat** · 22-12-2008 03:19 PM

وعليكم السلام أحمد باشا

بالنسبة لمشكلة الإسطوانات أنا شايف أيمن باشا و رامي باشا قاموا بالواجب و زيادة في توضيح المشكلة و الحل
أما مشكلة الكشف الخلفي فهنا في جزئين ، بالنسبة للجزء الأعلى من الكشاف دة فيه نور الإضاءة الليلية العادي و نور الفرامل (لمبة وحدة بس درجتين ) ، مين فيهم إلي فيها مشكلة عندك ؟ ظن إن هي بتاعة الإضاءة الليلية ، و دي غالباً سببها إن اللمبة دي مش نفس قوة اللمبة المترقبة في الناحية الشمال ، و حلها إن سعادتك تفك اللمبة دي و تقارنها باللمبة التانية إلي راكبة في الناحية الشمال و تجيب لمبة جديدة Osram تكون نفس الواط الأصلي ، و أكيد اداتها هتكون أقوى إن شاء الله (سبب المشكلة إن الكهربائية لما بيغيرو اللمبات عادةً مش بيهتمو بقوة اللمبة طالما شغالة و نفس المقص يبقى خلاص و دة مش صح ، غيرها و إن شاء الله المشكلة تتحل )

اللمبة إلي تحت دي بتاعة الضباب الخلفية ، و دي في عربيات كتير في أوروبا بتكون مقجودة في الناحية الشمال فقط (بص على Jetta ولا Passat ...) ، انما في الميجان عشان تصميم الفانوس يكون متماثل عملوا لمبة يمين و لمبة شمال ، بس بينوروا اللمبة الشمال فقط ( هي القوانين عندهم كدة إن إضائة الشبورة الخلفية تكون إجباري في الشمال لكن اليمين إختياري مش شرط تكون موجودة ، عشان التخطي بيكون من الشمال فقط ) ،
يعني من الأخر عربيتك سليمة و لكن اللمبة دي طبيعي مش بتنور .

بالنسبة للكشاف الأمامي ، هي اللمبة المحروقة العالي ولا الواطي ؟
أصل العالي بيتغير من فوق من الكبوت و الواطي بيتغير من الكرتيرة من جانب العجل ذي ما أستاذ رامي تفضل و قال .

كلها حاجات بسيطة إن شاء الله و ربنا يبارك لك في العربية
تقبل تحياتي

**Ahmed Selim** · 22-12-2008 03:40 PM

السلام عليكم

بص يا باشا.....الأسطوانات لو مش أصلية هتلاقى شوية صعوبة فى خروج الأسطوانة ومش هتعرف غير بالتجربة......يعنى أنا عندى بشغل أسطوانات من نوع أسمه memorex هو غالى شوية بس أحسن نوع جربته لحد دلوقتى......وموجود عند راديو شاك وسعر الأسطوانة حوالى 3.5 جم ( بس بتتباع بالعلبة )

بالنسبة للمبتين....اللى تحت يمين دى أصلاً مش موجودة ودى لمبة الشبورة الخلفية......فى بعض الماركات بتتعمد تحط لمبة واحدة فى الشبورة الخلفى عشان المفروض أن فى الشبورة تمشى على اليمين وبالتالى اللمبة اللى على الشمال تبقى هى اللى باينة للى بيعدى منك.
رينو كده وبرضه ليا واحد صاحبى معاه جيتا 2009 خليجى فيها نفس القصة.

اللمبة الضعيفة دى ممكن تبقى من اللمبة نفسها أو من الفيوز....ودى تعملها فى التوكيل أو مركز معتمد .....مش هتاخد منك 15 دقيقة.
اللمبة اللى قدام ممكن تعملها بنفسك لو تحب....أكسر الدركسيون الناحية التانية وهتلاقى فى الكارتيرة غطاء مدور....فكه وهتلاقى أنك تعرف تحط أيدك على خلفية الفانوس
وشوف الملف جه هيساعدك فى أى حاجة كهربائية عاوز تعملها
http://rapidshare.com/files/17576838..._equipment.pdf

**Amr_Moh** · 22-12-2008 08:19 PM

المشاركة الأصلية كتبت بواسطة Ahmed A.Maksoud

السلام عليكم

بص يا باشا....اللمبة اللى قدام ممكن تعملها بنفسك لو تحب....أكسر الدركسيون الناحية التانية وهتلاقى فى الكارتيرة غطاء مدور....فكه وهتلاقى أنك تعرف تحط أيدك على خلفية الفانوس
وشوف الملف جه هيساعدك فى أى حاجة كهربائية عاوز تعملها
http://rapidshare.com/files/17576838..._equipment.pdf

ahmad ya gamed

ana lesa ma3'iar lamba odam ymeen bnafs el taree2ah

**Ahmed Selim** · 22-12-2008 09:06 PM

أى خدمة يا عمووور :)

بمناسبة الأسطوانات........أن كنت لسه فى راديو شاك مكرم عبيد ولقيت أسطوانات ميموركس عاملين عليها عرض.....50 أسطوانة ب 69 جم ( الطبيعى بيبقى ال 25 أسطوانة ب 89 أو 99 جم )